MALAQUÍAS 2 - Biblia Guarani Tumpa Iñee

Ñeengata Israel iñemuña reta pe jeko kavimbae re

¹ “Sacerdote reta, añave kuae jae mborookuai peveguarä:

² Mbaetɨ yave peendu jare mbaetɨ yave pepɨakatu reve chemboete, ayepopeyuta peré jare mbaembae penoi vae re, echa mbaetɨ chemboete pepɨakatu reve.” Jei yandeYa Imbaepuere yae ete vae.

³ “Añave che arokomeguata peremitɨ reta, perɨmba oyeyukagüe jepoti pe poovarapita jare peyemomboukata jae ndive.

⁴ Jókuae rupi peikuaata che ko amee kuae mborookuai oiko avei vaerä Leví iñemuña reta ndive cheporogüɨrökuavee päve.” Jei yandeYa Imbaepuere yae ete vae.

⁵ “Jókuae cheporogüɨrökuavee päve Leví iñemuña reta ndive jae ko tekove jare mbɨakatu. Kuae reta amee chupe oipoɨu vaerä chegüi jare chemboete vaerä; oipoɨu reta chegüi jare chemboete.

⁶ Mborookuai añete vae re oporomboe kavi reta, jare mbaetɨ oñeväe jese reta ikavimbae, mbɨakatu rupi jare jupi rupi yogüɨreko che ndive, jare jeta vae ombosɨrɨuka ikavimbae güi.

⁷ Echa sacerdote reta oporomboe kavita ko, jare chugüi reta tëta pegua reta oekata mborookuai, echa jae reta ko Tumpa Imbaepuere yae ete vae iñeemombeúa.

⁸ Ërei pe sacerdote pepia cheremimbota güi; jeta vae pembojopa peporomboe pe; perokomegua morogüɨrökuavee päve Leví iñemuña reta güi. Jei yandeYa Imbaepuere yae ete vae.

⁹ Jáeramo che pogüɨröɨroukata opaete tëta pegua pe, echa pe reta mbaetɨ peyapo cheremimbota, jare mborookuai re peporomboe yave peyoparavoño.”

Israel iñemuña reta oyapo ikavimbae

¹⁰ ¿Meteiñoä pa ko yandeRu? ¿Meteiñoä pa ko Tumpa yandeapoa? ¿Maera pa jayave mbaetɨ yaiko kavi oyoupii, jare yamboeteä Tumpa oyapo morogüɨrökuavee päve ñaneñemuñagüe reta ndive vae?

¹¹ Judá iñemuña reta oyapo ikavimbae vae, Israel pe jare Jerusalén pe oyeapo pɨ̈chɨi yae vae. Echa Judá iñemuña reta omongɨa tupao guasu yandeYa oaɨu yae vae; jare omenda reta tumpa-raanga imboetea reta tayɨ ndive.

¹² ¡YandeYa omokañɨta Jacob iñemuña reta ipɨte güi kia nunga jökorai oyapo vae, jare oipotagüe güeru tëi mbota yandeYa Imbaepuere yae ete pe vae!

¹³ Jare jekuae peñova yeta tesaɨ pe mɨmba oyeyuka oyeapɨ jese vae yandeYa imbae, yaeo pe, täse reta pe; jayave ngaraa ye ma amae mbota re aipɨɨ vaerä chepɨakatu reve pepo güi.

¹⁴ Ërei pere: “¿Maera pa?” ¡Echa yandeYa pereecha ko kërai peiko petaɨrusu yave pemenda jae ndive vae ndive; echa mbaetɨ pereko kavi ikotɨ, jae ko peïru, jae ko perembireko pemenda kavi jae ndive vae!

¹⁵ Tumpa ko oyapo mókoi vae güi meteiño, güɨnoi jete jare jekove. ¿Maera pa oyapo metei ramiño? Echa oipota tëi ko peñemuña vaerä Tumpa peguaräño. ¡Jáeramo, peñeñovatu agüɨye pembotavɨ perembireko, petaɨrusu güive pemenda jae ndive vae!

¹⁶ Echa yandeYa, Israel iñemuña reta iTumpa güɨröɨro ko yomombo, jare oyemongɨa mbaeyoa pe vae, jökorai jei yandeYa Imbaepuere yae ete vae. “Jayave, ¡peñeñovatu, agüɨye pembotavɨ perembireko!”

Tumpa iporojäa oyearo vae regua

¹⁷ Pembogüérai ma yandeYa peñee pe. Ërei pere: “¿Mbae nunga ñee pe pa rombogüérai?” Echa pere: “Kia nunga vae oyapo ikavimbae yave ombopɨakatuño yandeYa.” Ani pere yave: “¿Ketɨ pa opɨta yandeYa jupi yae vae?”