San Lucas 9 - Biblia Guarani Tumpa Iñee

Jesús omondo jókuae doce jemimboe reta

¹ Jesús opa omboatɨ jókuae doce jemimboe reta, jare omee chupe reta mbaepuere ombosɨrɨ vaerä aña reta oya jese vae reta güi jare ombogüera vaerä imbaerasɨ vae reta.

² Jayave omondo reta omombeu vaerä Tumpa iporookuaía jare ombogüera vaerä imbaerasɨ vae reta.

³ Jei chupe reta: —Agüɨye peraja mbae ave. Agüɨye peraja pepopoka, ani peaporoka, ani mbɨyape ani korepoti. Jare agüɨye peraja mókoi peremimonderä.

⁴ Peo peväe yave oipota rupi metei o pe, pepɨta joko pe, peo ye regua.

⁵ Jare oime yave metei tëta guasu pegua reta mbaetɨ oipota pemboresive yave peë joko güi, jare pemotumo pepɨ ɨvɨkúi güi, oikuaa vaerä jae reta ko teko güɨnoi.

⁶ Jayave jae reta yogüɨraja imiari opaete tëta raɨ reta rupi, omoërakua reve ñee ikavi vae jare oporombogüera reta yogüɨrajaa rupi.

Juan imano

⁷ Jare mburuvicha guasu Herodes oendu opaete Jesús oyapo vae regua. Jayave ipɨakañɨ. Echa amogüe vae jei: —Juan oikove ye omanogüe vae reta ipɨte güi.

⁸ Jare ïru vae reta jei: —Elías oyekuaa ye. Jare ïru vae reta jei: —Jae ko ñeemombeúa arakae vae, oikove ye.

⁹ Ërei Herodes jei: —Añäka-sɨauka ma ko Juan. Ërei ¿kia ra jókuae? Echa aendu ma jeta jesegua. Jare jae oipota oecha Jesús.

Jesús omongaru cinco mil vae reta

¹⁰ Jare Jesús jemimondo reta yogüeru ye jae oïa pe yave, omombeu reta Jesús pe opaete oyapo reta vae. Jayave Jesús güɨraja reta kïrii ngatúa pe köiño tëta guasu Betsaida güi.

¹¹ Ërei jeta vae reta oikuaa yave, yogüɨraja jaɨkue. Jare Jesús omboresive kavi jare imiari chupe reta Tumpa iporookuaía re jare ombogüera imbaerasɨ vae reta.

¹² Kaaru ma yave, jókuae doce vae yogüeru jei Jesús pe: —Emondo kuae jeta vae tëta raɨ reta rupi, joko pe okaru vaerä jare oke vaerä. Echa mbaetɨ kia ave kuae rupi.

¹³ Ërei Jesús jei chupe reta: —Pe reta pemee tokaru. Jare jae reta jei: —Jaeño oime rogüɨnoi pandepo mbɨyape jare mókoi jevae ɨ rupigua. ¿Roguata ra tembíu opaete kuae jeta vae reta peguarä?

¹⁴ Echa kuimbae reta oupitɨ cinco mil rupi. Jayave Jesús jei jemimboe reta pe: —Pemboatɨ tee tee toguapɨ reta cincuenta rupi.

¹⁵ Jayave jökorai oyapo reta. Omboguapɨ reta opaete vae.

¹⁶ Jayave Jesús oipɨɨ jókuae pandepo mbɨyape jare mókoi jevae ɨ rupigua, jare omae reve ara kotɨ omee yasoropai Tumpa pe jese. Jayave opɨ̈saa mbɨyape jare jevae, jare omee jemimboe reta pe, jae reta omee vaerä opaete joko pe oguapɨ ñogüɨnoi vae reta pe.

¹⁷ Opareve okaru, jare iyangapɨɨ reta. Jayave Jesús jemimboe reta omboatɨ doce kanata mbɨyape jembɨregüe.

Pedro omombeu Jesús ko jae Cristo

¹⁸ Metei ara Jesús oyerure jemimboe reta ndive ñogüɨnoi ramboeve jaeiño, oparandu chupe reta: —¿Kia pa che ïru vae reta peguarä?

¹⁹ Jae reta jei chupe: —Amogüe vae jei nde ko jae Juan oporombobautisa vae, jare ïru vae reta jei nde ko jae Elías, jare ïru vae reta jei nde ko jae metei ñeemombeúa arakae vae, oikove ye vae.

²⁰ Jayave Jesús oparandu chupe reta: —Ërei peve reta ¿kia pa che? Jayave Pedro jei chupe: —Nde ko jae Cristo, Tumpa ombou vae.

Jesús omoërakua omanota ko vae re

²¹ Ërei Jesús oyókuai reta agüɨye etei vaerä omombeu kia pe ave,

²² jei reve: —Che Kuimbaerä ayeapo vae aiporara yaeta. Jare tëta guasu pegua reta itenondegua reta, sacerdote reta itenondegua reta, jare mborookuai re oporomboe vae reta chereröɨrota jare cheyukata. Ërei mboapɨ ara rupi aikove yeta.

²³ Jayave Jesús jei opaete vae pe: —Kia nunga vae ikɨ̈reɨ ojo cherupíe vae, tiñakañɨ iyeugüi, tovoɨ ikurusu ara ñavo, jare tojo cherupíe.

²⁴ Echa opaete oipota oñovatu jekove vae, okañɨteita ko. Ërei jókuae omee jekove chereko pegua vae güɨroasayepeta.

²⁵ ¿Mbaerä pa osiriveta kuimbae pe omongana yave opaete ɨvɨ, ërei oñemokañɨtei yave?

²⁶ Echa kia imara cheré jare cheñee re vae, che Kuimbaerä ayeapo vae aromarata vi, ayu ye yave cheyemboetea jare cheRu jare araɨgua reta iyemboetea reve.

²⁷ Ërei añete che jae peve, ndei amogüe kuae pe ñogüɨnoi vae omano mbove, oecha retata ou Tumpa iporookuaía.

Jesús oyemoambuae

²⁸ Juri ara rupi Jesús imiari güire, güɨraja Pedro, Juan jare Jacobo, jare oyeupi metei ɨvɨtɨ guasu re oyerure vaerä.

²⁹ Jare Jesús oyerure ramboeve, jova oyemoambuae jare jemimonde tïiasɨ jare jembipe.

³⁰ Jare mókoi kuimbae imiari ñogüɨnoi Jesús ndive. Jae reta ko Moisés jare Elías.

³¹ Mókoi reve oyekuaa jembipeasɨ yae vae pe, jare imiari reta Jesús omanota ko Jerusalén pe vae re.

³² Ërei Pedro jare jae ndive ñogüɨnoi vae jopeɨ yae, ërei mbaetɨ oke, jare oecha Jesús iyemboetea jare oecha vi jókuae mókoi kuimbae Jesús ndive ñogüɨnoi vae reta.

³³ Moisés jare Elías yogüɨraja ma yave, Pedro jei Jesús pe: —Oporomboe vae, jaekavi roï kuae pe. Royapota kuae pe mboapɨ küaraɨa ñairaka pegua, metei ndeveguarä, metei Moisés peguarä jare metei Elías peguarä. Echa Pedro mbaetɨ oikuaa mbae jei vaerä.

³⁴ Jare Pedro imiari oï ramboeve, amapɨtu omboyasoi reta. Jare jae reta okɨɨye amapɨtu omboyasoi yave.

³⁵ Jayave oyeendu ñee amapɨtu güi jei: “Kuae ko jae cheRaɨ aaɨu yae vae. Peyeapɨsaka jese.”

³⁶ Jare jókuae ñee kïrii ma yave, jae reta oecha Jesúsño ma. Jare jókuae ara reta rupi jae reta mbaetɨ omombeu kia pe ave mbaembae oecha vae. Kïriiño opɨta reta.

Jesús ombogüera kunumi aña oya jese vae

³⁷ Jare pɨareve pe ɨvɨtɨ guasu güi ogüeyɨ reta yave, jeta vae yogüeru oövaiti reta.

³⁸ Jayave metei kuimbae yatɨ vae reta ipɨte pe oï vae jei Jesús pe: —Oporomboe vae, romoñera remae vaerä cheraɨ re. Jaevaeño ko cheve.

³⁹ Güɨramoiño metei aña oya jese jare ombosapúkai. Jayave omborɨrɨi jare iyuru tɨrɨyɨi, oyembopere. Omombaravete yae oeya.

⁴⁰ Amoñera tëi ma nderemimboe reta ombosɨrɨ vaerä chugüi, ërei mbaetɨ ipuere reta.

⁴¹ Jayave Jesús jei joko pe ñogüɨnoi vae reta pe: —Oporogüɨroviambae jare ipɨapochɨ vae reta. ¿Kërai regua ra aikota pe reta ndive jare kërai regua pa pogüɨropɨata? Jayave jei kunumi tu pe: —Eru nderaɨ kuae pe.

⁴² Jare kunumi ou ramboeve, aña oipɨaka jare omborɨrɨi yae. Ërei Jesús oñeengata aña pe; ombogüera kunumi jare omee ye tu pe.

⁴³ Jare opaete vae ipɨakañɨ Tumpa imbaepuere tuicha vae re. Ërei opaete vae ipɨakañɨ ramboeve opaete Jesús oyapogüe re, jei jemimboe reta pe:

Jesús omombeu ye omanota vae regua

⁴⁴ —Peyeapɨsaka kavi kuae jaeta peve vae re. Echa che Kuimbaerä ayeapo vae chemeeta cherovaicho reta ipo pe vae.

⁴⁵ Ërei jae reta mbaetɨ oikuaa kavi mbae re ra Jesús imiari vae. Echa oñeomi oï chugüi reta, jare oipoɨu reta oparandu vaerä chupe jese.

¿Kia pa jae tenondegua?

⁴⁶ Jayave jae reta oyoaka, kia ra chugüi reta tenondeguarä vae re.

⁴⁷ Jare Jesús oikuaa chugüi reta ipɨayemongeta ramo, oenɨi metei michia jare oñono iyɨpɨ pe.

⁴⁸ Jayave jei jemimboe reta pe: —Kia omboresive yave kuae nunga michia cheree re vae, che ko chemboresive. Jare jókuae chemboresive vae, omboresive ko chembou vae. Echa pepɨte pe oñemomichi vae ko oikota tenondeguarä.

Mbaetɨ oyovaicho yande ndive vae ñaneïru ko

⁴⁹ Jayave Juan jei Jesús pe: —Oporomboe vae, roecha metei kuimbae nderee pe ombosɨrɨ aña reta oya jese vae reta güi, jare royopia agüɨye mo vaerä oyapo. Echa jae ñaneïruä ko.

⁵⁰ Jesús jei chupe: —Agüɨye peyopia. Echa mbaetɨ oyovaicho yande ndive vae yandemborɨ ko.

Jesús omboeta Jacobo jare Juan pe

⁵¹ Jare oväeta ma Jesús ojo ye vaerä ara pe yave, oñeñono okɨɨyembae reve ojo vaerä Jerusalén pe.

⁵² Jayave omondo jenonde iñee jerajaa reta. Jae reta yogüɨraja metei tëta raɨ ɨvɨ Samaria pegua pe oñono kavi vaerä Jesús opɨta vaerä.

⁵³ Ërei joko pegua reta mbaetɨ omboresive, echa oikuaa reta Jerusalén kotɨ ko ojo oiko vae.

⁵⁴ Jesús jemimboe reta Jacobo jare Juan kuae oecha yave jókuae, jei reta Jesús pe: —OreYa, ¿reipota pa roe ou vaerä tata ara güi Elías oyapo rami, opa vaerä omokañɨtei kuae tëta raɨ pegua reta?

⁵⁵ Ërei Jesús oyerova ikotɨ jare omboeta chupe reta, jei reve: —Pe reta mbaetɨ peikuaa kia nunga pegua ma ko peiko vae.

⁵⁶ Echa che Kuimbaerä ayeapo vae ayu aporomboasa vaerä. Mbaetɨ ayu aporomokañɨtei vaerä. Jayave yogüɨraja ïru tëta raɨ kotɨ.

Jesús jupíe oipota tëi yogüɨreko vae reta

⁵⁷ Jare tape rupi yogüɨraja reta ramboeve, metei kuimbae jei Jesús pe: —CheYa, ajata nderupíe opaete kerupi reoa rupi.

⁵⁸ Jayave Jesús jei chupe: —Aguara reta oime ikua, jare güɨra reta oime jaitɨ. Ërei che Kuimbaerä ayeapo vae mbaetɨ anoi kia pe aputuu vaerä ave.

⁵⁹ Jare Jesús jei ïru kuimbae pe: —Eyu cherupíe. Ërei jókuae kuimbae jei: —CheYa, emaeño räri cheré aja vaerä cheru añotɨ regua.

⁶⁰ Jayave Jesús jei chupe: —Emaeño toñotɨ kuri tekove opambae vae mbaetɨ güɨnoi vae reta. Ërei nde ekua emombeu Tumpa iporookuaía.

⁶¹ Jayave ïru kuimbae jei Jesús pe: —Taja nderupíe, cheYa. Ërei emaeño räri cheré aja vaerä chero pegua reta pe amombeu.

⁶² Ërei Jesús jei chupe: —Ombaeara vae mbaetɨ ko omae jaɨkue kotɨ. Jókuae nunga ngaraa ikavi Tumpa iporookuaía peguarä.