San Lucas 8 - Biblia Guarani Tumpa Iñee

Kuña reta omborɨ Jesús vae

¹ Jare kuae jaɨkue rupi Jesús ojo opaete tëta guasu reta jare tëta raɨ reta rupi, jare omombeu ñee ikavi vae Tumpa iporookuaía regua. Jare jókuae doce vae yogüɨraja jupíe.

² Jökoraiño vi amogüe kuña reta yogüɨraja jupíe, omborɨ Jesús jare jemimboe reta mbaembae güɨnoigüe pe. Jókuae okuera aña oya jese vae güi jare imbaerasɨ güi vae reta, jae ko: María Magdalaɨgua; jae ko chiu aña oë osɨrɨ chugüi vae.

³ Juana, Chuza jembireko. Chuza ko jae mburuvicha guasu Herodes jembiokuai; Susana jare jeta ïru kuña reta.

Jesús ombojaanga omaetɨ vae re

⁴ Jeta vae yogüeru oyemboatɨ tëta guasu reta güi Jesús oïa pe. Jayave Jesús jei chupe reta ombojaanga reve:

⁵ “Metei kuimbae omaetɨ vae oë omaetɨ. Omaetɨ yave, omoai temitɨ, jare amogüe oa tape rupi; jare opɨ̈ro jese vae jare güɨra reta opa jou.

⁶ Mbovɨ temitɨ oa ita pɨte rupi. Ërei oë rupive, ipiru, echa ɨvɨ mbaetɨ ñäkɨ ngatu.

⁷ Amogüe temitɨ oa yuu pɨte rupi. Yuu oë jókuae temitɨ ndive vae opa oyuka.

⁸ Amogüe temitɨ oa ɨvɨkavi pe. Oë jare okuakuaa jare jeta yae jäɨ.” Jare kuae opa jei chupe reta yave, iñeeäta reve jei: “Oipota oyeapɨsaka vae toyeapɨsaka kuae re.”

Maera Jesús oporomboe ombojaanga reve

⁹ Jayave Jesús jemimboe reta oparandu Jesús pe, jei: —¿Mbae pa oipota jei kuae rembojaanga reve nemiari vae?

¹⁰ Jayave Jesús jei chupe reta: “Amombeu ma peve Tumpa iporookuaía regua peikuaambae vae, ërei ïru vae reta amboe ambojaanga reve, yepe tëi oecha reta, agüɨye vaerä oecha reta, jare yepe tëi oendu reta, ërei mbaetɨta oikuaa reta.

Jesús omombeu kavi omaetɨ vae re oyembojaanga vae

¹¹ Kuae ko oipota jei ambojaanga reve chemiari vae: Temitɨ, oyembojaanga Tumpa iñee re.

¹² Jókuae temitɨ tape rupi oa vae oyembojaanga amogüe Tumpa iñee oendu vae reta re. Javoi ou aña guasu oekɨ ipɨa güi Tumpa iñee, agüɨye vaerä güɨrovia jare oyemboasauka reta.

¹³ Jökorai vi jókuae ita pɨte rupi oa vae reta oyembojaanga Tumpa iñee oendu rupive omboresive oyerovia reve vae re, ërei kuae reta jókuae temitɨ japo matɨä ɨ́vɨkotɨ ojo rami ko. Echa michi peguaño güɨrovia. Ërei mbaemboavai ou chupe reta yave, opia reta.

¹⁴ Jaeramiño vi jókuae temitɨ oñeotɨ yuu pɨte pe vae oyembojaanga Tumpa iñee oendu vae reta re. Ërei omboɨpɨ oyemoambeko ɨvɨ pegua mbaembae re jare oipota oikokatu vae re jare yerovia ɨvɨ pegua re. Jare opɨta reta temitɨ iambae rami.

¹⁵ Ërei jókuae temitɨ oa ɨvɨ kavi pe vae oyembojaanga Tumpa iñee oendu vae re. Kuae reta oyeapɨsaka Tumpa iñee re ipɨa kavi jare sɨmbi rupi kavi, jare oyapo Tumpa iñee jei oyapo vaerä vae. Jáeramo jae reta temitɨ ia avei vae rami ko.

Oñeomi vae oyekuaa ñotai ko

¹⁶ Mechero yamboendɨ yave, ngaraa ñañono mbaerɨru igüɨ pe, ani güɨrapembɨ igüɨ pe. Ñañono ko mechero jenda re, o pe oike vae reta pe omoembipe vaerä.

¹⁷ Oime yave mbae oñeomi vae, oyekuaa ñotai ko. Jaeramiño vi oime yave mbae oyekuaambae vae, oyekuaa ñotai ko.

¹⁸ Peyemongeta kavi peendugüe re. Echa güɨnoi vae pe oñemoïruta, ërei mbaetɨ güɨnoi vae güi, jókuae mbovɨ yae güɨnoi vae ave oñepɨ̈rota chugüi.”

Jesús ichɨ jare tɨvɨ reta

¹⁹ Jayave Jesús ichɨ jare tɨvɨ reta yogüeru oväe Jesús oïa pe. Ërei mbaetɨ ipuere oya reta jese jeta yae vae jeko pegua.

²⁰ Jare omombeu chupe vae: —Ndesɨ jare nderɨvɨ reta oka pe ñogüɨnoi. Oipota ndereecha reta.

²¹ Jayave Jesús jei chupe reta: —Kuae oyeapɨsaka Tumpa iñee re jare oyapo jae jeigüe vae reta ko jae chesɨ jare cherɨvɨ reta.

Jesús omokïrii ɨvɨtuai

²² Metei ara Jesús oyeupi barco raɨ pe jemimboe reta ndive. Jayave jei chupe reta: —Yaja ɨupa guasu jovaicho kotɨ. Jare opa yogüɨraja.

²³ Ërei yogüɨraja yogüɨreko ramboeve, Jesús oke. Jare ou ɨvɨtuai tätagüe, jare ɨ oñeñoña barco raɨ pe, ombosakambu pota ete ma.

²⁴ Jayave omomba reta Jesús, jare jei chupe: —¡Oporomboe vae, oporomboe vae! Ñamanota ma. Jayave Jesús opüa, jare oñeengata ɨvɨtu jare ɨguasu pe. Jare jupiveiño opɨta ɨvɨtu, jare opaete kïrii ngatu.

²⁵ Jare Jesús jei chupe reta: —¿Jama pa peporogüɨrovia? Jare jae reta okɨɨye jare ipɨakañɨ, jare jei oyoupe: —¿Mbae nunga kuimbae pa kuae? Ɨvɨtu jare ɨ ave oyapo jae jei vae.

Gadaraɨgua aña oya jese vae

²⁶ Jayave yogüɨraja oväe ɨguasu jovaicho pe, Gadaraɨgua reta iɨvɨ pe, Galilea jóvai.

²⁷ Jesús ogüeyɨ ma barco güi yave, ou oövaiti metei kuimbae jókuae tëta guasu pegua; ɨma ma aña reta oya jese vae. Nandi oiko. Mbaetɨ etei ma oiko tëta rupi. Tɨvɨa rupiño etei ma oiko.

²⁸ Kuae kuimbae oecha Jesús yave, osapúkai jare oyetavatɨka itindɨasɨ jóvai. Jayave iñeeäta reve jei: —¿Maera pa reyu cheve Jesús, Tumpa Tuichagüe yae vae Taɨ? Romoñera agüɨye eiporarauka cheve.

²⁹ Echa Jesús jei aña osɨrɨ vaerä kuimbae güi, echa ɨma ma yepe oyemboiya jese. Oipokua reta tëi karena pe yave, opa omondoo karena reta, jare aña güɨraja ñuu kotɨ.

³⁰ Jesús oparandu chupe: —¿Mbae pa nderee? Jae jei chupe: —¡Jeta vae! Echa jeta yepe aña oya jese.

³¹ Jayave aña reta omoñera Jesús agüɨye vaerä omondo ɨvɨkua guasu pe.

³² Jare joko pe jeta kuchi reta okaru ñogüɨnoi ɨvɨtɨ re. Aña reta omoñera Jesús omaeño vaerä oya vaerä kuchi reta re. Jayave Jesús omaeño jese reta.

³³ Jare aña reta oë kuimbae güi, jare yogüɨraja oya kuchi reta re. Jayave jókuae kuchi reta täta osɨi oa ɨ̈vɨa ɨvate vae güi ɨupa guasu pe, jare opa ipɨ̈tupa reta.

³⁴ Jayave kuchi iyangarekoa reta kuae oecha yave, opa otekuarai yogüɨraja omombeu tëta guasu pe jare ikatu rupigua reta pe.

³⁵ Jare oendu vae reta yogüeru omae jókuae oasagüe re; jare oecha reta Jesús jare jókuae kuimbae aña reta osɨrɨ chugüi vae oguapɨ oï jóvai; oecha oyemonde kavi ma jare yarakuaa kavi ma. Jare opaete yogüeru vae reta okɨɨye.

³⁶ Jare jókuae tenonde yave oecha vae reta omombeu ïru reta pe kërai okuera kuimbae aña reta oya jese vae.

³⁷ Jayave opaete Gadaraɨgua reta omoñera Jesús ojo ye vaerä jae reta iɨvɨ güi, echa okɨɨye yae reta. Jayave Jesús oyeupi ye barco raɨ pe, jare ojo ye.

³⁸ Jare kuimbae aña reta oya jese vae omoñera Jesús omaeño vaerä oiko jae ndive. Ërei Jesús omondo ye. Jare jei chupe:

³⁹ —Ekua nerëta pe jare emombeu mbae tuichagüe Tumpa oyapo ndeve vae. Jayave kuimbae ojo, jare omombeu opaete tëta guasu rupi mbae tuichagüe Jesús oyapo chupe vae.

Jairo tayɨ jare kuña Jesús jemimonde re opoko vae regua

⁴⁰ Jare Jesús ou ye oväe yave, jeta vae reta omboresive oyerovia reve. Echa oäro ñogüɨnoi.

⁴¹ Jayave ou metei kuimbae Jairo jee vae. Jae ko judío reta itupao re oyangareko vae. Jae oyetavatɨka Jesús jóvai, jare omoñera ojo vaerä jëta pe.

⁴² Echa jae güɨnoi tayɨ jae vaeño vae, doce año vae. Omano ma oï vae. Jare Jesús ojo ramboeve jupíe, jeta vae reta oyopɨpɨ yae.

⁴³ Jare jae reta ipɨte pe ojo metei kuña doce año ma oiporara tugüɨ guasu vae, jare opa ma ikorepoti oiporu iyeugüi oporopoano vae reta re. Ërei metei ave mbaetɨ ipuere ombogüera.

⁴⁴ Jae oya Jesús re ikupe kotɨ rupi jare opoko jemimonde jembeɨ re. Jare jupivei jugüɨ guasu opɨta chugüi.

⁴⁵ Jayave Jesús jei: —¿Kia pa cheremimonde re opoko? Opaete vae jei mbaetɨ ko oyavɨkɨ jemimonde. Jayave Pedro jare jae ndive ñogüɨnoi vae jei Jesús pe: —Oporomboe vae, jeta vae reta ndeopɨ ko ñogüɨnoi. ¿Maera pa reparandu, kia ra cheremimonde re opoko vae?

⁴⁶ Ërei Jesús jei: —Oime kia opoko cheremimonde re vae. Echa aikuaa chembaepuere oë chegüi vae.

⁴⁷ Jayave kuña oikuaa mbaetɨ ipuere oñemi Jesús güi yave, ou orɨrɨi reve jare oyetavatɨka jóvai. Jayave omombeu chupe opaete vae jovake maera opoko jemimonde re jare kërai jupivei okuera vae.

⁴⁸ Jayave Jesús jei chupe: —Cherayɨ, rekuera ma rerovia cheré ramo. Ekua ndepɨakatu reve.

⁴⁹ Jare Jesús imiari oï ramboeve, metei ou oväe tupao re oyangareko vae jëta güi. —Omano ma nderayɨ. Agüɨye mo emoambeko oporomboe vae.

⁵⁰ Ërei Jesús kuae oendu yave, jei tupao re oyangareko vae pe: —Agüɨye ndepɨatɨtɨ. Eporogüɨroviaño. Okuerata ko.

⁵¹ Jare ojo oväe yave tëta pe, Jesús omaeñoä ïru reta re oike vaerä jae ndive, jaeño Pedro, Jacobo jare Juan, jare kuñatai tu jare ichɨ.

⁵² Jare opaete joko pe ñogüɨnoi vae reta jäsémbai oyaeo ñogüɨnoi jese. Ërei Jesús jei chupe reta: —Agüɨye peyaeo. Omanoä ko. Okeño ko oï.

⁵³ Ërei jae reta oyóyai. Echa oikuaa reta omano ko.

⁵⁴ Jayave Jesús oipɨɨ kuñatai ipo pe, jare iñeeäta jei: —¡Kuñatai, epüa!

⁵⁵ Jayave kuñatai oikove ye, jare jupivei opüa. Jare Jesús oyókuai reta omongaru vaerä kuñatai.

⁵⁶ Jare kuñatai tu jare ichɨ ipɨakañɨ etei omae. Ërei Jesús oyókuai reta agüɨye vaerä omombeu kia pe ave mbae oyeapo vae.