San Lucas 5 - Biblia Guarani Tumpa Iñee

Yeporaka oporomopɨakañɨ vae

¹ Jare metei ara Jesús oï ramboeve ɨupa guasu Genesaret jee vae jembeɨ pe, jeta vae yatɨ jese oyeapɨsaka vaerä Tumpa iñee re.

² Jare Jesús oecha mókoi barco raɨ jókuae ɨupa guasu jembeɨ pe. Iya oyeporaka vae reta ogüeyɨ oyoe ipɨsa ñogüɨnoi.

³ Jare Jesús oyeupi metei pe, jare jei Simón pe güɨroike vaerä ɨembeɨ güi kutɨ katu. Echa Simón imbae ko jókuae barco raɨ. Jayave Jesús oguapɨ barco raɨ pe jare joko güi omboe jeta vae reta.

⁴ Jare opa ma imiari yave, Jesús jei Simón pe: —Eraja ndebarco raɨ ɨ tɨpɨa kotɨ, javoi emombo pepɨsa reta peipɨɨ vaerä jevae.

⁵ Jayave Simón jei Jesús pe: —Oporomboe vae, oreköe ma roparavɨkɨ tëi, mbaetɨ etei romboa metei ave. Ërei taitɨ pɨsa nde rere cheve ramo.

⁶ Jare jökorai oyapo reta ma yave, jeta yae jevae omboa reta ramo ipɨsa omondoro.

⁷ Jayave oyepoeru reta ïru barco pe ñogüɨnoi vae reta pe, yogüeru vaerä omborɨ. Jayave jae reta yogüeru jare omotɨnɨe reta mókoi reve barco. Jare mókoi reve poɨ yae jare güɨrosakambu potaecha.

⁸ Jare Simón Pedro kuae oecha yave, oyetavatɨka Jesús jóvai jare jei chupe: —Esɨrɨ chegüi, cheYa. Echa che ko jae metei kuimbae iyoa vae.

⁹ Echa Pedro jare opaete jae ndive ñogüɨnoi vae reta okɨɨye yae reta, jeta yae jevae oipɨɨ ramo.

¹⁰ Jaeramiño vi Simón ïru reta Jacobo jare Juan, jae ko Zebedeo taɨ reta. Jayave Jesús jei Simón pe: —Agüɨye ekɨɨye. Añave güive reikota ïru vae reta re reyeporaka vaerä.

¹¹ Jayave jae reta güeru ibarco reta ɨ jembeɨ pe. Joko pe opa oeya reta, yogüɨraja vaerä Jesús jupíe.

Jesús ombogüera kuimbae ipire mbaerasɨ ókui vae

¹² Jesús oï metei tëta guasu pe yave, joko pe oï metei kuimbae ipire mbaerasɨ ókui vae. Jókuae kuimbae oecha Jesús yave, oyetavatɨka itindɨasɨ ɨvɨ re, jare omoñera reve jei: —CheYa, reipota yave chembogüera.

¹³ Jayave Jesús opoko jese jei reve: —¡Aipota! ¡Ekuera! Jare jupiveiño okuera imbaerasɨ güi.

¹⁴ Jayave Jesús jei chupe: —Agüɨye emombeu kia pe ave. Ekua eyeechauka sacerdote pe, jare emee mbota yetɨo pegua Moisés peokuai rami, jae reta oikuaa vaerä rekuera ma ko vae.

¹⁵ Ërei jeieteño jërakua Jesús oyapo vae regua. Jayave jeta vae oyemboatɨ jae oïa pe oyeapɨsaka vaerä jese jare jae ombogüera vaerä imbaerasɨ reta güi.

¹⁶ Ërei Jesús ojo chugüi reta kïrii ngatúa kotɨ oyerure vaerä Tumpa pe.

Jesús ombogüera kuimbae jete jëogüe vae

¹⁷ Metei ara Jesús oporomboe oï, jare amogüe fariseo reta jare mborookuai re oporomboe vae reta oguapɨ ñogüɨnoi jokoropi. Jae reta yogüeru opaete tëta raɨ reta Galilea pegua güi, Judea pegua güi jare Jerusalén güi. Jesús güɨnoi yandeYa imbaepuere oporombogüera vaerä.

¹⁸ Jayave amogüe reta güeru metei kuimbae jete jëogüe imbaerasɨ vae jupa pe. Oipota tëi güɨroike o japɨpe Jesús jóvai.

¹⁹ Ërei ipuereä güɨroike jeta yae vae ramo. Jáeramo güɨroyeupi o iárambo jare oipea chupe Jesús oïa re katu. Jokoropi ombogüeyɨ reta imbaerasɨ vae jupa reve Jesús jóvai.

²⁰ Jesús oecha jae reta iporogüɨrovia yave, jei jókuae kuimbae jete jëogüe vae pe: —Kuimbae, ndeyoa reta oyemboai ma.

²¹ Jayave mborookuai re oporomboe vae reta jare fariseo reta ipɨa pe oyemongeta körai: “¿Kia pa ko jei vaerä ikavimbae yae vae Tumpa kotɨ? Tumpaño ko ipuere iñɨ̈ro mbaeyoa reta re.”

²² Ërei Jesús oikuaa jae reta iyemongeta ramo, jei chupe reta: —¿Maera pa pepɨa pe peyemongeta jökorai?

²³ ¿Mbae pa yavaiä jae vaerä: “Ndeyoa reta oyemboai ma”, ani “epüa eguata”?

²⁴ Ërei peikuaa vaerä che Kuimbaerä ayeapo vae chepuere ko cheɨ̈ro mbaeyoa reta re kuae ɨvɨ pe. Jayave jei kuimbae jete jëogüe vae pe: —Che jae ndeve: Epüa evoɨ nderupa, jare ekua nerëta pe.

²⁵ Jayave jupivei kuimbae opüa jeta vae jovake, ovoɨ jupa jare ojo jëta kotɨ, omboete reve Tumpa.

²⁶ Jaeramiño vi opaete joko pe ñogüɨnoi vae reta omboete Tumpa. Echa opareve ipɨakañɨ yae jare okɨɨye reta reve jei: —Mɨakañɨ ko yaecha kuae ara.

Jesús oenɨi Leví

²⁷ Jayave Jesús oë yave oecha mburuvicha peguarä okovara vae Leví jee vae oguapɨ oï jae reta okovaraa pe, jare jei chupe: —Eyu cherupíe.

²⁸ Jayave Leví opüa ojo jae jupíe. Joko pe oeya opaete imbaembae.

²⁹ Jare Leví oyapo arete tuicha jae jëta pe Jesús peguarä. Jare joko pe jeta mburuvicha peguarä okovara vae reta jare ïru vae reta okaru ñogüɨnoi Jesús jare ïru reta ndive.

³⁰ Ërei mborookuai re oporomboe vae reta jare fariseo reta iñeenguru Jesús jemimboe reta pe. Jei reta: —¿Maera pa pekaru mburuvicha peguarä okovara vae reta jare jeko ikavimbae vae reta ndive?

³¹ Jayave Jesús jei chupe reta: —Oikove katu vae reta mbaetɨ oeka oporopoano vae. Imbaerasɨ vae retaño oeka.

³² Mbaetɨ ko ayu aeka vaerä jupi vae reta. Ayu ko aeka iyoa vae reta, oeya vaerä iyemongeta ikavimbae vae ipɨa pe güɨnoi vae.

Yekuaku tembíu güi vae regua

³³ Jayave jae reta jei Jesús pe: —¿Maera pa Juan jemimboe reta oyekuaku avei tembíu güi oyerure reve Tumpa pe. Jaeramiño vi fariseo reta jemimboe reta. Ërei nderemimboe reta mbaetɨ oyekuaku?

³⁴ Jayave Jesús jei chupe reta: —Mendaa pe ñogüɨnoi vae reta ¿oyekuaku ra tembíu güi, omenda vae jae reta ndive oï ramboeve?

³⁵ Ërei outa oväe ara omenda vae oyererajauka vaerä chugüi reta. Jayave ramo oyekuakuta tembíu güi.

³⁶ Jayave imiari chupe reta ombojaanga reve. —Mbaetɨi kia oyasɨa temimonde ipɨau vae omboya vaerä pɨpe temimonde indechigüe. Echa jökorai yave, ñarokomeguaiño ma ko temimonde ipɨau vae jare indechi vae.

³⁷ Jaeramiño vi mbaetɨi ikavi yamboɨru vaerä vino ipɨau vae, vino jɨru mɨmbapire pegua indechi vae pe. Echa jökorai yave, omondorota jare vino oyepɨyereta, jare jókuae jɨru opa osoro.

³⁸ Jáeramo yamboɨru vino ipɨau vae jɨru ipɨau vae pe. Echa jökorai yayapo yave, vino jɨru mbaetɨ osoro jare vino mbaetɨ oyepɨyere.

³⁹ Jare vino indechi vae jou vae, ngaraa jupiveiño oyúe vino ipɨau vae. Echa jae jei: “Vino indechi vae ikavi yae vino ipɨau vae güi.”