San Lucas 24 - Biblia Guarani Tumpa Iñee

Jesús oikove ye

¹ Jare ndeimboveasɨ tenondegua ara semana iyɨpɨ pe, kuña reta yogüɨraja ye tɨvɨa kotɨ. Güɨraja reta mbae ikäti kavi vae oyapokavigüe, yogüɨraja vi jupíe amogüe kuña reta.

² Jare oecha reta ita tuicha vae oyembosɨrɨ oï tɨvɨa jöke güi.

³ Oike reta tɨvɨa pe yave, mbaetɨ oväe yandeYa Jesús jetegüe joko pe.

⁴ Ipɨakañɨ yae reta kuae re ramboeve, ko oyemboɨ jae reta iyɨpɨ pe mókoi kuimbae jemimonde jembipeasɨ vae.

⁵ Jare okɨɨye güi itindɨasɨ reta jóvai. Jayave jókuae kuimbae reta jei chupe reta: —¿Maera pa peeka omanogüe reta ipɨte pe, oikove vae?

⁶ Mbaetɨ ma kuae pe oï. Oikove ye ma ko. Pemaendúa jae oiko pe ndive Galilea pe yave jei peve vae re,

⁷ echa jei: “Che kuimbaerä oyapo vae chemeeta iyoa vae reta ipo pe vae jare chekutu retata kurusu re. Ërei aikove yeta mboapɨ ara rupi.”

⁸ Jayave jae reta imaendúa Jesús iñee re,

⁹ jare yogüeru ye tɨvɨa güi omombeu jókuae onse vae pe jare opaete ïru reta pe, jókuae mbaembae re.

¹⁰ Jókuae kuña reta ko jae: María Magdalaɨgua, Juana, Jacobo ichɨ María jee vae, jare ïru kuña reta yogüɨraja jupíe reta vae. Kuae reta omombeu Jesús jemimondo reta pe mbae oasa vae.

¹¹ Ërei Jesús jemimondo reta pe añeteäecha. Mbaetɨ güɨrovia reta.

¹² Jayave Pedro osɨi ojo tɨvɨa kotɨ. Omae yave tɨvɨa japɨpe kotɨ oecha nieso retaño joko pe oï. Jayave ou ye tëta pe ipɨakañɨ yae reve jókuae oasa vae re.

Jesús oyekuaa jemimboe reta pe tape ojo Emaús kotɨ vae rupi

¹³ Jare jókuae ara etei mókoi Jesús jemimboe reta yogüɨraja tëta raɨ Emaús kotɨ. Emaús oï onse kilómetro Jerusalén güi.

¹⁴ Imiari yogüɨraja yogüɨreko opaete jókuae mbaembae oasa vae re.

¹⁵ Imiari jare oyoaka yogüɨraja ramboeve, Jesús etei oya jese reta jare ojo jae reta ndive.

¹⁶ Ërei jae reta mbaetɨ oikuaa Jesús. Echa oñeomi chugüi reta agüɨye vaerä oikuaa.

¹⁷ Jayave Jesús oparandu chupe reta: —¿Mbae re pa pemiari peo peiko oyoupe? ¿Maera pa pepɨatɨtɨ?

¹⁸ Jare metei Cleofas jee vae jei chupe: —¿Nde ñoete pa jae oguatagüe mbaetɨ reikuaa mbae oasa Jerusalén pe kuae ara reta rupi vae?

¹⁹ Jayave jae jei chupe reta: —¿Mbae pa? Jare jae reta jei chupe: —Jesús Nazaret-ɨgua pe oyeapo vae. Jae ko metei ñeemombeúa, imbaepuere yae mbae oyapo vaerä jare ñee pe Tumpa jóvai jare opaete vae reta jóvai.

²⁰ Ërei kërai sacerdote reta itenondegua reta jare oreruvicha reta omboeterenga oyeyukauka vaerä. Jare oikutu reta kurusu re.

²¹ Ore rogüɨrovia jae ko oepɨta tëi Israel vae. Jare añave ko mboapɨ ara ma opaete kuae oasa güire.

²² Ërei amogüe kuña orepɨte pegua oremopɨakañɨ; yogüɨraja reta köe pota yave tɨvɨa pe.

²³ Jare mbaetɨ oväe Jesús jetegüe, jare yogüeru ye yave, jei vi oreve oecha reta araɨgua reta joko pe, jare jókuae araɨgua reta jei Jesús oikove ye.

²⁴ Jayave amogüe orepɨte güi yogüɨraja vi tɨvɨa pe, jare oecha reta kuña reta jei rami etei. Ërei mbaetɨ oecha reta Jesús.

²⁵ Jayave Jesús jei chupe reta: —¡Yarakuaambae reta! Mbegüe rupi yae perovia opaete ñeemombeúa reta jei vae.

²⁶ ¿Mbaetɨ yera peikuaa Cristo oiporara tai ko opaete kuae mbaembae ndei oyemboeteuka mbove?

²⁷ Jayave Jesús omboɨpɨ omombeu kavi chupe reta Moisés jembikuatía reta güive jare opaete ñeemombeúa reta oikuatiagüe, kërai opaete jókuae Tumpa Iñee imiari jese vae.

²⁸ Jare ojo oväe reta tëta raɨ yogüɨrajaa pe yave, Jesús oasata ojo rami oyeapo chupe reta.

²⁹ Ërei jae reta oyopia jei reve chupe: —Epɨta ore ndive. Echa kaaru ma. Pɨ̈tu ma ko oï. Jayave Jesús opɨta jae reta ndive.

³⁰ Jare oguapɨ ma mesa pe okaru vaerä yave, Jesús oipɨɨ mbɨyape jare omee yasoropai jese Tumpa pe, opɨ̈saa jare omee chupe reta.

³¹ Jayave ramo oyepea jesa reta jare ipuere oikuaa reta Jesús. Ërei jae okañɨ chugüi reta.

³² Jayave jei reta oyoupe: —Jáeramo yepe imiari ou oiko yandeve tape rupi yave yandembopɨa-kërai etei, omombeu kavi yandeve Tumpa Iñee re yave.

³³ Jayave jókuae ora voi jae reta opüa ye yogüeru Jerusalén pe. Jare oväe jókuae onse vae yatɨ ñogüɨnoi ïru vae reta ndive,

³⁴ jare jei reta jókuae yogüeru vae reta pe: —Añete ete yepe yandeYa oikove ye, echa oyekuaa Simón pe.

³⁵ Jayave jókuae mókoi vae reta omombeu yatɨ vae reta pe tape rupi oasa jae reta ndive vae, jare kërai Jesús oyekuaauka chupe reta mbɨyape opɨ̈saa yave.

Jesús oyekuaa jemimboe reta pe

³⁶ Jare imiari vɨteri ñogüɨnoi ramboeve jókuae mbaembae re, Jesús oyemboɨ mbɨte pe, jare jei chupe reta: —Mbɨakatu toï pe ndive.

³⁷ Jayave jae reta okɨɨye yae, oyemongeta reta oecha ko Jesús iägüe.

³⁸ Ërei jae jei chupe reta: —¿Maera pa pekɨɨye? ¿Maera pa jökorai peyemongeta?

³⁹ Pemae chepo jare chepɨ re. Che ko. Pepuere cheavɨkɨ peikuaa vaerä jae ko che. Echa kia iägüe mbaetɨ isoo jare ikägüe, peecha che anoi rami.

⁴⁰ Jare jókuae jei yave, oechauka chupe reta ipo jare ipɨ.

⁴¹ Jae reta ipɨakañɨ, jare oyerovia yae güi mbaetɨño güɨrovia ramo, Jesús oparandu chupe reta: —¿Oime pa penoi kuae pe mbae yau vaerä?

⁴² Jayave omee reta chupe jevae oyeapegüe oñepɨ̈saagüe jare metei ipe ei.

⁴³ Jesús oipɨɨ jare jou jae reta jovake.

⁴⁴ Jayave jei chupe reta: —¿Mbaetɨ pa pemaendúa pe reta ndive aiko ramboeve che jae peve vae re? Kërai oyembopo tai ko cheré Moisés iporookuai, ñeemombeúa reta oikuatiagüe jare Salmo reta pe jei vae.

⁴⁵ Jayave oyepea chupe reta, oikuaa kavi vaerä Tumpa Iñee oyekuatía oï vae.

⁴⁶ Jare jei chupe reta: —Körai oyekuatía oï, kërai Cristo oiporara ñotai ko jare oikove yeta ko omanogüe reta ipɨte güi mboapɨ araa pe,

⁴⁷ jare kërai oñemoërakuata jee re Jerusalén güive opaete tëtaguasu rupi oeya vaerä iyemongeta ikavimbae vae ipɨa pe güɨnoi vae jare Tumpa iñɨ̈ro vaerä chupe reta iyoa reta re.

⁴⁸ Jare pe reta ko pemombeuta opaete kuae regua.

⁴⁹ Mase, che ambouta peve cheRu güɨrökuavee peve vae. Ërei pepɨta tëta guasu Jerusalén pe ou regua peré mbaepuere ara güi.

Jesús ojo ara pe

⁵⁰ Jayave Jesús güɨraja reta Betania pe. Jayave oupi ipo ara kotɨ jare jei ñee kavi ikotɨ reta.

⁵¹ Jare jei ñee kavi ikotɨ reta ramboeve, oeya jare oyereraja chugüi reta ara kotɨ.

⁵² Jayave jae reta omboete güire, oyerova ye Jerusalén kotɨ oyerovia yae reve.

⁵³ Jare ñogüɨnoi avei tupao pe omboete reve Tumpa. Amén.