San Lucas 23 - Biblia Guarani Tumpa Iñee

Güɨraja reta Jesús Pilato jóvai

¹ Jayave opaete vae opüa jare güɨraja reta Jesús Pilato jóvai.

² Jare omboɨpɨ reta omboeko Jesús, jei reve: —Kuae kuimbae re roväe, güɨrokomegua tëta guasu pegua reta ipɨa, oyopia agüɨye vaerä oyemboepɨ César okovara vae, jare jei jae ko mburuvicha guasu Cristo jee vae.

³ Jayave Pilato oparandu Jesús pe: —¿Nde pa ko jae judío reta juvicha guasu? Jesús jei chupe: —Rere ma ko.

⁴ Jayave Pilato jei sacerdote reta itenondegua reta jare tëta guasu pegua reta pe: —Mbaetɨ etei aväe teko kuae kuimbae re.

⁵ Jayave jae reta jeiete jei: —Omboemboe tëta guasu pegua reta. Oporomboe opaete Judea rupi. Omboɨpɨ Galilea pe jare añave ou oväe kuae pe.

Güɨraja reta Jesús Herodes jóvai

⁶ Pilato oendu yave jei reta Galilea, oparandu Galileaɨgua ra jókuae kuimbae vae.

⁷ Jare oikuaa mburuvicha guasu Herodes iɨvɨ pegua ko yave, omondo Herodes pe. Echa Herodes jókuae ara reta pe oime oï Jerusalén pe.

⁸ Jare Herodes oecha Jesús yave, oyerovia yae, echa ɨma ma ikɨ̈reɨ oecha. Echa oendu ma jeta Jesús regua, jare oipota oecha Jesús oyapo metei mɨakañɨ.

⁹ Jayave Herodes oparandu Jesús pe jeta mbaembae re, ërei Jesús mbaetɨ etei jei mbae ave chupe.

¹⁰ Jare sacerdote reta itenondegua reta jare mborookuai re oporomboe vae reta oyemboɨ Herodes jóvai jare iñeeäta reve omboeko Jesús.

¹¹ Jayave Herodes jare isundaro reta oyuvanga jare oyóyai reta Jesús. Jayave omondeuka chupe temimonde ipöra vae. Javoi güɨrajauka ye Pilato pe.

¹² Jare jókuae ara etei Pilato jare Herodes oñomoïru ye. Echa tenonde yave oñomotareɨ.

Pilato omboeterenga Jesús omano vaerä

¹³ Jayave Pilato omboatɨuka sacerdote reta itenondegua reta, mburuvicha reta jare tëta guasu pegua reta.

¹⁴ Jare jei chupe reta: —Pe reta peru kuae kuimbae cheve jare pere cheve omboemboe tëta guasu pegua reta. Aparandu chupe jókuae re perovake, ërei mbaetɨ etei aväe teko kuae kuimbae pemboeko jese vae re.

¹⁵ Herodes ave mbaetɨ vi oväe teko kuae kuimbae re. Echa ombou ye yandeve. Mase, mbaetɨ teko güɨnoi omano vaerä.

¹⁶ Jáeramo ayorata opa ainupauka güire.

¹⁷ Echa oyora tai ko chupe reta metei tembipɨɨ arete Pascua pe.

¹⁸ Jayave opaete vae osapúkai reve jei reta metei rami: —¡Eyukauka kuae kuimbae! ¡Eyorauka oreve Barrabás!

¹⁹ (Echa Barrabás oñoña reta tembipɨɨrɨru pe oñemopüa Jerusalén pe mburuvicha reta re jeko pegua jare oporoyuka ramo.)

²⁰ Ërei Pilato oipota tëi oyorauka Jesús. Jáeramo jei ye tëi chupe reta.

²¹ Ërei osapúkai reve jei reta ye: —¡Eikutuuka kurusu re! ¡Eikutuuka kurusu re!

²² Jayave Pilato oparandu ye mboapɨa ma chupe reta: —¿Mbae ikavimbae pa oyapo kuae kuimbae? Mbaetɨ aväe teko jese omano vaerä. Jáeramo ainupaukaiñota jare ayorata.

²³ Ërei jeieteño täta osapúkai reve jei reta oikutuuka vaerä kurusu re. Jare jae reta iñee jare sacerdote reta itenondegua reta iñee omoamɨri Pilato.

²⁴ Jayave Pilato jei oyeapo vaerä Jesús pe jae reta oipota vae;

²⁵ oyorauka chupe reta jae reta oiporu vae, jókuae oñemopüa mburuvicha re jare oporoyuka ramo tembipɨɨrɨru pe oñoña reta vae. Jare omboeterenga Jesús jae reta ipo pe.

Jesús oyekutu kurusu re

²⁶ Jare güɨraja reta Jesús joko güi yave, metei kuimbae Simón jee vae Cirene pegua, ou iko kotɨ güi. Oñono reta iyatiɨ re Jesús ikurusu güɨraja vaerä jaɨkue.

²⁷ Yogüɨraja vi Jesús jaɨkue jeta vae. Jare kuña reta oäpiro jare jäsémbai jese vae.

²⁸ Ërei Jesús oyerova omae jese reta jare jei chupe reta: —Jerusalén pegua kuña reta, agüɨye cheräpiro. Peñeäpiro pe aeño jare peäpiro pemembɨ reta.

²⁹ Mase, outa oväe ara reta jei reta vaerä: “Oyerovia ko jókuae imembɨmbae vae reta, jókuae oporombokambumbae vae reta.”

³⁰ Jayave omboɨpɨta jei ɨvɨtɨ guasu reta pe vae: “¡Pesururu oreré! ¡Oreasoi!”

³¹ Ɨvɨra jokɨgüe pe oyapo reta opaete kuae mbaembae yave, ¿mbae ra oyapota ɨvɨra yɨpigüe pe?

³² Jare sundaro reta güɨraja vi Jesús ndive mókoi kuimbae ikavimbae vae iyapoa reta.

³³ Jare yogüɨraja oväe Äkagüe-renda jee vae pe. Joko pe sundaro reta oikutu kurusu re Jesús jare kuimbae reta ikavimbae vae iyapoa reta. Oñono reta metei Jesús iyakatu kotɨ jare ïru iyasu kotɨ.

³⁴ Jayave Jesús jei: —¡CheRu, neɨ̈ro chupe reta. Echa mbaetɨ oikuaa reta oyapo ñogüɨnoi vae! Jayave sundaro reta omboyao oyoupe Jesús jemimondegüe, oyombosuerte reta jese.

³⁵ Jare opaete vae reta omae ñogüɨnoi Jesús re. Jare tëta guasu pegua reta itenondegua reta ave oyóyai Jesús, jei reve: —Jae oepɨ ïru vae reta. Toyeepɨ vi, jae ko Cristo, Tumpa jembiparavo yave.

³⁶ Jare sundaro reta oyapo vi ikavimbae chupe. Oya reta jese jare omee vinagre chupe,

³⁷ jei reve: —Nde ko jae judío reta Juvicha guasu yave, eyeepɨ.

³⁸ Jare oï metei kuatía iñäka iárambo, griego, latín jare hebreo reta iñee pe: “KUAE KO JAE JUDÍO RETA JUVICHA GUASU.”

³⁹ Jare metei kuimbae ikavimbae iyapoa kurusu re oï vae jei ikavimbae vae Jesús pe: —Nde ko jae Cristo yave, eyeepɨ jare orereepɨ vi.

⁴⁰ Ërei jókuae ïru kuimbae oñeengata chupe: —¿Rekɨɨyeä pa Tumpa güi? Echa nde vi remano reï jökorai.

⁴¹ Jupi ko yande ñamano vaerä. Echa yande ñamanota ñaï ikavimbae vae yayapo jeko pegua. Ërei kuae kuimbae mbaetɨ etei oyapo mbae ikavimbae.

⁴² Jayave jei Jesús pe: —Ndemaendúa cheré ndeporookuaía pe reï yave.

⁴³ Jayave Jesús jei chupe: —Añete che jae ndeve, kuae ara reïta che ndive ara pe.

Jesús omano

⁴⁴ Jare kuaraɨ ara mbɨte güive mboapɨ ora rupi oyembopɨtumimbi opaete ɨvɨ pe.

⁴⁵ Kuaraɨ oyembopɨtumimbi jare asoya tupao imboyaoa osoro mbɨte rupi.

⁴⁶ Jayave Jesús täta osapúkai, jei: —CheRu, añono cherekove ndepo pe. Jare kuae jei ma yave, omano.

⁴⁷ Jare cien sundaro vae juvicha joko pe oï vae oecha kuae oasa yave omboete Tumpa, jei reve: —Añetete yepe, kuae kuimbae jae jupi vae.

⁴⁸ Jare opaete joko pe ñogüɨnoi vae, oecha yave jókuae oasa vae, okua reta ipɨtía re oyemboeko güi. Jayave opaete vae yogüɨraja ye jëta jëta ae pe.

⁴⁹ Jare opaete Jesús oikuaa vae reta jare opaete kuña reta yogüeru jupíe Galilea güi vae, mombɨrɨ güiño omae ñogüɨnoi mbae oasa vae re.

José oñono Jesús jetegüe tɨvɨa pe

⁵⁰ Jare joko pe oï vi metei kuimbae José jee vae, tëta guasu Arimatea, ɨvɨ Judea pegua. Jae ko metei mburuvicha. Ipɨakavi jare jupi vae.

⁵¹ (Jae oipotaä tëi ïru mburuvicha reta oyapo vaerä ikavimbae vae Jesús pe.) Jae oäro vi oiko Tumpa iporookuaía.

⁵² Kuae kuimbae ojo Pilato oïa pe, oyerure chupe Jesús jetegüe re.

⁵³ Jayave ombogüeyɨ Jesús jetegüe, jare oñoma nieso pe. Jayave oñono metei tɨvɨa ɨ̈vavira oyeyoo vae pe, ndei kia oñeñono pɨpe vae pe.

⁵⁴ Jókuae ara opaete judío reta oyeapokatu ñogüɨnoi pɨareve peguarä. Echa pɨareve pe ko ara mbutuu.

⁵⁵ Jare kuña reta Jesús jupíe yogüeru Galilea güi vae reta, yogüɨraja José jaɨkue jare oecha reta tɨvɨa jare kërai José oñono pɨpe Jesús jetegüe vae.

⁵⁶ Jare yogüɨraja reta tëta pe, oyapokavi reta ikäti kavi vae. Jayave oputuu reta ara mbutuu pe, mborookuai jei rami.