San Lucas 22 - Biblia Guarani Tumpa Iñee

Oyomboemboe reta oyuka vaerä Jesús

¹ Jare arete Pascua oyearo ma oï. Jókuae ara pe judío reta jou mbɨyape oyembovumbae.

² Jayave sacerdote reta itenondegua reta jare mborookuai re oporomboe vae reta oeka kërai oyuka vaerä Jesús. Ërei okɨɨye opaete vae reta güi.

³ Jayave Satanás oya Judas Iscariote re, jae ko doce vae reta güi metei.

⁴ Jayave Judas ojo sacerdote reta itenondegua reta jare tupao iyangarekoa reta itenondegua ndive imiari jae reta ndive kërai omee vaerä Jesús chupe reta.

⁵ Jayave jae reta oyerovia, jare jei reta Judas pe omeeta ko chupe korepoti.

⁶ Jayave Judas oñererökuavee omee vaerä Jesús chupe reta. Jare oeka kërai omee chupe reta vaerä opaete vae reta oikuaambae reve.

Jesús oyapo Santa Cena jemimboe reta ndive

⁷ Jare ou oväe arete oyeu vaerä mbɨyape oyembovumbae; jókuae arete pe oyeyukañoi vecha kuimbae taɨrusu vae Pascua pegua.

⁸ Jayave Jesús jei Pedro jare Juan pe: —Pekua peyapo kavi yau vaerä vecha kuimbae taɨrusu vae isoo Pascua pegua.

⁹ Jayave jei reta chupe: —¿Kia pe pa reipota royapo kavi?

¹⁰ —Mase, peo peväe yave tëta guasu pe, peövaitita metei kuimbae ɨ güɨraja ɨru pe vae. Pekua jaɨkue o pe oike regua.

¹¹ Jayave pere jókuae o iya pe: “Oporomboe vae jei ndeve: ‘¿Kia pe pa oime oï o, joko pe jau vaerä vecha kuimbae taɨrusu vae isoo Pascua pegua cheremimboe reta ndive?’ ”

¹² Jayave o iya oechaukata peve metei cuarto tuicha vae joɨvate pe, oï kavi ma vae. Joko pe peyapo kavi yandeve.

¹³ Jayave yogüɨraja reta, jare oväe Jesús jei chupe reta rami. Jare oyapo kavi reta vecha kuimbae taɨrusu vae isoo Pascua pegua jou reta vaerä.

¹⁴ Jare oväe ma ora yave, Jesús oguapɨ mesa pe jókuae jemimondo reta ndive.

¹⁵ Jayave jei chupe reta: —Chekɨ̈reɨ yae ko jau vecha kuimbae taɨrusu vae isoo Pascua pegua pe reta ndive, ndei amano mbove.

¹⁶ Che jae peve, ngaraa ye jau, oyembopo regua Tumpa iporookuaía pe.

¹⁷ Jayave Jesús oipɨɨ kopa, jare omee yasoropai Tumpa pe jese, jare jei: —Peu kuae vino opaete pe reta.

¹⁸ Che jae peve, ngaraa ye ma jau uva tɨgüegüe, Tumpa iporookuaía ou ye regua.

¹⁹ Javoi Jesús oipɨɨ mbɨyape, jare omee yasoropai Tumpa pe jese. Jare opɨ̈saa mbɨyape omee chupe reta, jei reve: —Kuae ko jae cherete, oñemeeta peré vae. Peyapo kuae pemaendúa cheré vaerä.

²⁰ Jaeramiño vi oipɨɨ kopa, opa ma okaru reta yave, jei reve: —Kuae vino ko jae morogüɨrökuavee päve ipɨau vae cherugüɨ rupi oyeapota vae. Oyepɨyereta peré vae.

²¹ Ërei yandepɨte pe oguapɨ oï cherovaicho reta pe chemeeta vae.

²² Añete ko, che Kuimbaerä ayeapo vae pe oyeapo ñotai ko Tumpa jei oyeapota cheve vae. Ërei, ¡paravete jókuae kuimbae chemboeterengata vae!

²³ Jayave jemimboe reta omboɨpɨ oyoaka oyoupii, kia ra chugüi reta oyapota jókuae.

¿Kia pa jae tenondegua?

²⁴ Jare Jesús jemimboe reta omboɨpɨ oyoaka oyoupii kia ra chugüi reta tenondeguarä

²⁵ Ërei Jesús jei chupe reta: “Mburuvicha guasu reta güɨnoi mbaepuere jëtaguasu reta re. Jare opaete vae reta ombotuicha.

²⁶ Ërei pe reta ndive mbaetɨta jökorai. Pepɨte pe tuichagüe vae, toyeapo taɨkuegua rami, jare tenondegua vae, toyeapo metei tembiokuai rami.

²⁷ Echa mesa pe oguapɨ okaru vaerä vae ko tenondegua tembíu güeru vae güi. Ërei che aï pepɨte pe ayeokuai peve vaerä.

²⁸ Pe reta peiko che ndive opaete kuae aiporara ramboeve.

²⁹ Jáeramo che poñono ma peiko vaerä Tumpa iporookuaía pe, cheRu cheñono rami.

³⁰ Pekaru vaerä chemesa pe cheporookuaía pe. Jaeramiño vi penoita mbaepuere pejäa vaerä jókuae doce ñemuña Israel pegua reta.”

Pedro oikuakuta Jesús

³¹ YandeYa jei Simón pe: —Simón, Simón, mase, Satanás oyerure ma peré, pemboyao vaerä trigo oyembogua rami.

³² Ërei che ayerure ma nderé, agüɨye vaerä oata ndeporogüɨrovia. Jare reyerova ye yave, emborɨ nderɨvɨ reta ipɨ̈rata vaerä iporogüɨrovia pe.

³³ Jayave Pedro jei Jesús pe: —CheYa, ajata ko nde ndive, mbaetɨta tembipɨɨrɨru peño, tamano vi nde ndive.

³⁴ Jayave yandeYa jei chupe: —Che jae ndeve Pedro, ndei takareo oñee mbove, mboapɨ vese ma chekuakuta mbaetɨ ko chekuaa vae.

Mbaembae oyereraja vae regua

³⁵ Jayave Jesús jei jemimboe reta pe: —Che pomondo yave, pekorepotimbae, peaporokambae jare pepɨapaambae, ¿oata pa mbae peve? Jae reta jei: —Mbaetɨ.

³⁶ Jayave Jesús jei ye chupe reta: —Ërei añave: Korepotirɨru güɨnoi vae togüɨraja, jare aporoka vi. Jare mbaetɨ güɨnoi kɨsepuku vae, tomee jemimonde, ogua vaerä metei kɨsepuku.

³⁷ Echa che jae peve, oyeapotai ko cheve Tumpa Iñee pe oyekuatía oï cheré vae. Echa jei körai: “Oyepapa iyoa vae reta ndive.” Echa oyekuatía oï cheregua vae, oyembopota ko.

³⁸ Jayave jae reta jei chupe: —Mase, oreYa, oime rogüɨnoi mókoi kɨsepuku. Jare jae jei: —Ikaviño ma ko.

Jesús oyerure Getsemaní pe

³⁹ Jayave Jesús oë ojo ɨvɨtɨ Olivo pe, ojoñoi rami. Jare jemimboe reta vi yogüɨraja jae ndive.

⁴⁰ Jare ojo oväe joko pe yave jei jemimboe reta pe: —Peyerure Tumpa pe agüɨye vaerä peyoa.

⁴¹ Jayave Jesús osɨrɨ katu chugüi reta, ita oyemombo vae oa ojo ramía pe, jare oyetavatɨka oyerure Tumpa pe.

⁴² Jei reve: “CheRu, nde reipota yave, emboasa chegüi kuae aiporarata vae. Ërei toyeapo cheve nde rere vae. Agüɨye toyeapo che jae vae.”

⁴³ Jayave oyekuaa Jesús pe metei araɨgua omomɨ̈rata vaerä.

⁴⁴ Jesús oiporara yae oï, jare jeiete oyerure Tumpa pe. Jɨai oa ɨvɨ re tugüɨ tuicha otɨkɨ rami.

⁴⁵ Jare opa oyerure güire, opüa jare ou ye jemimboe reta ñogüɨnoia pe yave, oecha oke ñogüɨnoi ipɨatɨtɨ güi.

⁴⁶ Jayave Jesús jei chupe reta: —¿Maera pa peke peï? Pepüa peyerure Tumpa pe, agüɨye vaerä peyoa.

Oipɨɨ reta Jesús

⁴⁷ Jare imiari vɨteri oï ramboeve, oyekuaa jeta vae. Jare Judas, doce vae güi metei vae ou jókuae jeta vae jenonde. Ou oväe Jesús oïa pe yave, oovapɨte.

⁴⁸ Jayave Jesús jei chupe: —Judas, ¿metei yeovapɨte rupi pa che Kuimbaerä ayeapo vae chemee kuae reta pe?

⁴⁹ Jare jemimboe reta ñogüɨnoi jae ndive vae, oecha mbae oyeapota chupe vae ramo, jei Jesús pe: —OreYa, ¿roiporuta pa kɨsepuku jese reta?

⁵⁰ Jayave metei Jesús jemimboe oiporu ikɨsepuku sacerdote tenondegua jembiokuai re, jare oyasɨa inambi iyakatu kotɨgua chugüi.

⁵¹ Jayave Jesús jei: —Joko peño mo. Pemaeño jese. Jayave oyavɨkɨ kuimbae inambi, jare ombogüera.

⁵² Jare Jesús jei sacerdote reta itenondegua reta, tupao iyangarekoa reta itenondegua reta jare tëta guasu pegua reta itenondegua reta yogüeru ikotɨ vae reta pe: —¿Maera pa peyu kɨsepuku jare ɨvɨra reta ndive, imonda vae kotɨ rami?

⁵³ Ara ñavo aiko pe reta ndive tupao pe, ërei mbaetɨ chepɨɨ. Ërei ora oväe ma peve chepɨɨ vaerä, Satanás imbaepuere rupi.

Pedro oikuaku Jesús

⁵⁴ Jayave oipɨɨ reta Jesús jare güɨraja sacerdote tenondegua ete jëta pe. Jare Pedro ojo jaɨkue, ërei mombɨrɨño oiko chugüi.

⁵⁵ Jare jókuae sacerdote tenondegua ete joka mbɨte pe oyatapɨ reta. Jare Pedro vi oguapɨ joko pe jae reta ipɨte pe.

⁵⁶ Ërei metei tembiokuai kuña oecha Pedro oguapɨ oï tataɨpɨ pe yave, omae ngatu jese. Jare jei: —Kuae kuimbae vi oiko jae ndive.

⁵⁷ Jayave Pedro oikuaku Jesús jei reve: —Mbaetɨ aikuaa jókuae kuimbae.

⁵⁸ Ndei ɨma mbove ïru vae oecha Pedro yave jei: —Nde jae vi ko jae reta ïru. Jare Pedro jei: —Mbaetɨ ko.

⁵⁹ Jare metei ora rupi, ïru kuimbae jei ye: —Añetete ko, kuae kuimbae oiko vi jae ndive. Echa Galileaɨgua ko.

⁶⁰ Jare Pedro jei: —Mbaetɨ aikuaa mbae rere reï vae. Jare imiari vɨteri oï ramboeve, takareo oñee.

⁶¹ Jayave yandeYa oyerova omae Pedro re. Jayave Pedro imaendúa yandeYa jei chupe vae re: “Ndei takareo oñee mbove, mboapɨ ye ma chekuakuta.”

⁶² Jayave Pedro oë joko güi, jare ipɨatɨtɨ yae reve oyaeo.

Oyuvanga reta Jesús re

⁶³ Jare Jesús järoa reta oyóyai jare oinupa.

⁶⁴ Jayave jae reta oesa yokua Jesús jare okua jova re. Jayave jei reta chupe: —Emombeu oreve kia ra okua oï nderé vae.

⁶⁵ Jare jeta mbae ikavimbae vae jei reta chupe.

Güɨraja reta Jesús mburuvicha reta jóvai

⁶⁶ Jare köe ma yave, tëta guasu pegua reta itenondegua reta jare sacerdote reta itenondegua reta jare mborookuai re oporomboe vae reta oyomboatɨ. Jare güeru reta Jesús jókuae reta jóvai jare jei reta chupe:

⁶⁷ —Ere oreve, ¿nde pa ko jae Cristo? Jare Jesús jei: —Che amombeu yave peve, ngaraa chererovia.

⁶⁸ Jare che aparandu yave peve mbae re, ngaraa pemombeu cheve, ani ngaraa vi cheyora.

⁶⁹ Ërei che Kuimbaerä ayeapo vae añave güive aguapɨ Tumpa imbaepuere vae iyakatu kotɨ.

⁷⁰ Jare opaete jae reta oparandu chupe: —¿Jayave nde pa ko jae Tumpa Taɨ? Jesús jei chupe reta: —Pere ma ko pe reta etei.

⁷¹ Jayave jae reta jei: —¿Mbaerä ye pa yaekata ïru vae imiari vaerä jese? Echa yande etei ma yaendu jeigüe vae.