San Lucas 21 - Biblia Guarani Tumpa Iñee

Imemano vae omee korepoti Tumpa pe vae regua

¹ Jare Jesús omopüa iñäka yave, oecha oikokatu vae reta oñono ñogüɨnoi ikorepoti korepoti jɨru pe.

² Jare oecha vi metei imemano vae paravete yae vae oñono mókoi reare korepoti jɨru pe.

³ Jayave Jesús jei: —Añete che jae peve, kuae imemano vae paravete vae oñono jeta opaete ïru reta güi.

⁴ Echa opaete ïru reta güeru Tumpa peguarä jembɨre chupegüe. Ërei kuae kuña, yepe tëi paravete, oñono opaete güɨnoi vae. Jókuae ko jembíu jepɨrä tëi vae.

Tumpa jo oyemboaita vae regua

⁵ Jare amogüe vae imiari ñogüɨnoi tupao re, kërai oñemopöra yae ko ita reta ipöragüe pe, jare mbota reta pe. Jayave Jesús jei:

⁶ —Oväeta ara kuae opaete añave peecha vae opa vaerä oyemboai. Ngaraa opɨta metei ave ita ïru ita iárambo.

Kañɨmaa reta kañɨtei regua

⁷ Jayave Jesús jemimboe reta oparandu chupe: —Oporomboe vae, ¿kërai yave pa kuae oyeapota? Jare opaete kuae oyeapota ma yave, ¿këraita pa roikuaa?

⁸ Jayave Jesús jei chupe reta: “Peyeandu, agüɨye vaerä petavɨ. Echa yogüeruta jeta cheree re jei reve: ‘Che ko jae Cristo.’ ‘Ou ma ara oväe.’ Ërei agüɨye pekua jupíe.

⁹ Peendu ñeraro reta jare mburuvicha re oñemopüa vae yave, agüɨye pekɨɨye. Kuae susere reta oime ñotai ko tenonde. Ërei ngatu ndei vɨteri ko oväe kañɨtei.

¹⁰ Opüata oyoe tëtaguasu ïru tëtaguasu ndive, jare mborookuaía ïru mborookuaía ndive.

¹¹ Oimeta ɨvɨkana tuichagüe. Oimeta karuai reta jare mbaerasɨ reta oipota rupi; oimeta kɨɨye jare mbaembae yavaetegüe oyekuaa ara re.

¹² Ërei ndei kuaekuae reta oasa mbove, ïru vae reta pepɨɨta jare oyapota ikavimbae vae peve, pereraja retata itupao reta pe jare peñonota tembipɨɨrɨru pe, jare pererajata mburuvicha guasu reta jare ïru mburuvicha reta jóvai chereko pegua.

¹³ Ërei jókuae rupi jëguata peve pemombeu vaerä cheregua.

¹⁴ Agüɨye pepɨa pe peyemongeta voi mbae ra pereta peyeepɨ vaerä.

¹⁵ Echa che ameeta peve ñee jare arakuaa, metei ave perovaicho reta mbaetɨta ipuere peré ani peaka.

¹⁶ Jare peru reta, perɨkeɨ reta ani perɨvɨ reta, perëtara reta jare pevɨa-ïru reta pemeeta perovaicho reta pe, jare amogüe pegüi reta peyeyukaukata ko.

¹⁷ Jare opaete vae peñemotareɨta chereko pegua.

¹⁸ Ërei ngaraa metei ave pea okañɨtei.

¹⁹ Jare pepɨaguasu rupi peyemboasaukata ko.

²⁰ Jare peecha jeta sundaro reta Jerusalén oñova yave, peikuaata ou ma ko oväe Jerusalén oyemboai vaerä.

²¹ Jayave Judea pegua reta totekuarai ɨvɨtɨ guasu kotɨ. Jare Jerusalén pe ñogüɨnoi vae reta toë totekuarai joko güi. Jare iko pe ñogüɨnoi vae agüɨye toyerova Jerusalén pe.

²² Echa jókuae ara reta pe ɨvɨ pegua reta oiporara yaeta, jeko ae re, opaete Tumpa Iñee pe oyekuatía oï vae oyembopo vaerä.

²³ ¡Paravete!, oiporara yaeta jókuae ara reta pe ipurúa vae reta jare imembɨ ndei raɨ vae reta. Echa oimeta susere tuichagüe kuae ɨvɨ pe jare oiporara yaeta ko.

²⁴ Jare oimeta oyeyukauka kɨsepuku pe vae. Jare oyererajata tembiokuairä opaete tëtaguasu reta rupi, jare judiombae vae reta omboaita Jerusalén, jae reta iara opa regua.”

Kuimbaerä oyeapo vae ou yeta vae regua

²⁵ “Jayave oimeta oyekuaa mbae kuaraɨ re, yasɨ re jare yasɨtata reta re. Jare tëtaguasu reta oiporarata, ɨguasu reta jɨapu jare ɨaparúa reta jeko pegua.

²⁶ Jare ɨvɨ pegua reta ipɨa jëogüeta okɨɨye güi, ɨvɨ pe mbae oasa vae güi. Jare opaete ara rupi ñogüɨnoi vae reta okanata.

²⁷ Jayave ɨvɨ pegua reta chereechata ayu amapɨtu re. Che Kuimbaerä ayeapo vae chembaepuere yae reve jare cheyemboetea reve.

²⁸ Jare opaete kuae mbaembae omboɨpɨ oasa yave, peñemoäta ngatu. Echa köi yae ma Tumpa pereepɨ vaerä.”

²⁹ Jayave Jesús jei vi chupe reta ombojaanga reve: “Pemae ɨva jare opaete ɨvɨra reta re.

³⁰ Oyemboɨpɨ ma jokɨ yave, peikuaa ko oyearo ma ama iara.

³¹ Jaeramiño vi pe reta peecha yave kuae mbaembae oasa yave, peikuaata köiño ma ko ou Tumpa iporookuaía.

³² Añete che jae peve, kuae ɨvɨ pe añave yogüɨreko vae reta, ngaraa opa omano ndei opaete kuae mbaembae oasa mbove.

³³ Ara jare ɨvɨ opata ko, ërei cheñee ngaraa opa.

³⁴ Peyeandu, agüɨye vaerä pekaru reteiño jare pesavaɨpo, jare agüɨye vaerä peyemoambaeko mbaembae ɨvɨ pegua re. Agüɨye vaerä peparanoe ou oväe peve jókuae ara ikavimbae.

³⁵ Echa jókuae ara oipokouta opaete ɨvɨ pegua reta, ñuai oporomboa rami.

³⁶ Jáeramo peyeandu, jare peyerure avei ara ñavo Tumpa iporoaɨu rupi peasayepe vaerä opaete kuae mbaembae outa vae güi, peyemboɨ vaerä che Kuimbaerä oyeapo vae jóvai.”

³⁷ Jare opa ara rupi Jesús oporomboe tupao pe. Ërei pɨ̈tu ma yave ojo joko güi opɨta ɨvɨtɨ Olivo pe.

³⁸ Jare opaete vae reta yogüeru ndeimbove ñavo tupao pe oyeapɨsaka vaerä Jesús re.