San Lucas 17 - Biblia Guarani Tumpa Iñee

Oyavɨuka ïru pe vae

¹ Jayave Jesús jei jemimboe reta pe: “Oime tai ko mbaemboavai reta. Paravete jókuae, mbaemboavai oñono ïru vae pe vae.

² Ikavi ko oñapɨti iyayu re metei ita tuicha vae oyembaeso pɨpe vae, jare oyemombo ɨguasu pe, agüɨye vaerä mbaemboavai oñono metei michia güɨrovia cheré vae pe.

³ Peyeandu. Nerëtara iyoa yave ndekotɨ, emboeta chupe. Jare jae oyembopɨambuae yave jeko re, neɨ̈ro chupe.

⁴ Jare metei ara pe chiu iyoa ndekotɨ yave, jare chiu vi jókuae ara pe ou jei ndeve yave: ‘Ngaraa ma ayavɨ ndekotɨ’, neɨ̈ro chupe.”

Mborogüɨrovia re

⁵ Jayave yandeYa jemimondo reta jei chupe: —Emoïru oreve oreporogüɨrovia.

⁶ Jayave yandeYa jei: —Peporogüɨrovia michi yae metei mostaza jäɨgüe michi yae rami yave mona, pepuereta pere kuae ɨvɨra sicómoro jee vae pe: Esɨrɨ kuae güi ekua ɨguasu pe, jare ɨvɨra oyapota pere vae.

Tembiokuai jembiapo

⁷ “¿Kia pa pegüi reta güɨnoi metei jembiokuai vae ombaeara ani mɨmba reta omongarúa güi ou vae pe jei: ‘Eyu eguapɨ kuae mesa pe ekaru’?

⁸ Mbaetɨ ko, jaeño pere: ‘Ekua räri eñemimo cheve, javoi opa ma akaru yave, ndepuereta rekaru.’

⁹ Jare tembiokuai oyapo vae re ¿pemee ra yasoropai? Arovia mbaetɨ.

¹⁰ Jaeramiño vi pe reta peyapo ma opaete Tumpa jei peve peyapo vaerä vae yave, pere: ‘Ayapoä mbae ayemboeteuka vaerä. Echa jaeño ayapo, cheokuai ayapo vaerä vae.’ ”

Payandepo kuimbae ipire mbaerasɨ ókui vae

¹¹ Jare Jesús ojo Jerusalén kotɨ yave, oasa Samaria jare Galilea ipäu rupi.

¹² Jare ojo metei tëta raɨ pe oväe yave, oë oövaiti payandepo kuimbae ipire mbaerasɨ ókui vae reta. Ërei jae reta mombɨrɨño oyemboɨ reta Jesús güi,

¹³ jare osapúkai reta jei reve: —¡Jesús, oporomboe vae, oreparareko!

¹⁴ Jare Jesús oecha reta yave, jei chupe reta: —Pekua peyeechauka sacerdote reta pe. Jare yogüɨraja ramboeve, okuera reta imbaerasɨ güi.

¹⁵ Jayave metei chugüi reta oecha ma okuera yave, osapúkai reve omboete Tumpa ou ye oiko,

¹⁶ Jare oyetavatɨka itindɨasɨ reve Jesús jóvai jare omee yasoropai chupe. Jare jókuae jae ko Samariaɨgua.

¹⁷ Jayave Jesús jei: —¿Payandepoä yera okuera vae reta? ¿Jama pa chau vae reta?

¹⁸ ¡Jaeño kuae metei judiombae vae ou ye omboete vaerä Tumpa!

¹⁹ Jayave jei jókuae kuimbae pe: —Epüa jare ekua. Rekuera ma, rerovia cheré ramo.

Tumpa iporookuaía outa vae regua

²⁰ Jare fariseo reta oparandu Jesús pe kërai yave ra outa Tumpa iporookuaía vae. Jayave Jesús jei chupe reta: —Tumpa iporookuaía ngaraa oyekuaa ou.

²¹ Jaeramiño vi ngaraa kia jei: “Mase, ko oï”, ani “mase, pe oï.” Echa Tumpa iporookuaía oime ma pepɨte pe oï.

²² Jayave Jesús jei jemimboe reta pe: —Outa ara reta peipota yae vaerä chereecha tëi che kuimbaerä ayeapo vae metei ara yepe, ërei ngaraa chereecha.

²³ Jayave ïru vae reta jeita peve: “Mase, ko oï”, ani “mase, pe oï.” Ërei agüɨye pekua ani peeka.

²⁴ Echa ama overa vae oyekuaa opaete rupi. Jökoraita vi che Kuimbaerä ayeapo vae cheara oväe yave.

²⁵ Ërei aiporara yaeta räri ko, jare añave yogüɨreko vae reta chereröɨrota.

²⁶ Noé oiko yave ɨvɨ pegua reta ndive oasa rami. Jökoraita che Kuimbaerä ayeapo vae cheara oväe yave.

²⁷ Iarete reta, okau reta, omenda reta jare oyomomenda reta, Noé oike regua arca pe. Jayave ou ɨporu guasu jare opa omokañɨtei reta.

²⁸ Jökoraiño vi Lot oiko yave, Sodoma pegua reta iarete reta, okau reta, ombaegua reta, omaemee reta, omaetɨ reta jare omopüa reta jorä.

²⁹ Ërei jókuae ara Lot oë Sodoma güi yave, oa ara güi tata azufre ndive jare opa omokañɨtei Sodoma pegua reta.

³⁰ Jökoraita vi oasa che Kuimbaerä ayeapo vae ayekuaa yave.

³¹ Jókuae ara, o iárambo ipe kavía pe oï vae, agüɨye togüeyɨ güɨraja vaerä imbaembae jo pe güɨnoi vae. Jaeramiño vi iko pe oï vae, agüɨye toyerova ye.

³² Pemaendúa Lot jembireko kërai oasa vae re.

³³ Echa opaete oipota oñovatu jekove vae, okañɨteita ko. Ërei jókuae omee jekove chereko pegua vae güɨroasayepeta.

³⁴ Che jae peve, jókuae pɨ̈tu mókoi vae oyapakuata ñogüɨnoi jupa pe. Metei oyererajaukata jare ïru oyeeyata.

³⁵ Jaeramiño vi mókoi kuña ombaesota ñogüɨnoi. Metei oyererajaukata jare ïru oyeeyata.

³⁶ Jaeramiño vi mókoi kuimbae ñogüɨnoita kó pe. Metei oyererajaukata jare ïru oyeeyata.

³⁷ Jayave Jesús jemimboe reta oparandu chupe: —OreYa, ¿kia pe pa oyeapota kuae? Jayave Jesús jei chupe reta: —Maerëogüe oïa pe oyemboatɨta uruapúa reta.