San Lucas 16 - Biblia Guarani Tumpa Iñee

Iya imbaembae iyangarekoa ñarakuaa vae

¹ Jesús jei vi jemimboe reta pe: “Oiko metei kuimbae oikokatu vae, jae güɨnoi imbaembae iyangarekoa. Jókuae jembiokuai jërakua chupe opa omokañɨtei güɨnoi chugüi imbaembae.

² Jayave oenɨi jembiokuai jare jei chupe: ‘¿Mbae pa ko kuae nerërakua cheve vae? Eñono kavi opaete ndeparavɨkɨ remboeterenga vaerä cheve. Echa mbaetɨta ma reiko chembaembae iyangarekoarä.

³ Jayave jókuae tembiokuai jei iyeupe: ¿Mbae ra ayapota? Echa mbaetɨta ma aiko mbaembae iyangarekoarä. Echa akaapi vaerä, ngaraa chepuere. Ayerure vaerä, chemarata ko.

⁴ Aikuaa ma mbae ayapo vaerä, cheya chemoë ma yave, ïru vae reta chemboresive vaerä jo pe.’

⁵ Jayave oenɨi opaete iya pe ipía vae reta. Jare oparandu tenonde ou vae pe: ‘¿Mbovɨ pa ndepía cheya pe?’

⁶ Jókuae ipía vae jei: ‘Cien jɨru olivo iasaite.’ Jayave jókuae tembiokuai jei chupe: ‘Ko oï ndetupapire. Eguapɨ voi jare eikuatía cincuenta jɨruño.’

⁷ Jayave oparandu ïru pe: ‘¿Nde pa mbovɨ ndepía?’ Jae jei chupe: ‘Cien arova trigo.’ Jayave tembiokuai jei chupe: ‘Ko oï ndetupapire. Eikuatía ochenta arovaño.’

⁸ Jare kuimbae oikokatu vae omboete imbaembae iyangarekoa ñarakuaa vae, ipoki reve oyapo iyeupe vae re. Echa kuae ɨvɨ pegua reta oikatu yae ko iyeupe ïru ndive Tumpa pe oyeokuai vae reta güi.

⁹ Che jae peve peiporu vaerä pembaembae kuae ɨvɨ pegua peyapo vaerä vɨa-ïru retarä. Echa oata ma pembaembae yave, jae reta pemboresiveta tëta opambae vae pe.

¹⁰ Mbae michi vae re jupi vae, mbae tuicha vae re jupi vi. Jaeramiño vi mbae michi vae re jupimbae vae, mbae tuicha vae re mbaetɨta vi jupi.

¹¹ Jáeramo, kuae ɨvɨ pegua mbaembae pe mbaetɨ yave peyapo jupi vae, ngaraa vi peyapo ara pegua mbaembae jupi rupi.

¹² Jare kia imbaembae re mbaetɨ peyangareko kavi yave, ngaraa vi oñemee peve pembaerä vae.

¹³ Ngaraa kia ipuere oyeokuai kavi mókoi iya güɨnoi yave; echa omotareɨta metei iya jare oaɨuta ïru, ani oyeokuai kavita metei pe jare güɨröɨrota ïru. Mbaetɨ pepuere peyeokuai Tumpa pe mbaeyekou peaɨu reve.

¹⁴ Jare fariseo reta kuae oendu vi yave opaete kuae mbaembae, oyóyai reta Jesús. Echa jae reta imbaepotarai yae ko.

¹⁵ Jayave Jesús jei chupe reta: —Pe retaiño peyembojupi ïru vae reta jóvai vae ko pe. Ërei Tumpa oikuaa pepɨa pe oï vae. Echa kuimbae reta ombotuicha yae vae, Tumpa peguarä ikavimbae yae ko.

Mborookuai jare Tumpa iporookuaía

¹⁶ Ndei Juan ou mbove, oñemoërakua yandeve yayapo vaerä mborookuai jare ñeemombeúa reta jei vae rupi. Ërei Juan omboɨpɨ omoërakua ñee ikavi vae Tumpa iporookuaía regua, jare opaete vae oipota yae oike Tumpa iporookuaía pe.

¹⁷ Ara jare ɨvɨ yavaiä etei opa vaerä. Ërei yandepuereä etei yamboai metei yeai ave yepe Moisés iporookuai güi.

Jesús imiari yomombo regua

¹⁸ Oime yave kia omombo jembireko jare güɨreko ïru kuña yave oyuvanga ko menda re. Jare jókuae kuña oyemombogüe kia güɨreko yave, oyuvanga vi ko menda re.

Kuimbae oikokatu vae jare Lázaro

¹⁹ Oiko metei kuimbae oikokatu vae, oyemonde kavi avei temimonde ikavigüe pe jare ara ñavo oyapouka tembíu kavi.

²⁰ Jare oiko vi metei kuimbae paravete yae vae, Lázaro jee vae; ikaracha yepeai oiko. Ara ñavo oyapakua oiko jókuae kuimbae oikokatu vae jöke pe.

²¹ Jare Lázaro oipotaecha oyemoangapɨɨ oikokatu vae imesa güi tembíu osururugüe pe. Jare yaɨmba reta ave yogüeru oere Lázaro ikaracha reta.

²² Jare metei ara jókuae kuimbae paravete vae omano, jare araɨgua reta güɨraja Abraham oïa pe. Jare kuimbae oikokatu vae omano vi jare oñotɨ reta.

²³ Jare omanogüe reta ñogüɨnoia pe kuimbae oikokatuse vae oiporara yae oï. Jayave oupi iñäka jare oecha Abraham mombɨrɨ oï chugüi. Oecha vi Lázaro oï Abraham ndive.

²⁴ Jayave osapúkai reve jei: Cheru Abraham, cheparareko. Embou Lázaro tomoäkɨ ipoäka ɨ pe omoröɨsa vaerä chekü. Echa aiporara yae aï kuae tata pe.

²⁵ Ërei Abraham jei chupe: Cheraɨ, nemaendúa kërai nde reiko ɨvɨ pe yave, reyekou yepi jeta mbaembae re. Jökoraiño vi Lázaro oiko ɨvɨ pe yave, oiporara jeta ikavimbae vae. Ërei añave jae ipɨakatu oï kuae pe jare nde reiporara reï.

²⁶ Jare ñanepäu pe oime yoapɨ oï ɨvɨsoro guasu yandepuere rapembae yaasa vae. Kuae güi jokotɨ, ani joko güi kuae kotɨ.

²⁷ Jayave kuimbae oikokatuse vae jei Abraham pe: ‘Cheru, romoñera remondo vaerä Lázaro cheru jëta pe.

²⁸ Echa oime anoi pandepo cherɨvɨ reta. Emondo omombeu vaerä chupe reta, agüɨye vaerä jae reta vi yogüeru kuae aiporara aïa pe.’

²⁹ Jayave Abraham jei chupe: ‘Oime güɨnoi reta Moisés jare ñeemombeúa reta jembikuatía. Toyeapɨsaka reta jókuae re.’

³⁰ Jayave kuimbae oikokatuse vae jei Abraham pe: ¡Ngaraa oyeapɨsaka jese reta, cheru Abraham! Ërei ojo yave omanogüe oikove ye vae imiari chupe reta, oeya retata ko iyemongeta ikavimbae ipɨa pe güɨnoi vae.

³¹ Ërei Abraham jei chupe: ‘Mbaetɨ oipota oyeapɨsaka Moisés jare ñeemombeúa reta jembikuatía re yave, ngaraa güɨrovia reta, yepe tëi kia oikove ye ojo chupe reta omanogüe vae reta ipɨte güi.’ ”