San Lucas 15 - Biblia Guarani Tumpa Iñee

Vecha okañɨ vae regua

¹ Jayave oyemboatɨ Jesús oïa pe opaete mburuvicha peguarä okovara vae reta jare jeko ikavimbae vae reta.

² Jayave fariseo reta jare mborookuai re oporomboe vae reta iñeenguru jese, jei reta: —Kuae kuimbae oñemoïru jeko kavimbae vae reta ndive, jare okaru jae reta ndive.

³ Jayave Jesús jei chupe reta ombojaanga reve:

⁴ “Metei kuimbae güɨnoi cien vecha, jare omokañɨ yave metei, ¿ngaraa pa oeya ñuu pe jókuae noventa y nueve vae, jare ojo oeka jókuae okañɨ vae oväe chupe regua?

⁵ Jare oväe yave, ovoɨ güeru ye iyatiɨ re oyerovia yae reve.

⁶ Jare ou ye oväe yave jëta pe, omboatɨ ivɨa-ïru reta jare jëta-ɨpɨ pegua reta, jare jei chupe reta: ‘Peyerovia che ndive. Echa aväe ye chevecha okañɨ vae.’

⁷ Che jae peve, jökoraiño vi ara pe oimeta yerovia tuichagüe metei iyoa vae oeya yave iyemongeta ikavimbae vae ipɨa pe oï vae. Jókuae noventa y nueve jupi vae reta güi. Jókuae mbaetɨ mbae jeko pegua oyepoepɨ vaerä vae reta.

Reare okañɨ vae re oyembojaanga vae

⁸ Ani metei kuña güɨnoi yave payandepo reare, omokañɨ yave metei, ¿ngaraa pa omoendɨ mechero, jare otupei opaete o rupi, oeka kavi reve oväe chupe regua?

⁹ Jare oväe chupe yave, omboatɨ opaete ivɨa-ïru reta jare jëta-ɨpɨ pegua reta, jare jei chupe reta: ‘Peyerovia che ndive. Echa aväe ye reare amokañɨ vae.’

¹⁰ Che jae peve, jökoraiño vi ara pe oimeta yerovia tuichagüe Tumpa iaraɨgua reta pe metei iyoa vae oeya yave iyemongeta ikavimbae vae ipɨa pe oï vae.”

Kunumi opa mbae omokañɨtei vae

¹¹ Jei vi chupe reta: “Metei kuimbae güɨnoi mókoi taɨ.

¹² Jare taɨ taɨkuegua vae jei tu pe: ‘Cheru, emee voi mo cheve mbaembae reeyata chembaerä vae.’ Jayave tu omboyao imbaembae taɨ reta pe.

¹³ Jayave mbovɨ ara rupi taɨ taɨkuegua vae opa omboatɨ imbaembae jare ojo mombɨrɨ ambuae ɨvɨ pe. Joko pe opa omokañɨtei iyeugüi opaete imbaembae, iyapirai reteiño vae rupi.

¹⁴ Jare opaetei ma omokañɨtei iyeugüi yave, ou karuai tuicha vae jókuae ɨvɨ pe, jare jae mbaetɨ ma mbae güɨnoi jou vaerä.

¹⁵ Jayave ojo oyemboya metei kuimbae jókuae ɨvɨ pegua re. Jare jókuae kuimbae omondo jɨmbarókai pe oyangareko vaerä kuchi reta re.

¹⁶ Jare kunumi oipota tëi oyemoangapɨɨ ɨvope kuchi reta jou vae re. Jare mbaetɨ kia ave omee chupe mbae jou vaerä.

¹⁷ Jayave ou oyemongeta, jare jei iyeupe: ¡Cheru jëta pe, omombaravɨkɨ vae reta jeta güɨnoi jou vaerä! Ërei che kuae pe cheyukata ma yɨmbɨaɨ.

¹⁸ Taja ye kuae güi cheru pe jare tae chupe: ‘Cheru, cheyoa ma Tumpa kotɨ jare ndekotɨ.

¹⁹ Mbaetɨ ma jupi aiko vaerä nderaɨrä. Taiko nderembiokuairä.’

²⁰ Jayave oyerova ye tu jëta kotɨ. Ërei mombɨrɨ peve tu oecha jare oiparareko. Jayave tu osɨi oövaiti taɨ, oiküava jare oovapɨte.

²¹ Jayave taɨ jei tu pe: ‘Cheru, cheyoa ma Tumpa kotɨ jare ndekotɨ. Mbaetɨ ma jupi aiko vaerä nderaɨrä.’

²² Ërei tu jei jembiokuai reta pe: ‘Peru temimonde ikavi vae pemondeuka chupe. Jaeramiño vi peñono moäka-vera ipoäka re jare pɨapaa ipɨ re.

²³ Jare peru toro taɨrusu vae ikɨra vae peyuka. Yakaru jare yayapo arete.

²⁴ Echa kuae cheraɨ omano vae rami ko cheve, ërei añave oikove ye ma cheve. Okañɨ chegüi, ërei añave oñeväe ye ma.’ Jare omboɨpɨ reta omboarete.

²⁵ Jare taɨ tenondegua vae oparavɨkɨ oï ko pe. Jare ou ye ma köiño jëta güi yave, oendu oyemimbɨ jare opɨrae ñogüɨnoi o pe vae.

²⁶ Jayave oenɨi metei tu jembiokuai jare oparandu chupe mbae ra ko jókuae oendu vae.

²⁷ Jayave tembiokuai jei chupe: ‘Nderɨvɨ ko ou ye, jare nderu oyukauka toro taɨrusu vae ikɨra vae, taɨ ou ye ikavi oväe ramo.’

²⁸ Jayave taɨ tenondegua vae iyarasɨ jare mbaetɨ oipota oike o pe. Jayave tu oë o güi jare omoñera oike vaerä.

²⁹ Jayave jei tu pe: ‘Mase, jeta año ma ayeokuai ndeve. Jekuaeño ayapo ndeporookuai. Ërei mbaetɨi remee cheve kavara raɨ yepe, avɨa vaerä chevɨa-ïru reta ndive.

³⁰ Ërei kuae nderaɨ opaiño omokañɨtei ndembaembae kuña iyaguasa pota vae reta re vae ou ye yave, reyuka chupe toro taɨrusu vae ikɨra vae.’

³¹ Jayave tu jei taɨ pe: ‘Cheraɨ, nde ko reiko avei che ndive, jare opaete chembae ndembae ko.

³² Ërei ikavi ko yayapo arete jare yayerovia. Echa kuae nderɨvɨ omano vae rami ko cheve, ërei añave oikove ye ma cheve. Okañɨ chegüi, ërei añave oñeväe ye ma.’ ”