San Lucas 13 - Biblia Guarani Tumpa Iñee

Peeya peyemongeta ikavimbae vae pepɨa pe oï vae

¹ Jare amogüe joko pe ñogüɨnoi vae reta omombeu Jesús pe kërai Pilato oyukauka amogüe Galileaɨgua reta, jare jae omboyea jugüɨgüe mɨmba oyeyukagüe omee Tumpa pe vae ndive.

² Jayave Jesús jei chupe reta: “Güɨramoi pe reta peyemongeta kuae reta oiporara, iyoa yae opaete ïru Galileaɨgua reta güi ramo.

³ Che jae peve, jökoraiä ko. Pe reta mbaetɨ peeya yave peyemongeta ikavimbae vae pepɨa pe oï vae, pekañɨteita vi ko.

⁴ Ani jókuae dieciocho vae reta re osururu oɨvate Siloé pe jare opa oyuka vae, ¿peyemongeta pa jókuae reta iyoa yae opaete Jerusalén pe yogüɨreko vae reta güi?

⁵ Che jae peve, jökoraiä ko. Pe reta mbaetɨ peeya yave peyemongeta ikavimbae vae pepɨa pe oï vae, pekañɨteita vi ko.”

Ɨva iambae re oyembojaanga vae

⁶ Jayave Jesús jei vi chupe reta ombojaanga reve: “Metei kuimbae güɨnoi iuvarupa pe metei ɨva. Ojo tëi oeka ɨva ia, ërei mbaetɨ oväe chupe.

⁷ Jayave jei iko pe oparavɨkɨ chupe vae pe: ‘Mase, mboapɨ año ma ayu tëi aeka kuae ɨva ia jare mbaetɨ aväe chupe. Eyasɨa. Opɨ̈roiño ma ɨvɨ güɨnoi.’

⁸ Jayave kó pe oparavɨkɨ vae jei kó iya pe: ‘Cheya, emaeño topɨta kuae año pegua. Tayoo räri iyɨpɨ rupi jare tañono kavararepoti iyɨpɨ re.

⁹ Javoi ia yave, ikavi ko. Ërei mbaetɨ ia yave, eyasɨauka.’ ”

Jesús ombogüera kuña ara mbutuu pe

¹⁰ Jesús oporomboe oï metei judío reta itupao pe ara mbutuu pe.

¹¹ Jare joko pe oï metei kuña dieciocho año ma aña omombaerasɨ vae. Ikupeatɨ oguata, mbaetɨ etei ipuere kërai ave yepe oyembosɨmbi.

¹² Jesús oecha yave, oenɨi jei chupe: —Kuña, rekuera ma ko ndembaerasɨ güi.

¹³ Jayave Jesús oñono ipo jese. Jare jupivei jókuae kuña ipuere oyembosɨmbi kavi jare omboɨpɨ omboete Tumpa.

¹⁴ Ërei judío reta itupao pegua tenondegua iyarasɨ Jesús oporombogüera ara mbutuu pe ramo, jei joko pe ñogüɨnoi vae reta pe: —Ova ara ko oï yaparavɨkɨ vaerä. Peyu jókuae ara reta pe pekuera vaerä. Agüɨye peyu pekuera vaerä ara mbutuu pe.

¹⁵ Jayave yandeYa jei chupe: —Jova mókoi vae reta. ¿Pe reta peyoraä pa peraja pemboɨu pegüeye ani pemburika ara mbutuu pe?

¹⁶ Mase, kuae kuña Abraham iñemuña pegua ko. Ërei Satanás dieciocho año ma omombaerasɨ. ¿Mbaetɨta pa jaekavi oyembogüera vaerä kuae mbaerasɨ güi ara mbutuu pe?

¹⁷ Jesús jei kuae yave, opaete jovaicho reta imara. Ërei opaete vae reta oyerovia opaete mbae ikavi yae Jesús oyapo vae re.

Mostaza jäɨgüe

¹⁸ Jesús jei: “¿Mbae ra yambojaangata Tumpa iporookuaía re? ¿Mbae re ra ambojaangata?

¹⁹ Yambojaanga metei mostaza jäɨgüe, metei kuimbae güɨraja oñotɨ iko pe vae re. Okuakuaa jare oyeapo ɨvɨra tuichagüe. Jare güɨra reta yogüeru oyapo jaitɨrä jese.”

Mbɨyape imbovúa

²⁰ Jare jei ye chupe reta: “¿Mbae re ra ambojaangata Tumpa iporookuaía?

²¹ Yambojaanga jese mbɨyape imbovúa. Kuña omboyea jókuae mbɨyape imbovúa veinte kilo trigokúi ndive yave, opaetei ombovu vae rami ko.”

Öke ipɨmii vae

²² Jare Jesús ojo ramboeve Jerusalén kotɨ, oasa tëta guasu reta rupi jare tëta raɨ reta rupi oporomboe reve jokoropi.

²³ Jayave metei vae oparandu Jesús pe: —CheYa, ¿mbovɨ yae pa oyemboasaukata vae? Jare jei chupe reta:

²⁴ —Peñemomɨ̈rata peike vaerä öke ipɨmii vae rupi. Echa che jae peve, jeta vae oipota tëita oike, ërei ngaraa ipuere.

²⁵ Echa o iya oyokenda ma yave öke, pe reta pepɨtata oka pe. Jayave pembopu tëita öke jare pereta: “OreYa, oreYa, eipea öke oreve.” Ërei jae jeita peve: “Che mbaetɨ pokuaa.”

²⁶ Jayave pemboɨpɨta pere: “Rokaru nderóvai, jare nde reporomboe oreroka guasu reta rupi.”

²⁷ Ërei jae jeita peve: “Che jae peve, che mbaetɨ pokuaa. Pesɨrɨ chegüi opaete pe ikavimbae iyapoa reta.”

²⁸ Jayave peyaeota jare peräi pembokɨrɨrɨuta. Peecha yave Abraham, Isaac, Jacob jare opaete ñeemombeúa reta Tumpa iporookuaía pe ñogüɨnoi. Ërei pe reta ikatu pe peïta.

²⁹ Yogüeru retata opaete ketɨ ketɨ güi, jare oguapɨ retata mesa pe Tumpa iporookuaía pe.

³⁰ Ërei pemaendúa kuae re: Amogüe añave oñemomichi vae ombotenondeta ko, jare oyembotuicha vae ombotaɨkueta.

Jesús ipɨatɨtɨ yae Jerusalén re

³¹ Jókuae ara yogüeru Jesús oïa pe amogüe fariseo reta, jare jei reta chupe: —Ekua kuae güi, echa Herodes oipota ndeyukauka.

³² Jayave Jesús jei chupe reta: —Pekua pere jókuae aguara pe, kërai ambosɨrɨta aña reta oya jese vae reta güi jare ambogüerata imbaerasɨ vae reta añave jare pɨareve. Jare kóeramo opata ma cheparavɨkɨ.

³³ Añete ko, ikavi ko aja añave, pɨareve jare kóeramo Jerusalén kotɨ. Echa mbaetɨ ko jaekavi metei ñeemombeúa omano vaerä ïkotɨa Jerusalén güi.

³⁴ ¡Jerusalén! ¡Jerusalén!, reyuka ñeemombeúa reta. Reyapi reyuka ita pe Tumpa ombou ndekotɨ vae reta. Jeta vese chekɨ̈reɨ tëi amboatɨ ndeipo reta, uru omboatɨ imembɨ reta ipepo igüɨ pe rami, ërei nde mbaetɨ reipota.

³⁵ Mase, pero reta opata oyemboai opɨta pegüi. Che jae peve, ngaraa ma chereecha pere regua: “Toyemboeteuka yandeYa jee re ou vae.”