San Lucas 12 - Biblia Guarani Tumpa Iñee

Fariseo reta iporomboe regua

¹ Jare jeta yae oyemboatɨ Jesús oïa pe, jare oñomoaña moaña. Jayave Jesús tenonde jei jemimboe reta pe: “Peyeandu fariseo reta iporomboe güi. Echa jae reta jova mókoi vae reta ko.

² Echa oime yave mbae oñeomi vae, oyekuaa ñotai ko. Jaeramiño vi oime yave mbae oyekuaambae vae, oyekuaa ñotai ko.

³ Jáeramo pɨtumimbi pe pere vae oyeenduta tembipe pe, jare pero japɨpe pe pere vɨari vae oñemoërakuata o iárambo ipe vae güi.

Pekɨɨye Tumpa güiño

⁴ Jare che jae peve, chevɨa-ïru reta, agüɨye pekɨɨye pereteño ipuere oyuka vae reta güi. Echa jaɨkue rupi, ngaraa ye ma mbae ipuere oyapo peve.

⁵ Ërei tamombeu peve kia güi pekɨɨye vaerä. Pekɨɨye jókuae ipuere oekɨ perekove güire oporomondo kañɨtei pe vae güi. Añete che jae peve, pekɨɨye chugüi.

⁶ Peikuaa ko pandepo güɨra raɨ jepɨa etei oñemee vae. Ërei mbaetɨ metei güi ave Tumpa iñakañɨ.

⁷ Echa pea reta ave ko Tumpa oikuaa, mbovɨ ko penoi peäka re vae. Jáeramo agüɨye pekɨɨye. Echa Tumpa peraɨu yae ko jeta güɨra raɨ reta vae güi.

Ïru vae reta jovake oyekuaauka vae

⁸ Che jae peve kuae: Oime yave kia chemoërakua ïru vae reta jóvai vae, che Kuimbaerä ayeapo vae amoërakuata vi Tumpa iaraɨgua reta jóvai.

⁹ Ërei oime yave kia chekuaku ïru vae reta jóvai, che vi aikuakuta Tumpa iaraɨgua reta jóvai.

¹⁰ Jare oime yave kia jei ikavimbae vae che Kuimbaerä ayeapo vae kotɨ vae pe, Tumpa iñɨ̈rota. Ërei oime yave kia jei ikavimbae vae Espíritu Santo kotɨ vae pe, Tumpa ngaraa etei iñɨ̈ro.

¹¹ Jare ïru vae reta pereraja yave pemee vaerä judío reta itupao reta pe jare mburuvicha reta pe jare ïru vae reta mbaepuere güɨnoi vae pe, agüɨye peyemoambeko mbae ra ani kërai ra pereta chupe reta vae re.

¹² Echa Espíritu Santo ko pemboeta mbae pere vaerä jókuae ora pe.”

Oikokatu vae iyarakuaambae vae

¹³ Jayave metei kuimbae jeta vae ipɨte pe oï vae jei Jesús pe: —Oporomboe vae, ere cherɨkeɨ pe omboyao vaerä cheve orerugüe oeya orembaerä vae.

¹⁴ Ërei Jesús jei chupe: —Kuimbae, ¿kia pa cheñono peve mburuvicha oporojäa vaerä ani ombaemboyao vaerä?

¹⁵ Jayave Jesús jei vi opaete vae pe: —Peyeandu, peipota rai mbaembae vae güi. Echa mbaeyekou reä ko oï tekove.

¹⁶ Jayave jei chupe reta ombojaanga reve: “Metei kuimbae oikokatu vae jeta imbaagüɨye.

¹⁷ Jare jae jei ipɨa pe iyeupe: ‘¿Mbae ra ayapota? Mbaetɨ ma chembaagüɨye jendarä.’

¹⁸ Jare jei: ‘¡Aikuaa ma! Tamboai cheavatío reta jare tamopüa pɨau ye tuicha vae, jare joko pe tañovatu opaete chembaagüɨye reta jare opaete chembaembae.’

¹⁹ Jayave che jaeta cheyeupe: ‘Jeta yae mbae renoi, oupitɨta ɨma año pegua. Eputuu, ekaru, ekau jare eyerovia.’

²⁰ Ërei Tumpa jei jókuae kuimbae pe: ‘Yarakuaambae, kuae pɨ̈tu remanota. Jayave opaete mbaembae reñovatu vae ¿kia peguarä pa?’ ”

²¹ Jayave Jesús jei chupe reta: —Jökorai ko jeta mbaembae oñovatu iyeupeguaräño vae, Tumpa peguarä oikokatúä ko.

Agüɨye peyemoambeko mbaembae re

²² Javoi Jesús jei jemimboe reta pe: “Jáeramo che jae peve, agüɨye peyemoambeko peyé, perembiurä vae re ani temimonde re.

²³ Tekove ko jae ikavi yae tembíu güi, jare yanderete, temimonde güi.

²⁴ Pemae güɨra reta re. Jae reta mbaetɨ omaetɨ jare ombaarɨvo. Mbaetɨ vi güɨnoi jembíu jɨru ani avatío. Ërei Tumpa omongaru reta. Pe reta ko Tumpa peraɨu yae güɨra reta güi vae.

²⁵ Güɨramoi peyemoambeko peipota tëi pepuku ramo, ërei ngaraa etei pepuere peyembopuku kërai ave yepe.

²⁶ Mbaetɨ pepuere peyapo mbae michi vae ave yepe yave, ¿maera pa peyemoambeko ïru mbaembae re?

²⁷ Pemae mbaepotɨ reta, kërai okuakuaa reta. Mbaetɨ oparavɨkɨ reta. Mbaetɨ vi omaepöva reta. Ërei che jae peve, mbaepotɨ reta oasa ye ipöra Salomón jemimonde ipöra yae vae güi.

²⁸ Tumpa omopöra yae ñana, yepe tëi añave oï kó pe jare pɨareve pe oyeapɨ. Vɨtei pa pe reta, omeeta ko peve peremimonderä. ¡Michi peporogüɨrovia vae reta!

²⁹ Agüɨye peyemoambeko yae mbae ra peuta vae re, ani ïru mbaembae re.

³⁰ Echa opaete ɨvɨ pegua reta oyemoambeko kuae mbaembae re. Ërei peRu oikuaa ko kuae mbaembae oata peve vae.

³¹ Ërei peeka Tumpa iporookuaía, jökorai yave Tumpa omeeta peve opaete kuae mbaembae.

Peñovatu mbaembae ara pe

³² Agüɨye pekɨɨye, pe mbovɨ yae vae reta. Echa Tumpa ipɨa kavi rupi omee peve iporookuaía.

³³ Pemee pembaembae, jare jepɨgüe pemee paravete vae reta pe. Körai peyapo yave, penoita mbaeyekou opambae vae ara pe, imonda vae reta oikembaea pe jare kupii güɨrokomeguambaea pe.

³⁴ Echa pembaeyekou reta penoia pe, joko pe pepɨa oïta.

Tembiokuai iya oäro avei vae

³⁵ Peï kavi peï jare pemechero reta tijendɨ toï.

³⁶ Pe reta peï iya ojo mendaa pe vae oäro ñogüɨnoi vae rami. Ou ye oväe jare ombopu öke yave, jupiveiño oipea reta vaerä chupe.

³⁷ Oyerovia ko jókuae tembiokuai reta, iya ou ye oväe yave, okeä ñogüɨnoi vae. Añete che jae peve, iya omboguapɨ retata mesa pe, jare jae etei omongaruta jókuae jembiokuai reta.

³⁸ Yepe tëi iya ou yeta oväe pɨare mbɨteta ma yave ani takareo oñee pota ma yave. Ërei jae oecha yave jembiokuai reta oäro ñogüɨnoi, oyeroviata ko tembiokuai reta.

³⁹ Mase: Metei o iya oikuaa yave mona mbae ora pe outa imonda vae omaeñomi, oärota tëi ko jare ngaraa ko omaeño imonda vae omaeño oike jo pe.

⁴⁰ Pe reta peñemokätɨro, agüɨye vaerä che Kuimbaerä ayeapo vae ayu ye peparanoe.”

Tembiokuai jeko kavimbae

⁴¹ Jayave Pedro jei Jesús pe: —CheYa, kuae rembojaanga reve rere vae. ¿Oreveguaräño pa?, ani ¿opaete vae peguarä vi pa?

⁴² Jayave yandeYa jei: “Metei tembiokuai omaangareko vae jeko kavi vae jare oyeandu katu reve vae pe iya oeya ipo pe, omee vaerä ïru tembiokuai reta pe jembiurä iora pe kavi.

⁴³ Oyerovia ko jókuae tembiokuai, iya ou ye oväe yave, oparavɨkɨ oï vae.

⁴⁴ Añete che jae peve, iya omeeta ko chupe oyangareko vaerä opaete imbaembae re.

⁴⁵ Ërei jókuae tembiokuai jei iyeupe ipɨa pe: ‘Cheya ngaraa ou ye jarembae.’ Jare omboɨpɨ oinupa ïru tembiokuai kuimbae reta jare tembiokuai kuña reta, okaru, okau jare oyembosavaɨpo.

⁴⁶ Jare iya ou yeta oväe jókuae tembiokuai oäroä jare oyangarekoä etei oï yave, iya oiporarauka yaeta chupe jare omondota oiko jupimbae reta ndive.

⁴⁷ Oinupata täta, echa tembiokuai oikuaa tëi iya jemimbota, ërei mbaetɨ oyapo.

⁴⁸ Ërei tembiokuai mbaetɨ oikuaaä ramo oyavɨ vae yave, iya ngaraa jeta ete oinupa. Jókuae jeta oñemee chupe vae pe jeta vi oyeekata, jare jeta yae oñemee chupe vae pe jeta yaeta vi oyeeka.

Jesús jeko pegua oime yemboyao

⁴⁹ Che ayu kuae ɨvɨ pe tata amboyepota vaerä, jare aipotaecha ma jendɨ oï vae.

⁵⁰ Che aiporara yaeta ko, jare yavai yaeta cheve opa oyeapo regua.

⁵¹ ¿Peyemongeta pa che ayu amee vaerä mbɨakatu ɨvɨ pegua reta pe? Che jae peve, mbaetɨ ko. Ayu ko oime vaerä yemboyao.

⁵² Echa añave güive metei o pe pandepo yogüɨreko vae oyemboyaota ko oyougüi reta. Mboapɨ vae oyovaichota mókoi vae re, jare mókoi vae mboapɨ vae re.

⁵³ Tu oyovaichota taɨ re, jare taɨ oyovaichota tu re. Ichɨ oyovaichota imemɨkuña re, jare imemɨkuña oyovaichota ichɨ re. Imesɨ oyovaichota imembɨtatɨ re, jare imembɨtatɨ oyovaichota imesɨ re.”

Mbaetɨ etei peikuaa mbae añave oasa oï vae

⁵⁴ Jare Jesús jei jeta vae reta pe: “Peecha amapɨtu oyeapo oï kuaraɨ oikea kotɨ yave, jupivei pere: Okɨta. Jare jökorai oyeapo.

⁵⁵ Jaeramiño vi täta oyepeyu arayevɨ kotɨ güi yave, pere: Arakuta. Jare jökorai oyeapo.

⁵⁶ ¡Jova mókoi vae reta! Peikuaa mbae oasata vae. Ërei mbaetɨ etei peikuaa mbae añave oasa oï vae.

Ñeñono kavi tovaicho ndive

⁵⁷ ¿Maera pa pemaeä peyeupe jupi vae peyapo vaerä vae re?

⁵⁸ Reo yave oñeapo nderé mbae re vae ndive mburuvicha kotɨ, eï kavi peo ramboeve tape rupi. Agüɨye vaerä oñeapo nderé vae nemee mburuvicha ipo pe, jare jae ndemboeterenga tembipɨɨrɨru iyangarekoa pe, jare jae neñoña tembipɨɨrɨru pe.

⁵⁹ Che jae ndeve, ngaraa etei reë jókuae tembipɨɨrɨru güi opaetei remboepɨ regua.”