San Lucas 10 - Biblia Guarani Tumpa Iñee

Jesús omondo setenta vae jupiegua reta

¹ Kuae jaɨkue rupi yandeYa oiparavo ïru setenta kuimbae reta jare omondo jenonde mókoi mókoi rupi opaete tëta guasu reta jae ojotaa rupi.

² Jei chupe reta: “Jeta yae ko oyearɨvo vaerä. Ërei mbovɨ yae ko oparavɨkɨ vae reta. Jáeramo pe reta pemoñera yandeYa, omondo vaerä oparavɨkɨ vae reta ombaarɨvo vaerä.

³ Pekua. Mase, ko che pomondo vecha kuimbae taɨrusu vae reta rami aguarayaɨmba reta ipɨte rupi.

⁴ Agüɨye peraja pekorepotirɨru, ani aporoka, ani pɨapaa; jare agüɨye peyapo maraetei kia pe ave tape rupi.

⁵ Jare peo peväe yave oipota rupi metei o pe, tenonde pere: ‘Toï mbɨakatu kuae o pe.’

⁶ Jare oime yave kia jókuae o pe mbɨakatu oipota vae, jae ipɨakatuta ko. Ërei mbaetɨ oipota yave, ngaraa ipɨakatu.

⁷ Jare pepɨta jókuae o pe. Peu oipotagüe omee peu vaerä vae. Echa jupi ko oparavɨkɨ vae pe oyemboepɨ vaerä. Agüɨye oipotagüe o rupiño peiko.

⁸ Jare metei tëta guasu pe peo peväe yave, joko pegua reta pemboresive kavi yave, peu oipotagüe omee peu vaerä vae.

⁹ Pembogüera imbaerasɨ vae joko pe oime yave. Jare pere chupe reta: ‘Tumpa iporookuaía ou ma oväe peve.’

¹⁰ Ërei peo yave metei tëta guasu pe, jare joko pegua reta mbaetɨ oipota yave pemboresive, peë kaye rupi jare pere joko pegua reta pe:

¹¹ ‘Romotumo ɨvɨkúi perëta guasu pegua oya orepɨ re vae, peikuaa vaerä penoi ko teko vae. Ërei romombeu peve, Tumpa iporookuaía ou ma oväe peve.’

¹² Ërei che jae peve, Tumpa ojäa yave ɨvɨ pegua reta, jókuae tëta guasu pegua reta täta yaeta oiporara Sodoma pegua reta oiporara vae güi.

Tëta guasu reta oiporarata vae regua

¹³ Paravete, nde Corazín. Paravete, nde Betsaida. Echa Tiro jare Sidón pe mona, ayapo mɨakañɨ reta pepɨte pe ayapo vae yave, kuerae yae ma ko jae reta oeyata tëi iyemongeta ikavimbae vae, omonde reve temimonde mbɨatɨtɨ pegua, jare oguapɨ reve tanimbu re.

¹⁴ Ërei Tumpa oporojäa yave, pe Corazín jare Betsaida peiporara yaeta Tiro jare Sidón oiporara vae güi.

¹⁵ Jare nde Capernaum, ndeyemongeta pe tuichagüe yae ko reï. Ërei reyemomboukata omanogüe reta ñogüɨnoia pe.

¹⁶ Oyeapɨsaka peré vae oyeapɨsaka ko cheré. Ërei pereröɨro vae che ko chereröɨro. Jare chereröɨro vae chembou vae ko güɨröɨro.”

Setenta vae reta oyerova ye

¹⁷ Jare jókuae setenta vae reta oyerovia reve oyerova reta ye yave, jei reta Jesús pe: —OreYa, nderee re, aña reta re ave rogüɨnoi mbaepuere.

¹⁸ Jayave Jesús jei chupe reta: —Che aecha Satanás oa ara güi ama-vera rami.

¹⁹ Mase, amee ma peve mbaepuere pepuere vaerä pepɨ̈ro mboi re jare tumɨkarape re, jare penoi vaerä mbaepuere opaete tovaicho re, ngaraa etei ipuere mbae oyapo peve.

²⁰ Ërei agüɨye peyerovia mbaepuere aña reta re penoi vae re. Ërei peyerovia peree oyekuatía ma oï ara pe vae re.

Jesús oyerovia

²¹ Jókuae ora pe etei Jesús oyerovia jare jei: “Romboete cheRu, nde ko jae ara pegua reta jare ɨvɨ pegua reta iYa, echa reñomi mbaembae iyarakuaa vae reta güi, ërei reechauka oñemomichi vae reta pe. Ikavi ko cheRu. Echa jökorai ko jaekavi ndeve.”

²² Jayave jei vi: “CheRu omee ma cheve opaete mbaembae. Mbaetɨ kia oikuaa kavi cheregua, jaeño cheRu. Jaeramiño vi mbaetɨ kia oikuaa kavi cheRu regua, jaeño che jare che aikuaauka chupe vae reta.”

²³ Jayave oyerova omae jemimboe reta re jare jei chupe retaño: “Oyerovia ko, jókuae oecha pe reta peecha vae.

²⁴ Che jae peve, jeta ñeemombeúa reta jare mburuvicha guasu reta oipota tëi oecha pe reta peecha vae, ërei mbaetɨ oecha reta. Jare oipota tëi vi oendu reta pe reta peendu vae, ërei mbaetɨ oendu reta.”

Samariaɨgua ipɨakavi vae

²⁵ Metei ara metei mborookuai re oporomboe vae oyemboɨ Jesús jóvai jare jei chupe oyavɨuka vaerä: —Oporomboe vae, ¿mbae pa ayapota anoi vaerä tekove opambae vae?

²⁶ Jayave Jesús jei chupe: —¿Mbae pa oyekuatía oï mborookuai pe? ¿Mbae pa remongeta joko pe?

²⁷ Jayave jei Jesús pe: —Eaɨu ndeYa Tumpa opaete ndepɨa reve, opaete nderekove reve, jare opaete nepɨ̈rata reve jare opaete ndeyemongeta reve. Jaeramiño vi eaɨu nderapicha nde reyeaɨu rami.

²⁸ Jayave Jesús jei chupe: —Jaekavi rere. Eyapo jókuae jare reikoveta.

²⁹ Ërei jókuae mborookuai re oporomboe vae oipota oyereroviauka jupi vae rami ramo, oparandu Jesús pe: —¿Kia pa ko jae cherapicha?

³⁰ Jayave Jesús jei chupe: —Metei kuimbae ojo Jerusalén güi tëta Jericó kotɨ. Jare tape rupi oa imonda vae reta ipo pe, jare jae reta opaetei oitɨvɨro, ombopere jare oyuka tëi oeya reta.

³¹ Jare jese katu ou metei sacerdote jókuae tape rupi. Oecha yave jókuae kuimbae ipere vae, mombɨrɨ rupiño oasa chugüi.

³² Jaeramiño vi ou metei levita jókuae tape rupi. Jare oecha yave jókuae kuimbae ipere vae, mombɨrɨ rupiño vi oasa chugüi.

³³ Ërei metei Samariaɨgua ou jókuae tape rupi, jare ou oväe jókuae kuimbae ipere vae oïa pe yave oecha jare oiparareko omae jese.

³⁴ Jayave oya jese jare oipoano ipere reta asaite pe jare vino pe, jare oyokua chugüi. Jayave ombopo imburika re jare güɨraja metei o pe, joko pe oyangareko jese.

³⁵ Pɨareve pe Samariaɨgua ojota ma joko güi yave, güɨnoe mókoi denario omee o iya pe, jare jei chupe: “Eyangareko jese cheve. Jare oasa ete reiporu korepoti yave, amboekoviata ndeve ayu ye yave.”

³⁶ Jayave ndevegua jókuae mboapɨ reta güi, ¿kia nunga pa jókuae imonda vae reta ipo pe oa vae japicha ikavi vae?

³⁷ Jare mborookuai re oporomboe vae jei Jesús pe: —Jókuae oiparareko vae. Jayave Jesús jei chupe: —Ekua eyapo jae oyapo rami.

Jesús opou Marta jare María pɨri

³⁸ Jesús jare jemimboe reta yogüɨraja oväe metei tëta raɨ pe. Jare metei kuña Marta jee vae omboresive jo pe.

³⁹ Marta güɨnoi ipɨkɨɨ María jee vae. Jare María oguapɨ yandeYa iyɨpɨ pe oyeapɨsaka iñee re.

⁴⁰ Ërei Marta oyemoambeko oñemimo oï vae re. Jare oya Jesús re, jei chupe: —CheYa, ¿reechaä pa chepɨkɨɨ mbaetɨ chemborɨ? Ere chupe tou tachemborɨ.

⁴¹ Jayave yandeYa jei chupe: —Marta, Marta, reyemoambeko yae opaño mbaembae re.

⁴² Ërei oime meteiño mbae ikavi yae vae. Jare María oiparavo ikavi vae ndegüi. Jókuae ngaraa kia ipuere opɨ̈ro chugüi.