LEVÍTICO 8 - Biblia Guarani Tumpa Iñee

Sacerdote Aarón jare taɨ reta oñeñono tee oyeokuai vaerä yandeYa pe

¹ YandeYa jei Moisés pe:

² “Eraja Aarón jare taɨ reta, temimonde reta sacerdote pegua, olivo iasaite yeparavo pegua, toro taɨrusu vae oñemee cheɨ̈ro vaerä mbaeyoa re vae pegua, mókoi reve vecha kuimbae jare kanata raɨ mbɨyape oyembovumbae reta jɨru,

³ jare emboatɨ opaete vae tupao guakapi pegua jöke pe.”

⁴ Moisés oyapo yandeYa oyókuai rami, jare omboatɨ opaete vae tupao guakapi pegua jöke pe.

⁵ Jare Moisés jei yatɨ vae reta pe: “Jae ko kuae yandeYa omee oyeapo vaerä.”

⁶ Jayave Moisés oyókuai oya katu vaerä jese Aarón jare taɨ reta, jare oyoe ɨ pe.

⁷ Jare omboyemonde Aarón, jare oumbɨkua kuakuaa pe jaɨkue rupi omoñeapeva ñeapevaka pe, jare omboyemonde temimonde iyɨvambae pe, jare oumbɨkua kavi kuakuaa oï jese vae pe.

⁸ Jare oñono jese pɨtía regua jare oñono pɨpe ita Urim jare Tumim jee vae.

⁹ Jaɨkue rupi oñono äka-ɨru yemboetea pegua iñäka re, jare kuae äka-ɨru jesɨva re oñono jembipe vae oro pegua, äka-ɨru ikɨambae yandeYa oyókuai Moisés vae rami.

¹⁰ Jare Moisés oipɨɨ olivo iasaite yeparavo pegua, jare oñapiramo tupao guakapi pegua, jare opaete mbaembae reta oï pɨpe vae, jökorai oñono tee Tumpa peguarä.

¹¹ Jare oñapiramo jókuae olivo iasaite güi chiu ye mɨmba oyeyuka oyeapɨ jese vae re, jökorai oñono tee mɨmba oyeyuka oyeapɨ jese vae jare opaete jembiporu reta, ɨrɨru, ɨrɨru iguapɨka, oñeñono tee vaerä Tumpa pe.

¹² Jare opɨyere olivo iasaite yeparavo pegua Aarón iñäka re, jökorai oñeñono tee vaerä Tumpa isacerdoterä.

¹³ Jaɨkue rupi Moisés oyókuai oya katu vaerä jese Aarón taɨ reta, omondeuka chupe reta temimonde sacerdote pegua, oumbɨkua kuakuaa pe, jare oñono äka-ɨru reta jese yandeYa oyókuai Moisés rami.

¹⁴ Javoi güeruruka toro taɨrusu vae ñɨ̈ro pegua; Aarón jare taɨ reta oñono ipo jókuae mɨmba iñäka re.

¹⁵ Jare oñaseokɨ̈ti; jare Moisés oipɨɨ jugüɨgüe, omopöe ipoäka pɨpe jare opaetei oipichɨ guakarätiecha ñogüɨnoi mɨmba oyeyuka oyeapɨ jese vae re vae, jökorai oitɨo mɨmba oyeyuka oyeapɨ jese vae Tumpa peguarä, jare jugüɨ jembɨregüe opɨyere mɨmba oyeyuka oyeapɨ jese vae iyɨpɨ re, jare mɨmba oyeyuka oyeapɨ jese vae oñeñono tee opɨta jese Tumpa iñɨ̈ro vaerä mbaeyoa re.

¹⁶ Jaɨkue rupi oipɨɨ opaete ikɨragüe oï ichuri churigüe re vae, iyambia oï ipɨa re vae, ipɨ̈rɨkɨti reta jare ikɨragüe oñova vae, jare Moisés oapɨ mɨmba oyeyuka oyeapɨ jese vae re;

¹⁷ ërei toro taɨrusu vae ipiregüe, isoogüe, jare jepotigüe oapɨ tata pe teyupa güi ikatu pe, yandeYa oyókuai Moisés vae rami.

¹⁸ Jaɨkue rupi Moisés oyókuai güeru vaerä vecha kuimbae opaetei oyeapɨ vaerä vae, Aarón jare taɨ reta oñono ipo jókuae mɨmba iñäka re.

¹⁹ Jare oñaseokɨ̈ti, jare jugüɨgüe pe Moisés oñapiramo mɨmba oyeyuka oyeapɨ jese vae iyɨke yɨke re,

²⁰ jare Moisés opa omboyao yao vecha kuimbae isoogüe, jare oapɨ iñäkagüe jare oyemboyao yaogüe jare ikɨragüe.

²¹ Jaɨkue rupi oyoe ɨ pe ichuri churigüe jare iugüe reta, jare Moisés oapɨ opaetei vecha kuimbae mɨmba oyeyuka oyeapɨ jese vae re; mɨmba oyeyukagüe opaetei oyeapɨ vae ko, mbota ipiche katu oyeapɨ yandeYa pe vae, yandeYa oyókuai Moisés vae rami.

²² Jaɨkue rupi Moisés güeruruka ïru vecha kuimbae, sacerdote reta oñeñono tee pegua, Aarón jare taɨ reta oñono ipo jókuae mɨmba iñäka re.

²³ Jare Moisés oñaseokɨ̈ti; jare jókuae tugüɨ güi oekɨ oipichɨ Aarón inambi iyakatu kotɨgua jembeɨ ɨvɨkotɨgua re, ipoäka guasu jare ipɨ̈sa guasu iyakatu kotɨgua re.

²⁴ Kuae jaɨkue rupi oenɨi Aarón taɨ reta oya katu vaerä jese, jare Moisés oipichɨ jae reta inambi iyakatu kotɨgua jembeɨ ɨvɨkotɨgua re, jare ipoäka guasu jare ipɨ̈sa guasu iyakatu kotɨgua re; jare jugüɨ jembɨregüe pe Moisés oñapiramo mɨmba oyeyuka oyeapɨ jese vae iyɨke yɨke re.

²⁵ Jaɨkue rupi Moisés oipɨɨ ikɨragüe, juguaigüe, jare opaete ikɨra oï ichuri churigüe re vae, iyambia oï ipɨa re vae, jare ipɨ̈rɨkɨti reta ikɨra reve, jare iu iyakatu kotɨgua.

²⁶ Jare kanata raɨ mbɨyape oyembovumbae reta güeru pɨpe yandeYa jóvai vae güi, oekɨ metei mbɨyape oyembovumbae jare metei mbɨyape olivo iasaite pe oyemómbɨu vae, jare metei mbɨyape ipïreriasɨ vae, jare oñono ikɨragüe ndive jare iu iyakatu kotɨgua ndive.

²⁷ Opaete kuae reta oñono Aarón ipo pe, jare taɨ reta ipo pe, güɨrökuavee reta mbota oñererökuavee oñemee yandeYa jóvai vae.

²⁸ Jaɨkue rupi Moisés oipɨɨ opaete jókuae mbaembae reta jae reta ipo güi, jare oapɨ mɨmba oyeyuka oyeapɨ jese vae re mɨmba oyeyukagüe opaetei oyeapɨa pe; jae ko sacerdote reta oñeñono tee vae pegua mbae ipiche katu vae, mbota oyeapɨ yandeYa pe vae.

²⁹ Jare Moisés oipɨɨ ipɨtiagüe jare güɨrökuavee mbota oñererökuavee oñemee vae yandeYa jóvai, jókuae mbota ñeñono tee pegua topɨta Moisés imbaerä, yandeYa oyókuai vae rami.

³⁰ Javoi Moisés oipɨɨ michi mi olivo iasaite yeparavo pegua güi, jare michi mi tugüɨ mɨmba oyeyuka oyeapɨ jese vae re oï vae güi, jare oñapiramo Aarón jare jemimonde, taɨ reta jare jemimonde reta; jökorai oñono tee Aarón jare jemimonde sacerdote pegua, jare taɨ reta jare jemimonde sacerdote pegua reve.

³¹ Jare Moisés jei Aarón pe jare taɨ reta pe: “Pemboyɨ soo tupao guakapi pegua jöke pe jare peu joko pe mbɨyape ñeñono tee pegua kanata raɨ pe oï vae ndive, yandeYa jei rami: ‘Aarón jare taɨ reta tou jókuae soo.’

³² Mbɨyape jare soo jembɨregüe peapɨ tata pe.

³³ Agüɨye peë chiu ara tupao guakapi pegua ikësea güi, oyembopo regua ara ñeñono tee pegua, echa chiu ara pe pemboapɨta peiko tee vaerä Tumpa isacerdote.

³⁴ Kuae yayapo añave, echa körai yandeokuai yandeYa yayapo vaerä, iñɨ̈ro vaerä mbaeyoa re.

³⁵ Chiu ara peï tupao guakapi pegua jöke pe, ara pe jare pɨ̈tu yave. Peyapo yandeYa iporookuai agüɨye vaerä pemano, echa jökorai cheokuai yandeYa jae vaerä peve.”

³⁶ Aarón jare taɨ reta oyapo opaete mbaembae yandeYa oyókuai Moisés rupi vae.