LEVÍTICO 6 - Biblia Guarani Tumpa Iñee

Mɨmba reta oyeyuka mborombotavɨ re vae

¹ YandeYa jei Moisés pe:

² “Kia nunga vae iyoa yave, oyapota tëi vae oyapoä yave, oyavɨ ko chekotɨ, japicha güi oikuaku yave mbae oyókuai oeya jese vae, ani mbae oeya ipo pe vae, ani mbae oñomi ani ndaye rupi mbae opɨ̈ro iyeupe japicha güi yave,

³ ani mbae okañɨgüe oväe vae oikuaku yave, jare oyeepɨ yave añete rami Tumpa jee re oipotagüe mbae nunga rupi kuimbae reta iyoa vae,

⁴ jökorai iyoa jare oporombopɨatɨtɨ yave, tomboekovia jókuae oñomigüe, ani indaye rupi mbae opɨ̈ro iyeupe vae, ani jókuae oyókuai tëi jese vae, ani okañɨgüe oväe vae re,

⁵ ani opaete mbae re oyeepɨ añete rami Tumpa jee re vae, pandepo yave tomboekovia iya pe pandepo reve jare metei ye, jókuae ara omee yave mɨmba cheɨ̈ro vaerä jókuae oyapogüe re.

⁶ Togüeru cheve iyoa re jɨmba reta güi metei vecha kuimbae jete kavi vae, nde emae kavi jepɨ re, jare tomee sacerdote pe, cheɨ̈ro vaerä iyoa re.

⁷ Jare sacerdote tomee cheve cheɨ̈ro vaerä chupe iyoa, jare cheɨ̈rota chupe, oipotagüe mbae nunga rupi iyoa vae re.”

Mborookuai reta mɨmba oyeyukagüe opaetei oyeapɨ vae regua

⁸ YandeYa jei ye Moisés pe:

⁹ “Eyókuai Aarón jare taɨ reta, jare ere chupe reta: Kuae jae mborookuai reta kërai oyeapo vaerä mɨmba oyeyukagüe opaetei oyeapɨ vae. Jókuae mɨmba oyeapɨta vae toï tata iárambo mɨmba oyeyuka oyeapɨ jese vae re opaete pɨ̈tu köe regua, agüɨye togüe tata.

¹⁰ Jare sacerdote tomonde jemimonde igüɨ pegua lino pegua jare temimonde lino pegua, jare opa ma ókai mɨmba yave, tombosɨrɨ itanimbugüe mɨmba oyeyuka oyeapɨ jese vae güi, jare toñono mɨmba oyeyuka oyeapɨ jese vae iyɨpɨ pe.

¹¹ Jaɨkue rupi toipoepɨ jemimonde reta, jare togüɨnoe jókuae tanimbu teyupa güi ikatu pe, ikɨambaea pe.

¹² Jare mɨmba oyeyuka oyeapɨ jese vae re tata jendɨ oï vae agüɨye togüe. Sacerdote reta toñono yepea jese ndeimbove ñavo, jare toñono kavi jese mɨmba oyeyukagüe opaeteita oyeapɨ vae, jare toapɨ vi jese mbota yembopɨakatu pegua ikɨragüe.

¹³ Tijendɨ avei mɨmba oyeyuka oyeapɨ jese vae re tata oï vae. Agüɨye togüe.

Mborookuai reta kërai oyeapo vaerä mbota temitɨ jäɨgüe

¹⁴ Jae ko kuae mborookuai kërai oyeapo vaerä mbota temitɨ jäɨgüe, Aarón taɨ reta tomee cheve, mɨmba oyeyuka oyeapɨ jese vae jóvai.

¹⁵ Jare jókuae mbota trigokúi ipɨuasɨ vae güi toekɨ metei poagua, jare olivo iasaite, jare ikäti kavi vae incienso mbota ndive oï vae jare toapɨ mɨmba oyeyuka oyeapɨ jese vae re, jókuae mbota reta oñemee vae jekovia pe, mbae ipiche katu vae ko cheveguarä.

¹⁶ Jare jókuae mbota güi jembɨregüe topɨta Aarón jare taɨ reta peguarä; oyembovumbae tou reta oñeñono teea pe, tupao guakapi pegua joka pe tou reta.

¹⁷ Agüɨye tomboyɨ reta mbae oyembovu pɨpe vae ndive; amee ko chupe reta mbota oyeapɨ oñemee cheve vae güi jae reta imbaerä; jae ko mbae oñeñono tee kavi yae cheve vae, mɨmba oyeyukagüe mbaeyoa re vae rami, jare mɨmba oyeyuka ñɨ̈ro peguarä vae rami.

¹⁸ Opaete kuimbae Aarón iñemuña reta tou joko güi, mborookuai oiko avei vae toiko peveguarä jare peñemuña reta peguarä kuae nunga mbota oyeapɨ cheveguarä vae, kuae ara güive tenonde kotɨ. Oipotagüe oñátai vae toñeñono tee topɨta oñeñono kavi ye regua.”

Sacerdote reta mbota omee vae

¹⁹ YandeYa jei ye Moisés pe:

²⁰ “Kuae mbota tomee Aarón jare taɨ reta cheve, jókuae ara oyeparavo reta yave sacerdoterä: Mókoi kilo trigokúi ipɨuasɨ vae, tomee mbɨte rupi ndeimbove yave jare mbɨte rupi kaaru yave, temitɨ jäɨgüe ara ñavo oñemee rami.

²¹ Takɨpe pe tomboyɨ olivo iasaite pe oyemómbɨu vae, oyɨgüe togüeru, jare oñepɨ̈saagüe tomee ipiche katu vae cheveguarä.

²² Jare Aarón taɨ reta güi oyeparavo sacerdote tenondeguarä Aarón jekovia pe vae, tomee vi mbota; cheporookuai ko jekuae avei pegua, jókuae mbota opaetei toyeapɨ.

²³ Opaete mbota temitɨ jäɨgüe sacerdote omee vae; toyeapɨ opaetei, agüɨye toyeu.”

Mborookuai reta kërai oyeapo vaerä mɨmba oyeyuka mbaeyoa re vae

²⁴ YandeYa jei Moisés pe:

²⁵ “Ere Aarón jare taɨ reta pe: Jae ko kuae mborookuai reta kërai oyeapo vaerä mɨmba oñemee Tumpa iñɨ̈ro vaerä mbaeyoa re vae, mɨmba oyeyukagüe opaetei oyeapɨta vae oyeyukaa pe toñaseokɨ̈ti mɨmba mbaeyoa regua cheróvai; kuae ko mbae oñeñono tee kavi yae cheveguarä vae.

²⁶ Jókuae sacerdote omee kuae mbota kia iyoa re vae, tou jókuae soo; tou tupao guakapi pegua joka pe, oñeñono teea pe.

²⁷ Oipotagüe mbae oñátai jókuae mɨmba isoo vae toñeñono tee topɨta oñeñono kavi ye regua; oime yave jugüɨgüe otɨi temimonde re, toyoe jókuae jugüɨ oï jese vae oñeñono teea pe.

²⁸ Jare ɨvɨyapepo oyemboyɨ jókuae soo pɨpe vae, toyeyoka; ërei oyemboyɨ yave yapepo jiero iyu vae pegua pe, toyekɨtɨ jare toyeyoe ɨ pe.

²⁹ Opaete sacerdote reta tou joko güi. Kuae ko mbae oñeñono tee kavi yae Tumpa peguarä vae.

³⁰ Ërei agüɨye toyeu mɨmba jugüɨgüe oyereroike tupao guakapi pegua pe vae isoogüe, jókuae cheɨ̈ro vaerä mbaeyoa re vae. Jókuae mbota opaetei toyeapɨ.