LEVÍTICO 4 - Biblia Guarani Tumpa Iñee

Oikuaambae reve iyoa vae regua mbota

¹ YandeYa jei Moisés pe:

² “Ere Israel iñemuña reta pe: Kia nunga vae oyavɨ oikuaambae reve rupi iyoa yave cheporookuai reta kotɨ, agüɨyeta tëi oyeapo vae güi oyapo yave metei:

³ Sacerdote tenondegua etei iyoa yave omboekouka vi ko tëta pegua reta, jökorai yave tomee cheve metei toro taɨrusu jete kavi vae, cheɨ̈ro vaerä mbaeyoa re.

⁴ Togüeru toro taɨrusu vae tupao guakapi pegua ikësea jöke pe, cheróvai, jare toñono ipo toro taɨrusu vae iñäka re, jare toñaseokɨ̈ti cheróvai.

⁵ Javoi toekɨ toro taɨrusu vae jugüɨgüe, jare togüeru tupao guakapi pegua japɨpe;

⁶ jare tomoäkɨ ipoäka jókuae tugüɨ pe, jare toñapiramo pɨpe chiu ye cheróvai, asoya o mbaemboetea imboyaoa kotɨ.

⁷ Jare toipichɨ jókuae tugüɨ guakarätiecha ñogüɨnoi incienso ikäti kavi yae vae oyeapɨ jese vae re, tupao guakapi pegua pe cheróvai oï vae; jare jókuae toro taɨrusu vae jugüɨ jembɨregüe topɨyere mɨmba oyeyuka oyeapɨ jese vae iyɨpɨ re, mɨmba oyeyukagüe opaetei oyeapɨa re, tupao guakapi pegua jöke pe oï vae.

⁸ Jare jókuae toro taɨrusu vae oyeyuka cheɨ̈ro vaerä mbaeyoa re vae güi toekɨ opaetei ikɨragüe; ikɨra oñova ichuri churigüe vae,

⁹ ipɨ̈rɨkɨti reta jare ikɨragüe oñova vae jare ikupepɨte japɨpe ikɨragüe oï vae; jare ipɨ̈rɨkɨti reta ndive toekɨ iyambia oï ipɨa re vae,

¹⁰ toro taɨrusu vae mɨmba oyeyukagüe yembopɨakatu pegua güi oyeekɨ rami; jare toapɨ mɨmba oyeyuka oyeapɨ jese vae re, mɨmba oyeyukagüe opaetei oyeapɨa pe.

¹¹ Ërei ipiregüe, jare opaete isoogüe, iñäkagüe, ipɨgüe reta, ichuri churigüe jare jepotigüe,

¹² opaetei toñerenoe teyupa güi ikɨambaea pe, tanimbu oyemomboa pe, jare joko pe toapɨ reta tata pe yepea iárambo.

Israel iñemuña reta iyoa regua

¹³ Israel iñemuña reta oyavɨ yave oikuaambae reve, jare mbaetɨ oikuaa ñogüɨnoi oyavɨ ko cheporookuai kotɨ vae; agüɨyeta tëi oyeapo vae oyapo reta vae rupi jeko reta,

¹⁴ jaɨkue rupi ou oikuaa reta mbaeyoa oyapogüe yave, tomee reta toro taɨrusu vae cheɨ̈ro vaerä mbaeyoa re, togüeru reta tupao guakapi pegua jóvai.

¹⁵ Jare Israel iñemuña itenondegua reta toñono ipo toro taɨrusu vae iñäka re cheróvai, jare joko pe toñaseokɨ̈ti jókuae toro taɨrusu vae.

¹⁶ Jare sacerdote tenondegua vae togüɨroike toro taɨrusu vae jugüɨgüe tupao guakapi pegua pe,

¹⁷ jare tomoäkɨ ipoäka jugüɨgüe pe, jare toñapiramo chiu ye che peYa jóvai tupao guakapi pegua asoya o imboyaoa kotɨ.

¹⁸ Jare jókuae tugüɨ toipichɨ mɨmba oyeyuka oyeapɨ jese vae re guakarätiecha ñogüɨnoi vae re cheróvai tupao guakapi pegua pe, jare jembɨregüe topɨyere mɨmba oyeyuka oyeapɨ jese vae iyɨpɨ re, mɨmba oyeyukagüe opaetei oyeapɨa re, tupao guakapi pegua jöke pe oï vae.

¹⁹ Jare toekɨ opaetei toro taɨrusu vae ikɨragüe, jare toapɨ mɨmba oyeyuka oyeapɨ jese vae re.

²⁰ Jare jókuae toro taɨrusu vae toyapo, jókuae ïru toro taɨrusu vae oñemee Tumpa iñɨ̈ro vaerä mbaeyoa re rami; jökorai etei toyapo sacerdote, jae reta iyoa re cheɨ̈ro vaerä; jare cheɨ̈rota chupe reta.

²¹ Jare togüɨnoe toro taɨrusu teyupa güi, jare toapɨ tenonde toro taɨrusu oapɨ rami; cheɨ̈ro vaerä Israel iñemuña reta iyoa re.

Mburuvicha guasu jare iyɨvɨrigua reta iyoa regua

²² Metei mburuvicha oyavɨ yave oikuaambae reve che peYa Tumpa iporookuai reta kotɨ, agüɨyeta tëi oyeapo vae güi oyapo yave, iyoa ko.

²³ Javoi ou oikuaa yave mbaeyoa oyapogüe re, tomee mbotarä kavara kuimbae jete kavi vae.

²⁴ Toñono ipo kavara kuimbae iñäka re, jare toñaseokɨ̈ti mɨmba oyeyukagüe opaetei oyeapɨ vae oñeaseokɨ̈tía pe cheróvai, cheɨ̈ro vaerä mbaeyoa re vae ko.

²⁵ Jare sacerdote tomopöe ipoäka jókuae mɨmba jugüɨgüe pe jare toipichɨ mɨmba oyeyuka oyeapɨ jese vae re guakarätiecha ñogüɨnoi vae re mɨmba oyeyukagüe opaetei oyeapɨa pe, jare jugüɨ jembɨregüe topɨyere iyɨpɨ re.

²⁶ Jare opaete ikɨragüe toapɨ mɨmba oyeyuka oyeapɨ jese vae re, mbota yembopɨakatu pegua ikɨragüe rami; jökorai toyapo sacerdote jókuae mburuvicha iyoa re, cheɨ̈ro vaerä iyoa re, jare cheɨ̈rota chupe.

Oipotagüe iyoa vae regua

²⁷ Kia nunga vae kuae tëta pegua oyavɨ yave oikuaambae reve che peYa iporookuai reta kotɨ, agüɨyeta tëi oyeapo vae güi oyapo yave, iyoa ko,

²⁸ javoi ou oikuaa yave mbaeyoa oyapogüe re, togüeru mbotarä metei kavara kuña jete kavi vae iyoa re.

²⁹ Jare toñono ipo jókuae mɨmba iñäka re, cheɨ̈ro vaerä iyoa re, jare toñaseokɨ̈ti mɨmba oyeyukagüe opaetei oyeapɨa pe.

³⁰ Javoi sacerdote tomopöe ipoäka jugüɨgüe pe jare toipichɨ mɨmba oyeyuka oyeapɨ jese vae re guakarätiecha ñogüɨnoi vae re, mɨmba oyeyukagüe opaetei oyeapɨa pe, jare jugüɨ jembɨregüe topɨyere iyɨpɨ re.

³¹ Jare toekɨ chugüi, opaetei ikɨragüe mɨmba oyeyukagüe yembopɨakatu pegua ikɨragüe oyeekɨ rami, jare sacerdote toapɨ mɨmba oyeyuka oyeapɨ jese vae re, ipiche katu vaerä cheve, jökorai sacerdote toyapo chupe, cheɨ̈ro vaerä iyoa re, jare cheɨ̈rota chupe.

³² Ërei güeru yave vecha mbaeyoa re, togüeru vecha kuña jete kavi vae.

³³ Jare toñono ipo jókuae mɨmba iñäka re, jare toñaseokɨ̈ti cheɨ̈ro vaerä iyoa re, mɨmba oyeyukagüe opaetei oyeapɨ vae oñeaseokɨ̈tía pe.

³⁴ Jaɨkue rupi sacerdote tomopöe ipoäka jókuae mɨmba jugüɨgüe pe, jare toipichɨ mɨmba oyeyuka oyeapɨ jese vae re guakarätiecha ñogüɨnoi vae re, mɨmba oyeyukagüe opaetei oyeapɨa pe, jare jembɨregüe topɨyere iyɨpɨ re.

³⁵ Jare toekɨ chugüi opaetei ikɨragüe mɨmba oyeyukagüe yembopɨakatu pegua ikɨragüe oyeekɨ rami, jare sacerdote toapɨ mɨmba oyeyuka oyeapɨ jese vae re mbota oyeapɨ vae ndive cheve, jökorai sacerdote toyapo chupe cheɨ̈ro vaerä iyoa re, jare tacheɨ̈ro chupe.