LEVÍTICO 3 - Biblia Guarani Tumpa Iñee

Mbota reta yembopɨakatu pegua

¹ Kia nunga vae omee jɨmba reta güi mɨmba oyeyuka yembopɨakatu peguarä yave, tomee toro ani guaka jete kavi vae cheve.

² Jare jókuae mbota omee vae toñono ipo mɨmba iñäka re, jare toñaseokɨ̈ti tupao guakapi pegua ikësea jöke pe, jare sacerdote reta Aarón taɨ reta toñapiramo jugüɨgüe pe mɨmba oyeyuka oyeapɨ jese vae iyɨke yɨke re.

³ Javoi tomee mɨmba oyeyukagüe yembopɨakatu pegua güi, mbota oyeapɨ vae cheve, ikɨra oñova ichuri churigüe vae,

⁴ ipɨ̈rɨkɨti reta jare ikɨragüe oñova vae, jare ikupepɨte japɨpe ikɨragüe oï vae, jare ipɨ̈rɨkɨti reta ndive toekɨ iyambia oï ipɨa re vae.

⁵ Opaete kuae reta Aarón taɨ reta toapɨ mɨmba oyeyuka oyeapɨ jese vae re, mɨmba oyeyukagüe opaetei oyeapɨ vae ndive, yepea tata pe oï vae iárambo; mbota ipiche katu vae ko cheveguarä.

⁶ Ërei kia nunga vae omee jɨmba reta güi mɨmba oyeyukagüe yembopɨakatu peguarä cheve yave, tomee jete kavi vae vecha kuimbae ani vecha kuña, kavara kuimbae ani kavara kuña.

⁷ Jókuae mbota, vecha kuimbae taɨrusu vae ko yave, tomee cheróvai.

⁸ Toñono ipo jókuae mɨmba iñäka re, jare jaɨkue rupi toñaseokɨ̈ti tupao guakapi pegua jóvai; jare Aarón taɨ reta toñapiramo jugüɨgüe pe mɨmba oyeyuka oyeapɨ jese vae iyɨke yɨke re.

⁹ Jare mɨmba yembopɨakatu pegua güi tomee cheve mbotarä oyeapɨ vae, ikɨragüe, juguai joko reve, toekɨ juguaiɨpɨ rupi, ikɨra oñova ichuri churigüe vae.

¹⁰ Jaeramiño vi ipɨ̈rɨkɨti reta, jare ikɨragüe oñova vae, jare ikupepɨte japɨpe ikɨragüe oï vae, jare ipɨ̈rɨkɨti reta ndive toekɨ iyambia oï ipɨa re vae.

¹¹ Jare sacerdote toapɨ kuae reta mɨmba oyeyuka oyeapɨ jese vae re; mbota tembíu oyeapɨ vae ko cheveguarä.

¹² Jókuae mbota, kavara ko yave tomee cheróvai.

¹³ Toñono ipo jókuae mɨmba iñäka re, jare toñaseokɨ̈ti tupao guakapi pegua jóvai; jare Aarón taɨ reta toñapiramo jugüɨgüe pe mɨmba oyeyuka oyeapɨ jese vae iyɨke yɨke re.

¹⁴ Jaɨkue rupi jókuae mbota güi tomee mbota oyeapɨ vae cheve; ikɨra oñova ichuri churigüe vae.

¹⁵ Ipɨ̈rɨkɨti reta jare ikɨragüe oñova vae, jare ikupepɨte japɨpe ikɨragüe oï vae, jare ipɨ̈rɨkɨti reta ndive toekɨ iyambia oï ipɨa re vae.

¹⁶ Jare sacerdote toapɨ kuae reta mɨmba oyeyuka oyeapɨ jese vae re; mbota tembíu oyeapɨ ipiche katu vae ko cheveguarä. Opaete mɨmba ikɨragüe chembae ko.

¹⁷ Mborookuai jekuae avei pegua toiko peveguarä jare peraɨ reta peguarä, oipota rupi peikoa rupi, agüɨye peu mbaekɨra ani tugüɨ.”