LEVÍTICO 27 - Biblia Guarani Tumpa Iñee

Mbaembae reta oñeñono tee Tumpa pe vae

¹ YandeYa jei Moisés pe:

² “Ere Israel iñemuña reta pe: Kia nunga vae oñererökuaveegüe omboepɨta yave cheve, tomboepɨ metei kuimbae jepɨ rupi.

³ Metei kuimbae veinte año vae güive sesenta año güɨnoi vae pe, tijepɨ cincuenta siclo korepoti o mbaemboetea pe korepoti ipoɨ oñejäa rami;

⁴ kuña ko yave tijepɨ treinta siclo korepoti.

⁵ Pandepo año vae güive veinte año güɨnoi vae pe, kuimbae tijepɨ veinte siclo korepoti, jare kuña tijepɨ payandepo siclo korepoti.

⁶ Jare metei yasɨ vae güive pandepo año güɨnoi vae pe, kuimbae tijepɨ pandepo siclo korepoti jare kuña tijepɨ mboapɨ siclo korepoti.

⁷ Ërei sesenta año vae güive jenonde kotɨ tijepɨ quince siclo korepoti, jare kuña tijepɨ payandepo siclo korepoti.

⁸ Ërei paravete yae yave, jare mbaetɨ oupitɨ omboepɨ vaerä oñeñono jepɨ chupe rami yave, toyereraja sacerdote jóvai, jare jae tomae jese mbovɨ ra jepɨta vae, jókuae ñererökuavee oyapo vae ipuere omboepɨ rupi.

⁹ Mɨmba ipuere oñemee cheve vae nunga ko yave, toñeñono tee opaete cheve,

¹⁰ agüɨye toyepoepɨ ïru mɨmba ndive, ikavi vae ikavimbae ndive ani ikavimbae ikavi vae ndive. Oyepoepɨ yave, mókoi reve toñeñono tee Tumpa pe.

¹¹ Mɨmba oyeumbae ko oñemee cheve yave, toyereraja sacerdote pe

¹² jare jae tomae jese mbovɨ ra jepɨta vae, jókuae mɨmba ikavi rupi. Sacerdote omombeu jepɨ rami toyemboepɨ,

¹³ ërei iya yeño ikɨ̈reɨ ogua yave tomboepɨ omoïru reve jepɨ, pandepo güi metei ye,

¹⁴ Kia nunga vae oñono tee jo cheveguarä yave, sacerdote tomae jese mbovɨ ra jepɨta vae, jókuae o ikavi rupi. Sacerdote omombeu jepɨ rami toyemboepɨ.

¹⁵ Ërei iya yeño ikɨ̈reɨ ogua yave tomboepɨ omoïru reve jepɨ, pandepo güi metei ye, jare topɨta ye imbaerä.

¹⁶ Kia nunga vae oñono tee iɨvɨ cheveguarä yave, jókuae ɨvɨ tijepɨ mbaagüɨye omee rupi, dosciento veinte litro cebada vae tijepɨ cincuenta siclo korepoti.

¹⁷ Jókuae ɨvɨ oñeñono tee yave año yeyora güire, topɨta mbovɨ ko jepɨ oñeñono vae ramiño.

¹⁸ Ërei año yeyora pegua güi jaɨkue rupi ɨvɨ oñeñono tee yave, sacerdote toipapa mbovɨ año ra oata oupitɨ vaerä ïru año yeyora pegua vae, jare tomombeu mbovɨ ra jepɨ vae, ërei tombogüeyɨ jepɨ.

¹⁹ Jare jókuae ɨvɨ omee vae yeño ikɨ̈reɨ ogua yave, tomboepɨ omoïru reve jepɨ, pandepo güi metei ye, jare jókuae ɨvɨ topɨta ye imbaerä.

²⁰ Ërei mbaetɨ yave ogua ye, jare ɨvɨ oñemee ïru vae pe yave, ngaraa ye ma ipuere ogua.

²¹ Jare año yeyora pegua pe jókuae ɨvɨ oyeyora vae, toñeñono tee topɨta cheveguarä, topɨta sacerdote imbaerä.

²² Kia nunga vae omee ɨvɨ oguagüe cheve yave; iñemuñagüe reta omboyao chupe vaeä vae yave,

²³ sacerdote tomae jókuae ɨvɨ iya ndive mbovɨ ra jepɨta vae, mbovɨ año ra oata oupitɨ vaerä año yeyora pegua, jare jókuae ɨvɨ iya tomboepɨ jókuae ara voi, jepɨ omombeu chupe rupi jare toñono tee cheve.

²⁴ Jare año yeyora pegua pe, toñemee ye iyagüe pe, echa jae ko iya ete.

²⁵ Opaete mbaerepɨ nde reñonogüe toiko o mbaemboetea pe korepoti ipoɨ oñejäa rami, veinte geras siclo ñavo.

²⁶ Ërei opaete mɨmba imembɨrɨpɨ reta, che peYa imbae ko membɨrɨpɨ jeko pegua, mbaetɨ kia ipuere oñono tee cheveguarä, toro, vecha ani kavara, echa chembae ko.

²⁷ Ërei mɨmba reta oyeumbae vae yave, pepuere pegua ye jepɨ oñeñono rupi, jare pemboepɨ pemoïru reve jepɨ, pandepo güi metei ye. Ërei mbaetɨ pepuere pegua ye yave, toñemee oipotagüe pe, jepɨ oñeñono rupi.

²⁸ Ërei mbaetɨ eteita oñemee ani oyegua mbae oñemee oñeñono tee cheve vae, kuimbae, mɨmba ani ɨvɨ, opaete mbae oñeñono tee vae, toñeñono tee kavi yae cheveguaräño.

²⁹ Mbaetɨ eteita kia ipuere ogua yepopeyu pe oï vae; jókuae nunga tomano.

³⁰ Opaete ɨvɨ omoñemuña vae, temitɨ jäɨ, ɨvɨra reta ia payandepo güi metei chembae ko, toñeñono tee cheve.

³¹ Kia nunga vae oipota yave omboepɨ jókuae payandepo güi metei yave, tomboepɨ omoïru reve jepɨ, pandepo güi metei ye.

³² Jare opaete payandepo güi metei vae toñeñono tee cheve, guaka reta, vecha reta jare kavara reta peipapa yave;

³³ agüɨye toñemae ikavi vae re ani ikavimbae vae re, agüɨye vi toyepoepɨ ïru ndive. Ërei oyepoepɨ yave, jókuae jekovia ndive toñono tee Tumpa pe; agüɨye toñemee.”

³⁴ Jae ko kuae mborookuai reta yandeYa omee Moisés pe, ɨvɨtɨ Sinaí re, Israel iñemuña reta peguarä vae.