LEVÍTICO 23 - Biblia Guarani Tumpa Iñee

Arete guasu reta mbaemboete pegua

¹ YandeYa jei Moisés pe:

² “Ere Israel iñemuña reta pe: Peyapo arete reta ikavi yae vae cheve, pemoërakua yemboatɨ guasu mbaemboete pegua, jae kuae reta:

³ Peparavɨkɨ ova ara, ërei chiúa ara pe peputuu, ara mbutuu pegua ko, yemboatɨ mbaemboete pegua ko. Agüɨye peyapo mbae nunga mbaravɨkɨ, ara mbutuu pegua ko cheveguarä, peyomboatɨ oipota rupi peikoa rupi.

⁴ Jae kuae arete reta mbaemboete pegua cheveguarä, yemboatɨ reta mbaemboete pegua ko; kuae ara oväe ñavo peyomboatɨ:

⁵ Tenondegua yasɨ ara catorce pe, kaaru ma yave, che peYa iPascua ko.

⁶ Jare ara quince pe, jókuae yasɨ mbɨyape reta iarete mbaemboete pegua ko cheveguarä; chiu ara rupi peu mbɨyape oyembovumbae.

⁷ Tenondegua ara pe peyapo yemboatɨ mbaemboete pegua; agüɨye mbae nunga mbaravɨkɨ ipoɨgüe peyapo.

⁸ Jare pemee cheve chiu ara mbota oyeapɨ vae; jare chiúa ara pe peyapo yemboatɨ mbaemboete pegua; agüɨye mbae nunga mbaravɨkɨ ipoɨgüe peyapo.”

Arete mbaagüɨyerɨpɨ regua

⁹ YandeYa jei Moisés pe:

¹⁰ “Ere Israel iñemuña reta pe: Peike ma yave ɨvɨ che amee pevea pe, jare peipoo ma yave pembaagüɨyerɨpɨ, peru metei yokuaa sacerdote pe, jókuae pembaagüɨyerɨpɨ güi.

¹¹ Jare sacerdote togüɨrökuavee tomee jókuae mbota cheróvai chembopɨakatu vaerä, ara mbutuu pegua güi pɨareve pe togüɨrökuavee tomee.

¹² Jókuae ara pemee yave trigo iagüe, pemee vecha kuimbae taɨrusu vae metei año vae, jete kavi vae, mɨmba oyeyukagüe opaetei oyeapɨ vae cheve.

¹³ Peru vi irundɨ kilo y medio trigokúi ipɨuasɨ vae olivo iasaite pe oyemómbɨu vae, mbota oyeapɨ vaerä, mbae ipiche katu yae vae ko cheveguarä, jare metei litro vino mbota oyepɨyere vae.

¹⁴ Agüɨye peu mbɨyape ani trigo jäɨ oyeimbegüe ani ipɨaugüe, ndei peraja mbove mbotarä Tumpa pe, kuae mborookuai toiko avei peve jare peñemuña reta pe, oipota rupi peikoa rupi.

¹⁵ Peipapa chiu semana kavi ara mbutuu pegua güire, mbota trigo iagüe oñererökuavee oñemee güire.

¹⁶ Peipapa chiu ara mbutuu pegua jare metei ara ye, opaete reve cincuenta ara, jayave pemee mbota trigo pɨau cheve,

¹⁷ jare peikoa güi peraja mókoi mbɨyape mbota oñererökuavee vaerä; peyapo mbɨyape oyembovugüe irundɨ kilo vae, trigokúi ipɨuasɨ vae pegua, mbota mbaagüɨyerɨpɨ oñemee vaerä cheve.

¹⁸ Jókuae mbɨyape reta ndive pemee mɨmba jete kavi vae: Chiu vecha kuimbae taɨrusu vae metei año vae, metei toro taɨrusu vae, mókoi vecha kuimbae; mɨmba oyeyukagüe opaetei oyeapɨ vaerä jare metei litro vino mbota oyepɨyere vaerä, mbota oyeapɨ ipiche katu vae ko cheveguarä.

¹⁹ Pemee vi metei kavara kuimbae oyeyukagüe cheɨ̈ro vaerä mbaeyoa re, jare mókoi vecha kuimbae taɨrusu vae metei año vae mbota yembopɨakatu pegua.

²⁰ Jare sacerdote togüɨrökuavee tomee cheróvai, mbɨyape mbaagüɨyerɨpɨ pegua ndive jare mókoi vecha kuimbae taɨrusu vae. Mbae oñeñono tee cheve vae ko, jare topɨta sacerdote peguarä.

²¹ Jókuae ara peyapo yemboatɨ mbaemboete pegua, agüɨye mbae nunga mbaravɨkɨ ipoɨgüe peyapo; mborookuai jekuae avei pegua toiko peve jare peñemuña reta peguarä oipota rupi peikoa rupi.

²² Pembaarɨvo yave, agüɨye opaetei pearɨvo jembeɨ rupi ave, agüɨye vi peyevɨka oyearɨvogüe re, peeya paravete vae reta peguarä jare ketɨgua reta peguarä. Che ko peYa Tumpa.”

Arete temimbɨ guasu reta regua

²³ YandeYa jei Moisés pe:

²⁴ “Ere Israel iñemuña reta pe: Tenondegua ara chiúa yasɨ pe, peyapo ara mbutuu pegua, peyapo yemboatɨ mbaemboete jare yemomaendúa pegua mimbɨñee rupi.

²⁵ Agüɨye mbae nunga mbaravɨkɨ ipoɨgüe peyapo; jare pemee mbota oyeapɨ cheve vae.”

Ara ñɨ̈ro pegua

²⁶ YandeYa jei Moisés pe:

²⁷ “Payandepo ara kuae chiúa yasɨ re, toiko cheɨ̈ro vaerä mbaeyoa re vae pegua; peyapo yemboatɨ mbaemboete pegua, peiporarauka peyeupe aeño, jare pemee mbota oyeapɨ vae cheve.

²⁸ Agüɨye mbae nunga mbaravɨkɨ peyapo jókuae ara; echa jókuae ara cheɨ̈ro vaerä mbaeyoa re vae ko, ñeñono kavi pegua che peYa Tumpa jóvai.

²⁹ Echa mbaetɨ yave kia nunga vae oiporarauka iyeupe aeño jókuae ara, toyemombo ete kavi jëtara reta ipɨte güi.

³⁰ Jare kia nunga vae oyapo yave mbae nunga mbaravɨkɨ jókuae ara, che tamokañɨtei jëtara reta ipɨte güi.

³¹ Agüɨye mbae nunga mbaravɨkɨ peyapo. Mborookuai jekuae avei pegua toiko peve jare peñemuña reta peguarä, oipota rupi peikoa rupi.

³² Ara mbutuu pegua toiko peve, jare peiporarauka peyeupe aeño, pemboɨpɨ jókuae yasɨ, ara chaúa kaaru yave güive, pɨareve pe kaaru regua.”

O ñairaka pegua reta iyarete

³³ YandeYa jei Moisés pe:

³⁴ “Ere Israel iñemuña reta pe: Kuae chiúa yasɨ, quince ara pe, toiko o ñairaka pegua arete ikavi yae vae, cheveguarä chiu ara rupi.

³⁵ Tenondegua ara pe toiko yemboatɨ mbaemboete pegua. Agüɨye mbae nunga mbaravɨkɨ ipoɨgüe peyapo.

³⁶ Chiu ara pemee mbota oyeapɨ vae cheve; jare juría ara pe peyapo yemboatɨ mbaemboete pegua, jare pemee mbota oyeapɨ vae cheve; arete ko, agüɨye mbae nunga mbaravɨkɨ ipoɨgüe peyapo.

³⁷ Jae kuae arete reta ikavi yae vae cheveguarä, pemoërakua yemboatɨ guasu mbaemboete pegua, pemee vaerä mbota oyeapɨ vae cheve, mɨmba oyeyukagüe opaetei oyeapɨ vae jare mbota temitɨ jäɨgüe, jare mɨmba oyeyukagüe jare mbota vino oyepɨyere vae. Opaete kuaekuae toyeapo iara pe kavi.

³⁸ Peipapambae reve ara mbutuu pegua pe pemee vae, mbota reta jare mbota reta peñererökuavee pemee vaerä vae ani mbota reta kɨ̈reɨ ngatu reve pemee cheve vae.

³⁹ Ërei jókuae chiúa yasɨ, quince ara pe, opa ma pemboɨru pembaagüɨye reta yave, peyapo arete cheve, tenondegua ara toiko mbutuu pegua jare juría ara toiko vi mbutuu pegua.

⁴⁰ Tenondegua ara pe peru ɨvɨra reta ikavi yae vae iagüe, karandaɨ jäka, ɨvɨra jokɨ katu yae vae jäka jare sause ɨ̈aka rupigua, jare peyerovia che peYa Tumpa jóvai chiu ara rupi.

⁴¹ Año ñavo chiúa yasɨ pe peyapo arete chiu ara cheve. Mborookuai jekuae avei pegua toiko peve jare peñemuña reta peguarä.

⁴² O ñairaka pegua pe peiko chiu ara rupi, pe opaete Israel iñemuña reta,

⁴³ peñemuña reta oikuaa vaerä, che ko pogüɨnoe ɨvɨ Egipto güi vae jare pogüɨreko o ñairaka pegua pe. Che ko peYa Tumpa.”

⁴⁴ Körai Moisés imiari Israel iñemuña reta pe, arete reta ikavi yae vae oyeapo yandeYa pe vae re.