LEVÍTICO 22 - Biblia Guarani Tumpa Iñee

Mbota reta oñeñono tee vae ko

¹ YandeYa jei Moisés pe:

² “Ere Aarón jare taɨ reta pe, toyeandu reve topoko mbaembae oñeñono tee vae Israel iñemuña reta oñono tee cheve vae re, agüɨye tomongɨa cheree ikɨambae. Che ko peYa.

³ Ere chupe reta: Opaete peraɨ reta jare peraɨ iñemuña reta, ikɨa reve omee yave mbota cheve, Israel iñemuña reta omee vae, toyemombo ete kavi cheróvai güi. Che ko peYa.

⁴ Oipotagüe kuimbae Aarón iñemuña reta güi ipire mbaerasɨ ókui vae ani imbaerasɨ güi taɨ oë vae, agüɨye tou mbaembae oñeñono tee vae güi, okuera güire oyetɨo regua. Kia nunga vae oyavɨkɨ yave mbae tëogüe rupi ikɨa vae, ani kuimbae imbaerasɨ güi taɨ oë vae,

⁵ ani kia nunga vae oyavɨkɨ mɨmba ipɨtía re oguata vae ani oipotagüe mbae rupi oyemongɨa vae, tikɨa topɨta Tumpa jóvai;

⁶ jókuae kuimbae tikɨa topɨta Tumpa jóvai pɨ̈tu regua, jare agüɨye tou jókuae mbota oñeñono tee vae güi, ndei jete oyoe mbove.

⁷ Kuaraɨ oike ma yave topɨta ikɨambae; jare jaɨkue rupi ipuere jou mbota oñeñono tee vae, echa jae jou vaerä ko.

⁸ Mɨmba omanoiño vae ani mɨmba pochɨ vae ñana rupigua jembia agüɨye tou, agüɨye toyemongɨa pɨpe. Che ko peYa.

⁹ Toñovatu reta ipɨa pe cheporookuai, agüɨye tiyoa topɨta kuae reta re, echa omano retata ko omboeteä yave. Che ko peYa poñono tee vae.

¹⁰ Agüɨye kia nunga vae sacerdote iñemuña peguambae vae tou kuae mbota oñeñono tee vae güi. Agüɨye tou mbota oñeñono tee vae güi sacerdote imboupa ani oparavɨkɨ chupe vae.

¹¹ Ërei sacerdote ogua yave metei tembipɨɨ, kuae ipuere jou jókuae mbota oñeñono tee vae güi. Jaeramiño vi sacerdote jo pe oa vae, ipuere jou jókuae mbota oñeñono tee vae güi.

¹² Sacerdote tayɨ omenda yave sacerdote iñemuña peguambae ndive, agüɨye tou mbota reta oñemee sacerdote pe vae güi.

¹³ Ërei sacerdote tayɨ imemano vae ani ime omombogüe jare mbaetɨ imembɨ, jökorai ou ye yave oiko tu jo pe tenonde taɨrusu yave oikose rami, ipuere jou tu jembíu. Ërei sacerdote iñemuña peguambae reta mbaetɨ ipuere jou mbota reta oñeñono tee vae güi.

¹⁴ Kia nunga vae jou yave oikuaambae reve mbota oñeñono tee vae güi, tomboekovia jare tomoïru pandepo vae güi metei ye, jare tomee sacerdote pe mbota oñeñono tee vae ndive.

¹⁵ Agüɨye tomongɨa Israel iñemuña reta omee mbota vae, echa jae reta ombosɨrɨ ko cheveguarä;

¹⁶ echa jou reta ko yave jókuae mbota oñeñono tee Tumpa pe vae omboekoukata ko Israel iñemuña reta. Che ko peYa poñono tee vae.”

Mbae nunga mɨmba reta ko oñemeeta vae

¹⁷ YandeYa jei Moisés pe:

¹⁸ “Ere Aarón pe, jare taɨ reta pe, jare opaete Israel iñemuña reta pe: Oipotagüe Israel iñemuña reta ani ketɨgua reta yogüɨreko pepɨte rupi vae omee yave mbota ombopo vaerä güɨrökuavee vae ani ipɨa-kɨ̈reɨ reve kavi omee yave mɨmba oyeyukagüe opaetei oyeapɨ vae cheve;

¹⁹ jókuae mbota chembopɨakatu vaerä, tomee reta jɨmba reta güi jete kavi vae; toro, vecha kuimbae taɨrusu vae ani kavara.

²⁰ Agüɨye kia nunga vae tomee mɨmba oikomeguagüe, echa ngaraa ipɨakatu jese peve.

²¹ Jaeramiño vi oime yave kia nunga vae omee mɨmba oyeyuka yembopɨakatu peguarä vae cheve, ombopo vaerä oñererökuavee vae ani mbota kɨ̈reɨ ngatu reve oñemee vae yave; tomee reta jete kavi vae guaka ani vecha, chembopɨakatu vaerä jókuae mbota.

²² Agüɨye kuae nunga toñemee cheve: Mɨmba jesambae, iu opëgüe, ipo ani ipɨchutu vae, jete rupi ikɨ̈ta vae, ikuru vae, ipere vae; agüɨye etei kuae reta güi toñemee mbota oyeapɨ jese vae re cheve.

²³ Toro ani vecha kuimbae jete oikomeguagüe ipuereño omee reta mbota kɨ̈reɨ ngatu reve oñemee vae; ërei oñererökuavee vae ombopo vaerä omee yave, ngaraa Tumpa ipɨakatu jese.

²⁴ Agüɨye tomee reta cheve mɨmba japiaräɨ iperegüe ani oyeapasogüe, oyeapiaogüe ani oyeasɨagüe. Agüɨye kuae nunga peyapo peɨvɨ pe.

²⁵ Agüɨye ketɨgua reta güi ave toipɨɨ reta kuae nunga mɨmba oñemee vaerä tembiurä peTumpa pe, echa mɨmba oikomeguagüe ko; mbaetɨ ko jete kavi, Tumpa ngaraa ipɨakatu jese peve.”

Mɨmba reta mbotarä oñemeegüe kërai oyeyuka vaerä

²⁶ YandeYa jei Moisés pe:

²⁷ “Toro raɨ, vecha kuimbae raɨ ani kavara raɨ oa yave, chiu ara tokambu ichɨ re; ërei juría ara güire jenonde kotɨ ikavi ma jókuae mɨmba oyeapɨ vaerä cheve.

²⁸ Agüɨye peyuka metei ara peño guaka ani vecha imembɨ ndive.

²⁹ Pemee yave mɨmba oyeyukagüe yasoropai pegua cheve, pemee chembopɨakatuta vae.

³⁰ Jare jókuae ara voi opa peu, agüɨye pemoembɨre pɨareve peguarä. Che ko peYa.

³¹ Peñovatu pepɨa pe cheporookuai reta jare peyapo. Che ko peYa.

³² Agüɨye pemongɨa cheree ikɨambae, jökorai aiko tee vaerä Israel iñemuña reta ipɨte pe. Echa che ko peYa poñono tee vae,

³³ che ko pogüɨnoe ɨvɨ Egipto güi aiko vaerä peTumparä. Che ko peYa.”