LEVÍTICO 21 - Biblia Guarani Tumpa Iñee

Mborookuai reta sacerdote reta peguarä

¹ YandeYa jei Moisés pe: “Ere Aarón iñemuña sacerdote reta pe agüɨye toyemongɨa reta Tumpa jóvai, tëta pe kia nunga vae omano vae rupi,

² ërei jëtara ete re, ichɨ re, tu re, taɨ re, tɨkeɨ ani tɨvɨ re,

³ ani jeindɨ jaegüɨrai vae ípɨri oiko vae, ndeiño omenda vae; kuae reta re ipuere oyemongɨa reta Tumpa jóvai.

⁴ Ërei agüɨye toyemongɨa reta Tumpa jóvai oipotagüe kuimbae tëta pegua rami.

⁵ Agüɨye tomboapúa reta ia toñapi, agüɨye jendɨvaa iyapɨ toyasɨa reta, agüɨye jete tombopere reta,

⁶ iyoambae toyogüɨreko Tumpa pe, agüɨye tomongɨa reta Tumpa jee, echa mbota oyeapɨ oñemee cheve vae jare mbɨyape Tumpa pegua jae reta ko omee, jáeramo iyoambae toyogüɨreko.

⁷ Agüɨye tomenda reta kuña iyaguasa pota vae ndive, ani kuimbae ndive oasa ma vae ndive ani ime omombogüe ndive; echa sacerdote reta oñeñono tee ko Tumpa pe.

⁸ Eñono tee reta opaete mbaembae güi, echa jae reta ko omee mbɨyape neTumpa pe. Jare iyoambae toyogüɨreko ndeveguarä, echa che peYa iyoambae ko añono tee reta.

⁹ Jare sacerdote tayɨ omboɨpɨ yave iyaguasa pota, omboeteä ko tu; jekove reveño toyeapɨ tata pe.

¹⁰ Jare sacerdote tenondegua vae, iñäka re opɨyere olivo iasaite yeparavo pegua, temimonde sacerdote pegua omonde vaerä vae, agüɨye toñeäkaöva, agüɨye vi tomondoro jemimonde ipɨatɨtɨ güi;

¹¹ agüɨye vi toike tëogüe oïa pe, tu re ave ani ichɨ re ave agüɨye toyemongɨa Tumpa jóvai.

¹² Agüɨye toë mbaemboetea güi, agüɨye tomongɨa Tumpa jo mbaemboetea; echa jese ko oyepɨyere olivo iasaite Tumpa imbae yeparavo pegua. Che ko peYa.

¹³ Tomenda metei kuñatai ndei etei kuimbae ndive oasa vae ndive.

¹⁴ Agüɨye tomenda imemano vae ndive ani ime omombogüe ndive, oyemboeteukambae ani iyaguasa pota vae ndive; tomenda metei kuñatai jëta pegua ndei etei kuimbae ndive oasa vae ndive,

¹⁵ agüɨye vaerä omongɨa iñemuña reta, jëtaɨgua reta ipɨte pe; echa che peYa ko añono tee reta.”

Mbaemboavai reta sacerdoterä vae pe

¹⁶ YandeYa jei Moisés pe:

¹⁷ “Ere Aarón pe metei ave taɨ reta ani taɨ iñemuña reta jete oikomegua reve, agüɨye togüɨroike mbɨyape Tumpa pe.

¹⁸ Agüɨye metei ave kuimbae jete oikomegua vae toya omee vaerä mbota: Jesambae, iköcho vae, itï ani inambi oikomegua vae,

¹⁹ kuimbae ipɨ opë vae ani ipo opë vae,

²⁰ ikuperäti vae, okuakuaambae vae, jësatu vae, ikuru vae, iyandɨrakai vae, oyeapiaogüe ani japiaräɨ oikomegua vae.

²¹ Metei ave kuimbae sacerdote Aarón iñemuña reta güi jete oikomegua vae, agüɨye tomee mbota reta oyeapɨ vae cheve. Echa oikomegua ko, agüɨye tou tomee mbota mbɨyape Tumpa pe.

²² Tumpa pe mbɨyape oñemee vae güi, jare mbaembae oñeñono tee vae jare oñeñono tee kavi yae vae güi ipuere jou,

²³ ërei agüɨye toya asoya o imboyaoa re, ani mɨmba oyeyuka oyeapɨ jese vae re, echa jete oikomegua ko, agüɨye vaerä omongɨa chero mbaemboetea. Echa che ko peYa poñono tee vae.”

²⁴ Jare Moisés imiari opaete kuae re Aarón pe, taɨ reta pe jare opaete Israel iñemuña reta pe.