LEVÍTICO 2 - Biblia Guarani Tumpa Iñee

Mbota reta temitɨ jäɨgüe regua

¹ Kia nunga vae omee yave mbota temitɨ jäɨgüe cheve, tomee trigokúi ipɨuasɨ vae, jare topɨyere jese olivo iasaite jare ikäti kavi vae incienso.

² Jare togüɨraja sacerdote reta pe, Aarón taɨ reta pe; jare trigokúi ipɨuasɨ vae güi sacerdote toekɨ metei poagua, jare olivo iasaite güi opaete ikäti kavi vae incienso ndive, jare toapɨ mɨmba oyeyuka oyeapɨ jese vae re jókuae mbota reta oñemee vae jekovia peguarä vae, mbota oyeapɨ vae ko, ipiche katu vae ko cheveguarä.

³ Jare mbota güi jembɨregüe topɨta Aarón jare taɨ reta peguarä; mbae oñeñono tee kavi yae ete vae ko, mbota reta güi cheveguarä.

⁴ Kia nunga vae omee yave mbotarä horno pe oyemboyɨ vae, toyapo mbɨyape trigokúi ipɨuasɨ vae oyembovumbae olivo iasaite pe oyemómbɨu vae, jare mbɨyape ipïreriasɨ vae oyembovumbae olivo iasaite pe oñeapiramo vae.

⁵ Ërei omee yave mbotarä temitɨ jäɨgüe takɨpe pe oyemboyɨ vae, toyapo trigokúi ipɨuasɨ vae oyembovumbae olivo iasaite pe oyemómbɨu vae.

⁶ Topɨ̈saa jókuae mbɨyape, jare topɨyere jese olivo iasaite; echa mbota temitɨ jäɨgüe ko.

⁷ Kia nunga vae omee yave mbota ɨvɨyapepo pe oyɨ vae, toyapo trigokúi ipɨuasɨ vae oyembovumbae olivo iasaite pe oyemómbɨu vae.

⁸ Jare togüeru cheve kuae mbota reta oyeapo vae, jare tomee sacerdote pe, jae togüɨraja mɨmba oyeyuka oyeapɨ jesea pe.

⁹ Jare sacerdote toekɨ mbovɨ jókuae mbota oñemee vae güi jekovia peguarä; jare toapɨ mɨmba oyeyuka oyeapɨ jese vae re, mbota ipiche katu vae ko cheveguarä.

¹⁰ Jare jókuae mbota güi jembɨregüe topɨta Aarón jare taɨ reta peguarä; mbae oñeñono tee kavi yae ete vae ko mbota reta güi cheveguarä.

¹¹ Agüɨye etei mbota oyembovugüe toñemee cheve; echa ngaraa etei ko mbae ombovu vae, ani ei yepe oyeapɨ cheve;

¹² ërei toñemee cheve mbota mbaagüɨyerɨpɨ rami; ërei agüɨye toyeapɨ mɨmba oyeyuka oyeapɨ jese vae re, ïru mbota reta oyeapɨ oñemee cheve vae rami.

¹³ Jare toyemboembochɨ opaete mbota temitɨ jäɨgüe oñemee vae, jare agüɨye etei toata yukɨ mbota oñemee vae pe, yukɨ morogüɨrökuavee päve pegua neTumpa ndive oyeapo vae; echa yukɨ oporomomaendúa aveita morogüɨrökuavee päve peyapo oyoupe vae re; jáeramo toñeñono avei yukɨ opaete mbota oñemee vae re.

¹⁴ Oñemee yave mbota mbaagüɨyerɨpɨ cheve, toyeimbe tata pe jókuae mbaagüɨyerɨpɨ jovɨgüe jare jäɨ oyeapasogüe, körai toñemee mbota mbaagüɨyerɨpɨ.

¹⁵ Jare topɨyere jese olivo iasaite jare ikäti kavi vae incienso, echa mbota temitɨ jäɨgüe ko.

¹⁶ Jare sacerdote toapɨ mbovɨ, jókuae mbota reta oñemee vae jekovia pe; temitɨ jäɨ oyeapasogüe güi, olivo iasaite jare opaete ikäti kavi vae incienso, echa mbota oyeapɨ vae ko cheveguarä.