LEVÍTICO 19 - Biblia Guarani Tumpa Iñee

Mborookuai reta ñeñono tee jare jupi vae regua

¹ YandeYa jei Moisés pe:

² “Ere opaete Israel iñemuña reta pe: Peiko tee peyoambae, echa che peYa Tumpa iyoambae ko.

³ Metei ñavo tomboete tu jare ichɨ, Tomboete vi cheara mbutuu pegua. Che ko peYa Tumpa.

⁴ Agüɨye pemboete tumpa-raanga reta, agüɨye vi peyapo petumparä jiero oyemondɨkuigüe. Che ko peYa Tumpa.

⁵ Jare pemee yave mɨmba oyeyukagüe yembopɨakatu pegua cheve, pemee Tumpa ombopɨakatuta vae.

⁶ Jókuae mɨmba oñemee vae, toyeu jókuae ara jare pɨareve pe; ërei mboapɨ araa pe oimeño jókuae soo yave toyeapɨ.

⁷ Ërei mboapɨ araa pe oyeu yave jókuae soo, Tumpa güɨröɨrota jare ngaraa vi oyepapa omee vae pe; ikavimbae yae ko;

⁸ jare jókuae soo jou vae toiporara teko oyavɨ vae re, echa mbaetɨ omboete cheve oñeñono tee vae; toyemombo ete kavi jëtara reta ipɨte güi.

⁹ Pembaarɨvo yave agüɨye opaetei pearɨvo jembeɨ rupi ave, agüɨye vi peyevɨka oyearɨvogüe re.

¹⁰ Agüɨye vi peyevɨka uva re peuvarupa pe, agüɨye vi osururugüe pemonoo; peeya paravete vae reta peguarä, jare ketɨgua reta peguarä. Che ko peYa Tumpa.

¹¹ Agüɨye pemaeñomi, agüɨye peapu, agüɨye peporombotavɨ.

¹² Agüɨye pere raangaiño cheree re añete vae nunga, echa pemboeteä ko peTumpa jee. Che ko peYa.

¹³ Agüɨye peyuvanga perapicha re, agüɨye peñomi mbae chugüi. Agüɨye pemombɨta oparavɨkɨ peve vae ikorepoti pɨareve peguarä, pemboepɨ voi chupe.

¹⁴ Agüɨye peyepopeyu iyapɨsambae re. Agüɨye peñono jesambae japerä pe mbae, oyepɨaka jese vaerä. Peipoɨu peTumpa güi. Che ko peYa.

¹⁵ Agüɨye peyapo jupimbae peporojäa yave: Agüɨye peepɨ paravete vae ani pembopɨakatu oikokatu vae. Jupi rupi peporojäa.

¹⁶ Agüɨye pendaye pota perëtaɨgua reta ipɨte pe. Agüɨye pemomburu perapicha jekove. Che ko peYa.

¹⁷ Agüɨye pepɨa pe pemotareɨ perëtara. Pemboeta perapicha pe, agüɨye vaerä peyemboeko jae ndive iyoa pe.

¹⁸ Agüɨye peyepɨse, agüɨye peñovatu pepɨa pe ikavimbae perëtaɨgua kotɨ. Peaɨu perapicha pe peyeaɨu rami. Che ko peYa.

¹⁹ Peyapo cheporookuai reta. Agüɨye perɨmba pemboyopɨɨ mɨmba ambuaeyee vae ndive. Agüɨye pemboyea yea temitɨ jäɨ peñotɨ peko pe. Agüɨye peyemonde temimonde ipɨaa oyea yea vae pe.

²⁰ Metei kuimbae opoko yave metei tembiokuai kuña omendata oï vae re, ërei ndeiño oyegua ani ndeiño vi oyeyora, mókoi reve toñenupa; agüɨye toyeyuka reta, echa jókuae kuña ndei ko oyeyora.

²¹ Jókuae kuimbae togüeru cheve metei vecha kuimbae oyeyuka vaerä, tupao guakapi pegua jöke pe, cheɨ̈ro vaerä jeko re,

²² kuae vecha kuimbae oyeyukagüe cheɨ̈ro vaerä mbaeyoa re vae rupi, sacerdote toyapo chupe ñeñono kavi mbaeyoa oyapo vae re cheróvai, jare cheɨ̈rota chupe iyoa re.

²³ Peike ma yave jókuae ɨvɨ pe, peñotɨ yave oipotagüe temitɨ ia vae, agüɨye etei peu iagüe mboapɨ año rupi.

²⁴ Jare irundɨa año pe opaete iagüe peñono tee cheve,

²⁵ jare pandepoa año pe, pepuere ma peu opaete temitɨ iagüe, echa jayave temitɨ reta ia jetata. Che ko peYa Tumpa.

²⁶ Agüɨye peu soo jugüɨ reve. Agüɨye pembaekuaa, ani pemomora peikuaa vaerä mbae maratuta vae.

²⁷ Agüɨye pemboapúa pea peñapi, agüɨye perendɨvaa iyapɨ peyasɨa.

²⁸ Agüɨye perete pembopere kia nunga vae omano jeko pegua. Agüɨye vi peyekuatía. Che ko peYa.

²⁹ Agüɨye pemoëgua perayɨ reta yogüɨreko vaerä aguasa rupi. Agüɨye perokomegua jókuae ɨvɨ teko ikavimbae pe.

³⁰ Pemboete cheara reta mbutuu pegua, jare chero mbaemboetea. Che ko peYa.

³¹ Agüɨye pekua imbaekuaa vae reta kotɨ ani mbae outa vae re omombeu vae reta kotɨ. Agüɨye peyemongɨa pɨpe. Che ko peYa Tumpa.

³² Peyemboɨ jare pemboete ndechi reta, peipoɨu peTumpa güi. Che ko peYa.

³³ Agüɨye peiporarauka ketɨgua yogüɨreko pepɨte pe vae pe.

³⁴ Pemae kavi jese reta, pe pemae oyoe rami; peaɨu, pe reta peyeaɨu rami; echa pe reta ketɨgua peikose yepi ɨvɨ Egipto pe. Che ko peYa Tumpa.

³⁵ Agüɨye peyapo jupimbae peporojäa yave: Ɨvɨ oñejäa vae re, mbae ipoɨ oñejäa oñemee vae re ani mbae jɨru pe oñejäa oñemee vae re.

³⁶ Pejäa kavi mbae pemee oyoupe mbaejäaka pe. Che ko peYa Tumpa, ɨvɨ Egipto güi perenoe vae.

³⁷ Peñovatu pepɨa pe jare peyapo opaete cheporookuai reta. Che ko peYa.”