LEVÍTICO 18 - Biblia Guarani Tumpa Iñee

Kuimbae opoko kuña re vae regua

¹ YandeYa jei Moisés pe:

² “Ere Israel iñemuña reta pe: Che ko jae peYa Tumpa.

³ Agüɨye pemomoe ɨvɨ Egipto pegua reta jeko; peikosea pe oyeapo vae. Agüɨye vi pemomoe ɨvɨ Canaán pegua reta jeko, che pogüɨrajataa pe, agüɨye vi pemomoe mborookuai reta güɨnoi vae.

⁴ Peyapo che jae peve vae, peñovatu pepɨa pe cheporookuai reta, peiko cheporookuai jei rami. Che ko peYa Tumpa.

⁵ Jáeramo, peñovatu pepɨa pe jare peyapo cheporookuai reta. Kuimbae oyapo cheporookuai reta vae oikoveta. Che ko peYa.

⁶ Agüɨye metei ave kuimbae topoko ikuña ae re. Che ko peYa.

⁷ Agüɨye kia nunga vae kuña toasa tu ndive, agüɨye kia nunga vae kuimbae topoko ichɨ re, echa ichɨ ko, tomboete tu.

⁸ Agüɨye kia nunga vae topoko ichɨraanga re; tomboete tu.

⁹ Agüɨye kia nunga vae topoko jeindɨ re; jeindɨ tu tee vae ani ichɨ tee vae, yepe tëi oa jókuae tëta pe ani ïru tëta pe, agüɨye topoko jese.

¹⁰ Agüɨye kia nunga vae topoko taɨ tayɨ re ani tayɨ imemɨkuña re, agüɨye toyapo iyeupe ikavimbae.

¹¹ Agüɨye kia nunga vae topoko ichɨraanga imemɨkuña re, echa tu tayɨ ko, jare jae jeindɨ ko, agüɨye topoko jese.

¹² Agüɨye kia nunga vae topoko tu jeindɨ re, echa iyaiche ko, metei tugüɨ ko tu ndive.

¹³ Agüɨye kia nunga vae topoko ichɨ tɨke ani ipɨkɨɨ re, echa ichɨɨ ko, metei tugüɨ ko ichɨ ndive.

¹⁴ Agüɨye kia nunga vae topoko itutɨ jembireko re, echa ichɨɨ ko, tomboete itutɨ.

¹⁵ Agüɨye kia nunga vae topoko taɨ jembireko re, echa taɨtatɨ ko, agüɨye topoko jese.

¹⁶ Agüɨye kia nunga vae topoko tɨkeɨ ani tɨvɨ jembireko re, tomboete tɨkeɨ ani tɨvɨ.

¹⁷ Agüɨye kia nunga vae topoko metei kuña re jare imemɨkuña re ani jamariro re: Imembɨraɨe tayɨ ani imemɨkuña imembɨ re, echa metei tugüɨ reta ko. Ikavimbae yae vae ko jókuae.

¹⁸ Agüɨye kia nunga vae oime jembireko reve topoko jembireko tɨke re ani ipɨkɨɨ re, echa omoñomotareɨukata ko oikove yogüɨreko ramboeve.

¹⁹ Agüɨye kia nunga vae topoko kuña jugüɨ oï vae re.

²⁰ Jaeramiño vi agüɨye kia nunga vae topoko japicha jembireko re. Agüɨye vaerä oyemongɨa jae ndive oyapogüe rupi.

²¹ Agüɨye kia nunga vae tomee taɨ mbota rami tumpa-raanga Moloc jee vae pe, agüɨye pemongɨa peTumpa jee. Echa che ko peYa.

²² Agüɨye kia nunga vae toyapakua japicha kuimbae ndive, kuimbae oasa kuña ndive rami. Ikavimbae yae ko jókuae.

²³ Agüɨye kuimbae ani kuña yepe toasa mɨmba ndive. Ikavimbae yae ko jókuae.

²⁴ Opaete kuaekuae reta agüɨye peyapo, echa opaete kuaekuae reta pe ko oyemongɨa tëtaguasu reta che amoëta amombo perenonde güi vae,

²⁵ jare omongɨa reta iɨvɨ, jáeramo, che aiporarauka chupe reta jeko re, jare ɨvɨ etei opa omoë omombo.

²⁶ Ërei pe reta jare ketɨgua yogüɨreko pepɨte pe vae, peñovatu pepɨa pe jare peyapo cheporookuai reta, agüɨye peyapo metei ave kuae ikavimbae yae vae.

²⁷ Echa kuae ikavimbae yae vae ko oyapo jókuae ɨvɨ pegua reta, pe reta ndei peike jókuae ɨvɨ pe mbove, omongɨa reta iɨvɨ.

²⁸ ¡Agüɨye kuae ɨvɨ güi peyemombouka pemongɨa jeko pegua, kuae ɨvɨ pe ndei peike mbove yogüɨrekose vae reta opa oyemombouka rami!

²⁹ Echa kia nunga vae oyapo yave kuae ikavimbae yae vae, toyemombo ete kavi jëtara reta ipɨte güi.

³⁰ Jáeramo peñovatu pepɨa pe cheporookuai, agüɨye pemomoe jókuae ɨvɨ pe yogüɨreko vae jeko ikavimbae yae vae; agüɨye peyemongɨa pɨpe. Che ko peYa Tumpa.”