LEVÍTICO 16 - Biblia Guarani Tumpa Iñee

Mɨmba oyeyuka Tumpa iñɨ̈ro mbaeyoa re vae regua iara

¹ YandeYa imiari Moisés ndive, opa güire omano mókoi Aarón taɨ reta, oya reta yave yandeYa oïa pe.

² YandeYa jei Moisés pe: “Ere nderɨkeɨ Aarón pe, agüɨye toike avei tupao guakapi pegua japɨpe oñeñono tee kavi yae vae pe, jókuae asoya o imboyaoa japɨpe oïa pe, ñɨ̈ro renda käjou iárambo oï vae jóvai, agüɨye vaerä omano; echa che ayekuaata amapɨtu re ñɨ̈ro renda re.

³ Togüeru o mbaemboetea pe metei toro taɨrusu vae, cheɨ̈ro vaerä mbaeyoa re jare metei vecha kuimbae opaetei oyeapɨ vaerä vae.

⁴ Toyemonde temimonde lino pegua temimonde sacerdote pegua pe jare jemimonde igüɨ pe togüɨnoi temimonde lino pegua, jare toyekuakua kuakuaa lino pegua pe, jare äka-ɨru lino pegua toñono iñäka re; jae ko kuae temimonde reta oñeñono tee sacerdote pe vae, jókuae pe toyemonde opa güire oyau.

⁵ Jare Israel iñemuña reta güi togüeru mókoi kavara kuimbae, cheɨ̈ro vaerä mbaeyoa re, jare metei vecha kuimbae opaetei oyeapɨ vaerä.

⁶ Jare Aarón togüeruruka toro taɨrusu vae jae imbae, cheɨ̈ro vaerä mbaeyoa re, jare toyapo ñeñono kavi iyeupeguarä jare jo pegua reta peguarä.

⁷ Jaɨkue rupi toipɨɨ jókuae mókoi kavara kuimbae jare tomee cheróvai, tupao guakapi pegua jöke pe.

⁸ Jare Aarón toekɨ suerte kuae mókoi kavara kuimbae re, metei kavara kuimbae cheveguarä jare ïru Azazel peguarä.

⁹ Jare Aarón togüeruruka kavara oyembosuerte cheveguarä vae, jare tomee cheɨ̈ro vaerä mbaeyoa re.

¹⁰ Ërei Azazel peguarä kavara kuimbae oyembosuerte vae, tomee jekove reveño cheróvai, jare toyapo ñeñono kavi jese, javoi tomondo Azazel kotɨ ñuu pe.

¹¹ Jare Aarón togüeruruka toro taɨrusu vae jae imbae, jare toñaseokɨ̈ti cheɨ̈ro vaerä iyoa re, jökorai toyapo ñeñono kavi iyeupeguarä jare jo pegua reta peguarä.

¹² Jaɨkue rupi toipɨɨ metei ikäti kavi vae incienso oyeapɨ pɨpe vae, tomotɨnɨe tätapɨi pe, mɨmba oyeyuka oyeapɨ jese vae cheróvai oï vae güi, jare mókoi poagua togüɨraja incienso ikäti kavi vae oyeyosogüe, jare togüɨroike tupao guakapi pegua japɨpe oñeñono tee kavi yae vae pe, jókuae asoya o imboyaoa japɨpe.

¹³ Jare toñono jókuae ikäti kavi vae incienso tata pe, cheróvai, jare jätati toñova ñɨ̈ro renda, käjou yemomaendúa pegua iárambo oï vae. Jökorai agüɨye vaerä omano sacerdote Aarón.

¹⁴ Jaɨkue rupi toipɨɨ toro taɨrusu vae jugüɨgüe, jare toñapiramo ipoäka pe ñɨ̈ro renda iyɨke kuaraɨ oëa kotɨgua; jare toñapiramo ipoäka pe ñɨ̈ro renda kotɨ etei chiu ye jókuae tugüɨ pe.

¹⁵ Jaɨkue rupi toñaseokɨ̈ti kavara kuimbae tëta pegua reta iyoa re, cheɨ̈ro vaerä mbaeyoa re, jare togüɨraja jugüɨ tupao guakapi pegua japɨpe oñeñono tee kavi yae vae pe, jókuae asoya o imboyaoa japɨpe toyapo toro taɨrusu vae jugüɨgüe oyapo rami, toñapiramo ñɨ̈ro renda re jare jóvai kotɨ.

¹⁶ Jökorai toitɨo tupao guakapi pegua japɨpe oñeñono tee kavi yae vae, Israel iñemuña reta ikɨa Tumpa jóvai, ipɨapochɨ jare opaete iyoa reta jeko pegua; jökorai vi toyapo tupao guakapi pegua, echa oiko jae reta ndive ikɨa reve ipɨte pe.

¹⁷ Agüɨye toike metei ave kuimbae tupao guakapi pegua pe, Aarón oike yave japɨpe oñeñono tee kavi yaea pe omee vaerä mbota, cheɨ̈ro vaerä mbaeyoa re, jae oë ye regua, jare opa ma omee mbota jae iyoa re, iñemuña reta jare opaete Israel iñemuña reta iyoa re yave,

¹⁸ toë toitɨo ikäti kavi vae incienso oyeapɨ jese vae cheróvai oï vae. Toipɨɨ toro taɨrusu vae jugüɨgüe jare kavara kuimbae jugüɨgüe jare toipichɨ togüɨroyere ikäti kavi vae incienso oyeapɨ jese vae re guakarätiecha ñogüɨnoi vae re,

¹⁹ jare ipoäka pe toñapiramo iárambo tugüɨ pe chiu ye. Jökorai toitɨo jare toñono tee ikäti kavi vae incienso oyeapɨ jese vae Israel iñemuña reta ikɨa güi.

²⁰ Aarón opa ma oitɨo tupao guakapi pegua japɨpe oñeñono tee kavi yae vae, tupao guakapi pegua jare ikäti kavi vae incienso oyeapɨ jese vae yave; togüeruruka kavara kuimbae oikove oï vae,

²¹ jare toñono ipo mókoi reve kavara kuimbae oikove vae iñäka re, jare tomombeu jese opaete Israel iñemuña reta oyapo mbae ikavimbae vae, opaete ipɨapochɨ reta, jare opaete iyoa reta, jökorai topa toñono mbaeyoa kavara kuimbae iñäka re, jare kuimbae oyeparavo jókuae peguarä vae togüɨraja tomondo ñuu kotɨ.

²² Jökorai jókuae kavara kuimbae togüɨraja iyé opaete mbae ikavimbae vae jae reta oyapogüe ɨvɨ ipombaea kotɨ.

²³ Jaɨkue rupi tou Aarón tupao guakapi pegua pe, jare tomboi temimonde sacerdote pegua lino pegua, o mbaemboetea pe oike yave omonde vae, jare toeya joko pe.

²⁴ Jare joko pe toyoe jete ɨ pe, jare jaɨkue rupi opa ma oyemonde yave toë, jare tomee mɨmba oyeyukagüe opaetei oyeapɨ vae, iyegua jare ïru mɨmba tëta pegua reta re; jökorai toyapo cheɨ̈ro vaerä iyoa re jare tëta iyoa re.

²⁵ Jare toapɨ mɨmba oyeyuka oñemee jese vae re, mɨmba oyeyukagüe mbaeyoa regua ikɨragüe.

²⁶ Jare jókuae kuimbae güɨraja oeya kavara kuimbae ñuu pe, Azazel pe vae, toputuka jemimonde reta, jare toyoe vi jete ɨ pe, jaɨkue rupi toike teyupa pe.

²⁷ Jare togüɨnoe reta teyupa güi ikatu pe, toro taɨrusu vae jare kavara kuimbae mbaeyoa re oyeyuka vae, jugüɨgüe oyereraja o mbaemboetea pe vae, cheɨ̈ro vaerä mbaeyoa re; ipiregüe, isoogüe jare jepotigüe toyeapɨ tata pe.

²⁸ Jare oyatapɨ jese vae, toputuka jemimonde reta jare toyeyoe vi ɨ pe, jare jaɨkue rupi ipuere oike ye teyupa pe.

²⁹ Kuae mborookuai jekuae avei pegua toiko peveguarä: Chiu yasɨa pe, payandepo araa pe jókuae yasɨ, peiporarauka peyeupe aeño, agüɨye peyapo mbae nunga mbaravɨkɨ ani ketɨgua reta ave pepɨte rupi yogüɨreko vae.

³⁰ Echa jókuae ara ko oñemee peré mɨmba oyeyukagüe, cheɨ̈ro vaerä peyoa re, ikɨambae pepɨta vaerä opaete peyoa güi cheróvai.

³¹ Ara mbutuu pegua toiko peve, peiporarauka peyeupe aeño; mborookuai jekuae avei pegua toiko peveguarä.

³² Sacerdoterä oyeparavo tu jekovia pe vae, jae toyapo mɨmba oyeyukagüe cheɨ̈ro vaerä mbaeyoa re vae; tomonde temimonde lino pegua sacerdote pegua,

³³ jare toitɨo tupao guakapi pegua japɨpe oñeñono tee kavi yae vae, tupao guakapi pegua, ikäti kavi vae incienso oyeapɨ jese vae. Jare toyapo vi sacerdote reta re, jare opaete Israel iñemuña reta re, cheɨ̈ro vaerä mbaeyoa re.

³⁴ Kuae mborookuai jekuae avei pegua toiko peveguarä: Pemee mɨmba oyeyukagüe cheɨ̈ro vaerä mbaeyoa re vae, metei vese año pe Israel iñemuña reta re.” Jare Moisés oyapo yandeYa oyókuai vae rami.