LEVÍTICO 15 - Biblia Guarani Tumpa Iñee

Mborookuai reta kuimbae ikɨa regua

¹ YandeYa jei Moisés pe jare Aarón pe:

² “Pere Israel iñemuña reta pe: Oipotagüe kuimbae imbaerasɨ güi taɨ oë yave, tikɨa topɨta.

³ Jae kuae ikavimbae vae: Ipuere imbaerasɨ güi taɨ oë ani taɨpɨta jókuae omombo vae jeko pegua, tikɨa topɨta Tumpa jóvai.

⁴ Opaete tupa, jókuae nunga kuimbae imbaerasɨ vae oyapakua jese vae, tikɨa topɨta Tumpa jóvai. Opaete mbae re oguapɨ vae tikɨa topɨta Tumpa jóvai.

⁵ Jare oipotagüe oyavɨkɨ yave jókuae tupa, toputuka jemimonde reta; jare jae etei toyau vi jare tikɨa topɨta Tumpa jóvai pɨ̈tu regua.

⁶ Jare kia oguapɨ yave jókuae imbaerasɨ vae jendagüe re, toputuka jemimonde reta jare jae etei toyau vi, jare tikɨa topɨta Tumpa jóvai pɨ̈tu regua.

⁷ Jaeramiño vi kia oyavɨkɨ yave jökorai imbaerasɨ vae jete, toputuka jemimonde reta jare jae etei toyau vi, jare tikɨa topɨta Tumpa jóvai pɨ̈tu regua.

⁸ Jókuae imbaerasɨ vae ondɨvɨ yave kia ikɨambae Tumpa jóvai vae re, jayave jókuae kuimbae toputuka jemimonde reta, jare opa oyau güire tikɨa topɨta Tumpa jóvai pɨ̈tu regua.

⁹ Jare jókuae imbaerasɨ vae inumino opo jese vae, tikɨa topɨta Tumpa jóvai.

¹⁰ Oipotagüe oyavɨkɨ mbaembae jókuae imbaerasɨ vae oguapɨ jese vae, tikɨa topɨta Tumpa jóvai pɨ̈tu regua. Jare kia güɨraja yave oguapɨ jese vae, toyau jare toputuka jemimonde reta jare tikɨa topɨta Tumpa jóvai pɨ̈tu regua.

¹¹ Jare imbaerasɨ vae oyavɨkɨ yave kia nunga vae, mbaetɨ yave oyepoe ɨ pe, ani oputuka jemimonde reta, toyau jare toputuka jemimonde jare tikɨa topɨta Tumpa jóvai pɨ̈tu regua.

¹² Jókuae imbaerasɨ vae oyavɨkɨ ɨvɨyapepo yave, toyeyoka, jare opaete ɨvɨra ñae toyeyoe ɨ pe.

¹³ Opa yave oyetɨo jókuae imbaerasɨ vae, toyepapa chiu ara opa oyetɨo güire, jare toputuka jemimonde reta, jare toyau ɨ osɨrɨ vae pe, jare topɨta ikɨambae.

¹⁴ Jare chiu araa pe toipɨɨ mókoi pɨkasui jare mókoi pɨkasutï, jare togüeru cheróvai tupao guakapi pegua jöke pe, jare tomee sacerdote pe.

¹⁵ Jare sacerdote tomee metei mbota mbaeyoa regua, jare ïru mɨmba oyeyukagüe opaetei oyeapɨ vae peguarä; jökorai sacerdote toitɨo cheróvai jókuae kuimbae imbaerasɨ güi taɨ oë vae.

¹⁶ Kuimbae imbaerasɨ güi taɨ oë yave toyoe opaete jete ɨ pe jare tikɨa topɨta Tumpa jóvai pɨ̈tu regua.

¹⁷ Jare opaete jemimonde re ani mɨmba pire re oya yave jókuae mbaerasɨ oëgüe, toyeyoe ɨ pe jare tikɨa topɨta Tumpa jóvai pɨ̈tu regua.

¹⁸ Metei kuimbae oyapakua yave kuña ndive jare opoko jese yave, mókoi reve toyeyoe ɨ pe jare tikɨa topɨta reta Tumpa jóvai pɨ̈tu regua.

Kuña oiporara yasɨ ñavo vae regua mborookuai reta

¹⁹ Metei kuña oiporara yave tugüɨ omombo vae, jare jugüɨ oya yave jete re, chiu ara toiko tee jaeño. Oipotagüe oyavɨkɨ vae yave, tikɨa topɨta Tumpa jóvai pɨ̈tu regua.

²⁰ Oipotagüe mbae re oyapakua yave, oiko tee ramboeve, tikɨa topɨta Tumpa jóvai. Oipotagüe mbae re oguapɨ vae tikɨa topɨta Tumpa jóvai.

²¹ Oipotagüe oyavɨkɨ yave jupa, toputuka jemimonde reta, jare opa oyau güire tikɨa topɨta Tumpa jóvai pɨ̈tu regua.

²² Oipotagüe oguapɨ yave imbaerasɨ vae jendagüe re, toputuka jemimonde reta jare toyau jare tikɨa topɨta Tumpa jóvai pɨ̈tu regua.

²³ Jaeramiño vi jókuae kuña oyapakuaa pe ani oguapɨa pe mbae oï vae kia oyavɨkɨ yave, tikɨa topɨta Tumpa jóvai pɨ̈tu regua.

²⁴ Kia nunga vae oyapakua yave jae ndive jugüɨ oï reve, jare jugüɨ oya jese yave, tikɨa topɨta Tumpa jóvai chiu ara rupi, jare jókuae kuimbae opaete mbae re oyapakua vae, tikɨa topɨta Tumpa jóvai.

²⁵ Metei kuña mbovɨ ara oiporara yave tugüɨ ndei iara oväe mbove, ani oasa ete oiporara yasɨ ñavo oiporara vae güi yave, tikɨa topɨta Tumpa jóvai tugüɨ oiporarase yave rami.

²⁶ Opaete tupa, jókuae kuña oke jese vae, ani tenda oguapɨ jese vae, tikɨa topɨta Tumpa jóvai, tugüɨ oiporarase yave rami.

²⁷ Jare oipotagüe oyavɨkɨ jókuae mbaembae reta vae, tikɨa topɨta Tumpa jóvai. Jayave toputuka jemimonde reta, jare jae etei toyau vi jare tikɨa topɨta Tumpa jóvai pɨ̈tu regua.

²⁸ Jare jugüɨ opɨta güire, toäro chiu ara, jare jaɨkue rupi topɨta ikɨambae.

²⁹ Juri araa pe, togüeru sacerdote pe mókoi pɨkasui jare mókoi pɨkasutï, tupao guakapi pegua jöke pe.

³⁰ Jare sacerdote tomee metei mbota mbaeyoa regua, jare ïru tomee mɨmba oyeyukagüe opaetei oyeapɨ vae, jökorai sacerdote toitɨo cheróvai tugüɨ oiporara vae güi.

³¹ Jökorai toñeñono tee Israel iñemuña reta ikɨa yave, agüɨye vaerä omano reta omongɨa yave chero guakapi pegua ipɨte pe oï vae.”

^32-33 Jae kuae mborookuai kuimbae imbaerasɨ güi taɨ oë vae regua, jare kuña oiporara yasɨ ñavo vae, jare oasa ete tugüɨ oiporara vae regua, ani kuimbae oyapakua kuña jugüɨ reve oï vae ndive regua, echa ikɨa ko opɨta reta Tumpa jóvai kuae mbaerasɨ jeko pegua.