LEVÍTICO 14 - Biblia Guarani Tumpa Iñee

Mborookuai reta pire mbaerasɨ ókui vae oyetɨo vae regua

¹ YandeYa jei Moisés pe:

² “Kuae mborookuai toiko ipire mbaerasɨ ókui vae oyetɨo oï vae peguarä: Toyereru sacerdote pe,

³ jare jae toë teyupa güi ikatu pe, jare joko pe tomae kavi jese; jare oecha yave ipire mbaerasɨ ókui vae okuera ma yave,

⁴ sacerdote tomondouka togüeru oyetɨo oï vae pe mókoi güɨra oyeu vae oikovegüe, jare ɨ̈vɨrare, temimonderä pɨ̈ta vae jare ñana hisopo jee vae.

⁵ Jare sacerdote toyukauka metei güɨra ɨvɨyapepo pe ɨ osɨrɨ vae pegua ɨ güɨnoi vae iárambo,

⁶ jaɨkue rupi toipɨɨ güɨra oikoveño oï vae, jare ɨ̈vɨrare, jare temimonderä pɨ̈ta vae, jare ñana hisopo jee vae, jare kuae reta tomoäkɨ güɨra oikoveño vae ndive, güɨra oyeyuka ɨ iárambo vae jugüɨgüe pe;

⁷ jare toñapiramo chiu ye tugüɨ pe jókuae ipire mbaerasɨ ókui vae güi oyetɨo oï vae re; jare tomombeu ikɨambae ma ko. Javoi topoi güɨra oikove oï vae güi ñana pe.

⁸ Jare oyetɨo oï vae toputuka jemimonde, toñapiasɨ ia, jare toyau, opɨta vaerä ikɨambae; javoi ipuere oike ye teyupa pe, ërei ngatu toiko iküaraɨa guakapi pegua güi ikatu pe chiu ara rupi.

⁹ Jare chiu araa pe toñapiasɨ ia, jendɨvaa, jësapɨka jare opaete jaa, toputuka jemimonde jare toyau, jare topɨta ikɨambae.

¹⁰ Jare juri araa pe, tomee mókoi vecha kuimbae taɨrusu vae jete kavi vae, jare metei vecha kuña metei año vae jete kavi vae, jare ova kilo trigokúi ipɨuasɨ vae mbotarä, oyemómbɨu olivo iasaite pe vae, jare olivo iasaite metei litro seri.

¹¹ Jare sacerdote oporotɨo oï vae, togüɨraja cheróvai oyetɨo vae mbota reta ndive, tupao guakapi pegua jöke pe.

¹² Jare sacerdote toipɨɨ metei vecha kuimbae, jare tomee olivo iasaite metei litro seri vae ndive, Tumpa iñɨ̈ro vaerä mbaeyoa re, togüɨrökuavee tomee mɨmba oñererökuavee oñemee cheróvai vae.

¹³ Jare toñaseokɨ̈ti vecha kuimbae taɨrusu vae, mɨmba oyeyuka mbaeyoa re vae, mɨmba oyeyuka opaetei oyeapɨ vae oñeaseokɨ̈tía pe. Echa mɨmba oyeyuka mbaeyoa re vae jare mɨmba oyeyuka ñɨ̈ro pegua vae sacerdote imbaerä ko, mbae oñeñono tee kavi yae vae ko.

¹⁴ Jare sacerdote toipɨɨ mɨmba oyeyuka ñɨ̈ro peguarä vae jugüɨgüe, jare toñono oyetɨo vae inambi iyakatu kotɨgua jembeɨ ɨvɨkotɨgua re, ipoäka guasu jare ipɨ̈sa guasu iyakatu kotɨgua re.

¹⁵ Jaeramiño vi sacerdote toipɨɨ olivo iasaite metei litro seri vae jare topɨyere ipo mbɨte iyasu kotɨgua pe.

¹⁶ Jare tomoäkɨ ipoäka iyakatu kotɨgua ipo iyasu pe olivo iasaite güɨnoi vae pe, jare ipoäka pe olivo iasaite ndive toñapiramo chiu ye cheróvai.

¹⁷ Jare sacerdote ipo pe güɨnoi olivo iasaite vae jembɨregüe toñono oyetɨo oï vae inambi iyakatu kotɨgua jembeɨ ɨvɨkotɨgua re, jare ipoäka guasu jare ipɨ̈sa guasu iyakatu kotɨgua re, mɨmba oyeyuka ñɨ̈ro peguarä vae jugüɨgüe oñeñonoa iárambo.

¹⁸ Jare olivo iasaite jembɨregüe ipo pe güɨnoi vae, toñono oyetɨo oï vae iñäka re; jare sacerdote toyapo chupe, cheɨ̈ro vaerä mbaeyoa re.

¹⁹ Kuae jaɨkue rupi sacerdote tomee mɨmba oyeyuka mbaeyoa re vae, cheɨ̈ro vaerä mbaeyoa re, ikɨa güi oyetɨo oï vae re; jaɨkue rupi toñaseokɨ̈ti mɨmba oyeyuka opaetei oyeapɨ vaerä vae,

²⁰ jare sacerdote toñono mɨmba oyeyuka oyeapɨ jese vae re mɨmba oyeyukagüe opaeteita oyeapɨ vae, mbɨyape mbota ndive. Jökorai sacerdote toyapo chupe, cheɨ̈ro vaerä mbaeyoa re, ipire mbaerasɨ ókui vae iyoa re, jare topɨta ikɨambae.

²¹ Ërei paravete yae yave, mbaetɨ ipuere güɨnoi opaete mbae mbotarä yave, toipɨɨ metei vecha kuimbae taɨrusu vae togüɨrökuavee mbota oñererökuavee ñɨ̈ro peguarä vae rami, oñeñono kavi vaerä, jare mókoi kilo trigokúi ipɨuasɨ vae, olivo iasaite pe oyemómbɨu vae mbotarä, jare olivo iasaite metei litro seri,

²² jare mókoi pɨkasui, ani mókoi pɨkasutï, jae ipuereta oyapo vae; metei, cheɨ̈ro vaerä mbaeyoa re jare ïru, opaetei oyeapɨ vaerä.

²³ Juri araa pe opa oyetɨo güire, togüeru kuae mbota reta sacerdote pe, tupao guakapi pegua jöke pe cheróvai.

²⁴ Jare sacerdote toipɨɨ vecha kuimbae taɨrusu vae, cheɨ̈ro peguarä mɨmba oyeyuka vae, jare olivo iasaite metei litro seri, jare togüɨrökuavee mbota oñererökuavee oñemee cheróvai vae rami;

²⁵ javoi toñaseokɨ̈ti vecha kuimbae taɨrusu vae ñɨ̈ro pegua, jare toipɨɨ jugüɨgüe, jare toñono oyetɨo oï vae inambi iyakatu kotɨgua jembeɨ ɨvɨkotɨgua re, ipoäka guasu jare ipɨ̈sa guasu iyakatu kotɨgua re;

²⁶ jare topɨyere michi mi olivo iasaite ipo mbɨte iyasu kotɨgua pe,

²⁷ jare ipoäka iyakatu kotɨgua tomopöe olivo iasaite pe, jare toñapiramo chiu ye cheróvai, jókuae olivo iasaite iyasu kotɨ güɨnoi vae pe.

²⁸ Jaeramiño vi sacerdote toñono olivo iasaite ipo pe güɨnoi vae güi oyetɨo oï vae inambi iyakatu kotɨgua jembeɨ ɨvɨkotɨgua re, ipoäka guasu jare ipɨ̈sa guasu iyakatu kotɨgua re, jókuae mɨmba oyeyuka ñɨ̈ro peguarä vae jugüɨgüe oñeñonoa iárambo.

²⁹ Jare olivo iasaite jembɨregüe toñono oyetɨo oï vae iñäka re, oñeñono kavi vaerä cheróvai.

³⁰ Jaeramiño vi sacerdote tomee metei pɨkasui ani metei pɨkasutï, jókuae oyetɨo vae ipuere omee rupi.

³¹ Metei toyeyuka cheɨ̈ro vaerä mbaeyoa re, jare ïru, opaetei oyeapɨ vaerä, jaeramiño vi trigokúi jare olivo iasaite. Jökorai sacerdote toyapo jókuae oyetɨota vae pe, cheɨ̈ro vaerä mbaeyoa re.”

³² Jae kuae mborookuai pire mbaerasɨ ókui vae regua, mbaetɨ yave oupitɨ chupe omee vaerä mbota tuicha vae oyetɨo vaerä.

Mborookuai reta o oyetɨo mbaerasɨ ókui vae güi regua

³³ YandeYa jei Moisés pe jare Aarón pe:

³⁴ “Peike ma yave ɨvɨ Canaán pe, che amee ɨvɨ pembaerä vae pe, jare amondo yave mbaerasɨ ókui vae, amogüe o re jókuae peɨvɨ pe,

³⁵ tou jókuae o iya tomombeu sacerdote pe, körai: ‘Oimeecha mbaerasɨ pɨ̈chɨi vae chero re.’

³⁶ Jayave sacerdote tomoë jókuae o iya opaete imbaembae ndive jo güi ndei omae mbove o re, agüɨye vaerä oikomegua opaete mbaembae oï o japɨpe pe vae; jare jaɨkue rupi toike tomae jese.

³⁷ Jare tomae kavi mbaerasɨ pɨ̈chɨi vae re; jare oyekuaa oike oguambɨ re ikɨa jovɨ äve ani pɨ̈ta äve vae yave,

³⁸ sacerdote toë jókuae o güi, jare toyokenda jöke chiu ara rupi.

³⁹ Jare chiúa ara pe, tou ye sacerdote tomae jese, jare mbaerasɨ pɨ̈chɨi oñemoai oguambɨ reta re yave,

⁴⁰ toekɨuka jókuae ita reta re oyekuaa mbaerasɨ pɨ̈chɨi vae, jare tomombo reta tëta guasu güi ikatu pe, ikavimbaea pe.

⁴¹ Jare toikɨtɨuka japɨpe opaete iyɨ́vɨri, jare ikuigüe jare ituyuapogüe tomombo reta tëta guasu güi ikatu pe ikavimbaea pe.

⁴² Jare togüeru ïru ita reta, jare toñono ita reta oyeekɨ vae jendagüe pe; jare toyapo ïru tuyuapo ipɨau vae oyapete ye vaerä oguambɨ pɨpe.

⁴³ Jare oë ye yave mbaerasɨ pɨ̈chɨi vae jókuae oguambɨ re oñeñono kavi güire,

⁴⁴ jayave sacerdote toike tomae kavi jese; mbaerasɨ pɨ̈chɨi vae oñemoai yave jókuae o re, mbaerasɨ ókui vae ko oï o re; ikavimbae yae ko.

⁴⁵ Toyembosururu jókuae o, ita reta, ɨvɨra reta, jare opaete mbaembae o regua; toñerenoe opaete tëta guasu güi ikatu pe, ikavimbaea pe.

⁴⁶ Jare oipotagüe oike yave jókuae o pe oyeokenda oï reve chiu ara rupi, tikɨa topɨta Tumpa jóvai pɨ̈tu regua.

⁴⁷ Jare kia oike oke yave jókuae o pe, toputuka jemimonde reta; jaeramiño vi kia oike yave okaru jókuae o pe, toputuka jemimonde reta.

⁴⁸ Ërei sacerdote oike yave omae kavi jese, jare oecha yave mbaerasɨ pɨ̈chɨi vae mbaetɨ oñemoai o re opa güire oyeapo kavi, sacerdote tomoërakua ikɨambae ko, echa mbaerasɨ pɨ̈chɨi vae opa okañɨ.

⁴⁹ Jayave oitɨo vaerä o toipɨɨ mókoi güɨra jare ɨ̈vɨrare, temimonderä pɨ̈ta vae jare ñana hisopo jee vae.

⁵⁰ Jare metei güɨra toyuka ɨvɨyapepo pe ɨ osɨrɨ vae pegua ɨ güɨnoi vae iárambo.

⁵¹ Jare toipɨɨ ɨ̈vɨrare, ñana hisopo jee vae, temimonde pɨ̈ta vae jare güɨra oikove vae, jare tomoäkɨ güɨra oyeyuka vae jugüɨgüe pe, jare ɨvɨyapepo pe ɨ osɨrɨ vae oï vae pe, jare toñapiramo chiu ye jókuae o.

⁵² Jökorai o toitɨo güɨra jugüɨgüe pe, jare ɨvɨyapepo pe ɨ osɨrɨ vae pegua oï vae pe, güɨra oikove vae pe, ɨ̈vɨrare pe, ñana hisopo jee vae pe, jare temimonde pɨ̈ta vae pe.

⁵³ Jaɨkue rupi topoi güɨra oikove vae güi, tëta guasu güi ikatu pe kaa pe. Jökorai toyapo mɨmba oyeyukagüe cheɨ̈ro vaerä mbaeyoa re, jare topɨta ikɨambae.”

⁵⁴ Jae kuae mborookuai mbaerasɨ pɨ̈chɨi vae regua, pire mbaerasɨ ókui vae regua, äka regua jare tañɨka regua pire mbaerasɨ ókui vae,

⁵⁵ temimonde regua mbaerasɨ ókui vae jare o regua,

⁵⁶ ipere iruru vae regua, ipere ichuumbi vae regua, jare ipire morotï vae regua,

⁵⁷ pepuere vaerä peikuaa ikavimbae jare ikɨambae. Jae ko kuae mborookuai pire mbaerasɨ ókui vae regua.