LEVÍTICO 12 - Biblia Guarani Tumpa Iñee

Kuña oyekuaku güire oyetɨo vae regua

¹ YandeYa jei Moisés pe:

² “Ere Israel iñemuña reta pe körai: Kuña ipurúa jare imembɨ oa vae kuimbae ko yave, tikɨa topɨta Tumpa jóvai chiu ara, tugüɨ oiporara yasɨ ñavo vae rami.

³ Jare juría ara pe toyembocircuncida jókuae michia.

⁴ Ërei oyekuaku vae topɨta treinta y tres ara oyetɨo vaerä oiko jugüɨ güi; agüɨye toyavɨkɨ mbae oñeñono tee Tumpa pe vae, jare agüɨye vi tou o mbaemboetea pe, omboapɨ regua ara reta opa oyetɨo vae.

⁵ Jare imembɨ, kuña ko yave, tikɨa topɨta Tumpa jóvai mókoi semana, oiporara yasɨ ñavo vae rami, jare sesenta y seis ara toyetɨo toiko jugüɨ güi.

⁶ Jare yetɨo iara reta opa omboapɨ yave, imembɨ kuimbae re, ani kuña re; togüeru metei vecha kuimbae taɨrusu vae metei año vae mɨmba opaetei oyeapɨ vaerä, jare metei pɨkasutï taɨrusu vae ani pɨkasui cheɨ̈ro vaerä mbaeyoa re. Togüeru sacerdote pe tupao guakapi pegua jöke pe.

⁷ Jare sacerdote tomee cheróvai oyemboai vaerä kuña güi iyoa, jare topɨta ikɨambae jugüɨ güi.” Jae ko kuae mborookuai kuña imembɨ oa yave kuimbae ani kuña.

⁸ Jare mbaetɨ oupitɨ ogua vaerä metei vecha kuimbae taɨrusu vae yave, togüeru mókoi pɨkasui ani mókoi pɨkasutï taɨrusu vae, metei opaetei oyeapɨ vaerä jare ïru, cheɨ̈ro vaerä mbaeyoa re; jare sacerdote tomee kuae mɨmba reta jókuae kuña iyoa re cheɨ̈ro vaerä, jare topɨta ikɨambae.