LEVÍTICO 11 - Biblia Guarani Tumpa Iñee

Mɨmba reta oyeu vae jare oyeumbae

¹ YandeYa jei Moisés pe jare Aarón pe:

² “Pere Israel iñemuña reta pe: ‘Kuae ko jae mɨmba reta peu vaerä, opaete ïru mɨmba reta ɨvɨ pegua güi.

³ Mɨmba reta ipɨte güi, opaete ipɨ̈sa jakambɨ vae, jembíu omboyevɨ vae reta, jókuae nunga peu;

⁴ ërei jembíu omboyevɨ ani ipɨ̈sa jakambɨ vae agüɨye peu: Camello omboyevɨ jembíu ërei mbaetɨ ipɨ̈sa jakambɨ, peumbae vaerä toiko.

⁵ Jaeramiño vi tapiti mɨmba, echa omboyevɨ jembíu, ërei mbaetɨ ipɨ̈sa jakambɨ, peumbae vaerä toiko.

⁶ Jökoraiño vi tapiti ñana rupigua echa jembíu omboyevɨ, ërei mbaetɨ ipɨ̈sa jakambɨ, peumbae vaerä toiko.

⁷ Jaeramiño vi kuchi, güɨnoi ipɨ̈sa jakambɨ ërei mbaetɨ jembíu omboyevɨ, peumbae vaerä toiko.

⁸ Kuae reta isoogüe agüɨye peu, jare agüɨye peyavɨkɨ jëogüegüe; peumbae vaerä toyogüɨreko.

⁹ Jevae reta ɨ rupigua güi, kuae reta peuta: Opaete güɨnoi ipepo raɨ jare ipire vae, ɨguasu rupigua jare ɨ̈aka rupigua.

^10-12 Ërei opaete jevae mbaetɨ güɨnoi ipepo raɨ ani ipire vae reta, ɨguasu rupigua jare ɨ̈aka rupigua reta, jare opaete mbae omɨi vae reta, oikove ɨ rupi vae reta ani isoogüe peyuguaru chugüi reta vaerä toyogüɨreko.

¹³ Jare kuae nunga güɨra reta agüɨye peu, peyuguaru chugüi reta: Güɨraké, güɨraké guasu, güɨrakeovɨ,

¹⁴ guäpi, jare oipotagüe güɨraké ambuaeyee ye vae,

¹⁵ oipotagüe uruapúa reta,

¹⁶ yandu, suinda, güɨra ɨ rupigua, jare oipotagüe kirikiri ambuaeyee ye vae,

¹⁷ surumbukuku, kärau rami vae reta, güɨratï reta,

¹⁸ patu ganso, güɨratï, tayasugüɨra, ururutï,

¹⁹ güɨratï, jare oipotagüe güɨratï ambuaeyee ye vae, güɨra iyatɨra vae jare andɨra.

²⁰ Opaete mbae michi raɨ vae ipepo vae reta, irundɨ ipɨ re oguata vae reta peyuguaru chugüi vaerä toyogüɨreko,

²¹ ërei mbae michi raɨ vae ipepo vae reta, irundɨ ipɨ re oguata vae reta, jare mókoi iu puku re ochäguariko oguata ɨvɨ re vae reta, jókuae nunga peu.

²² Jae kuae reta peu vaerä: Tuku, tukuraɨ jare oipotagüe tuku reta ambuaeyee ye vae,

²³ Ërei opaete ïru mbae michi raɨ vae ipepo vae reta, irundɨ ipɨ re oguata vae reta, peyuguaru chugüi vaerä toyogüɨreko.

²⁴ Kuae mɨmba reta rupi peyemongɨa: Oipotagüe oyavɨkɨ jókuae jëogüegüe vae tikɨa topɨta Tumpa jóvai pɨ̈tu regua.

²⁵ Oipotagüe oekɨ mbae güɨraja jókuae mɨmba reta jëogüegüe güi vae, toputuka jemimonde jare tikɨa topɨta Tumpa jóvai pɨ̈tu regua.

²⁶ Opaete mɨmba ipɨ̈sa vae, ërei mbaetɨ ipɨ̈sa jakambɨ vae, ani mbaetɨ jembíu omboyevɨ vae, peumbae vaerä toyogüɨreko; jare oipotagüe oyavɨkɨ vae tikɨa topɨta Tumpa jóvai.

²⁷ Jare opaete mɨmba irundɨ ipɨ re oguata vae ipöape vae reta, peumbae vaerä toyogüɨreko, jare oipotagüe oyavɨkɨ jëogüegüe vae tikɨa topɨta Tumpa jóvai pɨ̈tu regua.

²⁸ Jare güɨraja jókuae jëogüegüe vae, toputuka jemimonde reta jare tikɨa topɨta Tumpa jóvai pɨ̈tu regua, jare peumbae vaerä toyogüɨreko.

²⁹ Opaete mɨmba reta güi kuae ɨvɨ re ipɨtía re oguata vae reta, peumbae vaerä toyogüɨreko kuae reta: Guaki, anguya, jare pïte ambuaeyee ye vae,

³⁰ küi, päicha, teyu guasu, teyuovɨ, teyu yagua.

³¹ Opaete mɨmba reta güi, jókuae reta peumbae vaerä toyogüɨreko. Jare oipotagüe oyavɨkɨ jëogüegüe vae tikɨa topɨta Tumpa jóvai pɨ̈tu regua.

³² Jare kuae reta jëogüegüe oa yave mbaembae reta re, tikɨa topɨta Tumpa jóvai. Mbae ɨvɨra pegua, temimonde, mɨmbapire, urupuku, oipotagüe tembiporu mbaravɨkɨ pegua, toñeñono ɨ pe jare tikɨa topɨta Tumpa jóvai pɨ̈tu regua; jare jaɨkue rupi topɨta ikɨambae.

³³ Oipotagüe kuae mɨmba reta jëogüegüe oa yave ɨvɨyapepo pe, tikɨa topɨta Tumpa jóvai, jökorai vi opaete pɨpegua, jare toyeyoka jókuae ɨvɨyapepo.

³⁴ Opaete tembíu oyeu vae re oyepɨyere yave ɨ jókuae ɨrɨru pegua, tikɨa topɨta Tumpa jóvai, jare opaete pɨpegua, tikɨa topɨta Tumpa jóvai.

³⁵ Oipotagüe mbaembae re oa kuae mɨmba reta jëogüegüe yave, tikɨa topɨta Tumpa jóvai; horno ani tata jenda pe oa yave toyemboai, echa ikɨa ko Tumpa jóvai, jökorai pemae jese.

³⁶ Ërei ngatu ɨesaɨ ani ɨrɨru ɨ oñerenoe chugüi vae mbaetɨta ikɨa. Ërei mɨmba jëogüegüe güɨnoe vae, tikɨa topɨta Tumpa jóvai.

³⁷ Jare oime yave kuae mɨmba reta jëogüegüe oa mbae jäɨ oñeotɨta vae re, mbaetɨta ikɨa;

³⁸ ërei mbae jäɨ oñeotɨta vae oyemboruru oï vae re oa yave kuae mbae jëogüegüe, tikɨa topɨta Tumpa jóvai.

³⁹ Mɨmba oyeu vae omano pegüi vae jëogüegüe oyavɨkɨ vae, tikɨa topɨta Tumpa jóvai pɨ̈tu regua;

⁴⁰ jare jókuae mɨmba jëogüegüe isoo jou vae, toputuka jemimonde jare tikɨa topɨta Tumpa jóvai pɨ̈tu regua; jaeramiño vi jókuae mɨmba jëogüegüe güɨraja iyeupe vae, toputuka jemimonde jare tikɨa topɨta Tumpa jóvai pɨ̈tu regua.

⁴¹ Jare opaete ipɨtía re oguata ɨvɨ re vae reta agüɨye peu, oporomboyuguaru vae ko.

⁴² Opaete ipɨtía re oguata ɨvɨ re vae, jare irundɨ ipɨ re ani jeta ipɨ re oguata ɨvɨ re vae, peumbae vaerä toyogüɨreko, echa oporomboyuguaru vae ko.

⁴³ Agüɨye peñereröɨrouka kuae mɨmba ipɨtía re oguata vae reta rupi, agüɨye peñererokomegua pɨpe, agüɨye peyemongɨa Tumpa jóvai pɨpe.

⁴⁴ Echa che ko jae peYa Tumpa; jáeramo peñeñono tee jare peiko tee mbaeyoa güi, echa che ko iyoambae. Jáeramo agüɨye peyemongɨa kuae mɨmba reta ipɨtía re oguata vae rupi.

⁴⁵ Echa che ko jae peYa pogüɨnoeuka ɨvɨ Egipto güi vae, aiko vaerä peTumparä. Jáeramo peiko tee mbaeyoa güi, echa che ko iyoambae.’

⁴⁶ Jae kuae mborookuai mɨmba reta regua, güɨra reta regua, jare opaete oikove ɨ rupigua vae regua, jare ɨvɨ iárambo rupi vae regua.

⁴⁷ Peikuaa vaerä mɨmba ikɨa vae mɨmba ikɨambae güi jare mɨmba reta ipuere oyeu vae ani oyeumbae vae.”