LEVÍTICO 10 - Biblia Guarani Tumpa Iñee

Nadab jare Abiú iyoa

¹ Nadab jare Abiú, Aarón taɨ reta metei ñavo oipɨɨ ikäti kavi vae incienso oyeapɨ pɨpe vae, jare oñono reta pɨpe tätapɨi jare ikäti kavi vae incienso, jökorai güɨroike reta yandeYa jóvai tata ambuae vae, jae mbaetɨ oyókuai reta jese vae.

² Jare yandeYa ombou tata jare opa oapɨ reta. Jökorai opa omano yandeYa jóvai.

³ Jayave Moisés jei Aarón pe: —Körai voi ko yandeYa jei: “Chekotɨ yogüeru vae pe aechaukata che ko jae iyoambae, jare Israel iñemuña reta jóvai ayemboeteukata.” Jare Aarón kïrii opɨta.

⁴ Jare Moisés oenɨi Misael jare Elzafán, Uziel taɨ reta, Aarón itutɨ jare jei chupe reta: —Peike jare penoe perëtara reta o mbaemboetea güi, jare penoe teyupa güi ikatu pe.

⁵ Jayave jae reta oipɨɨ jemimonde sacerdote pegua peño güɨnoe teyupa güi ikatu pe, Moisés jei rami.

Sacerdote reta iparavɨkɨ

⁶ Jayave Moisés jei Aarón pe jare taɨ reta Eleazar jare Itamar pe: —Agüɨye peekɨ peäka-ɨru, agüɨye pemondoro peremimonde mbɨatɨtɨ jeko pegua, agüɨye vaerä pemano, agüɨye vaerä Tumpa iyarasɨ ou opaete perëtara reta re, ërei opaete Israel iñemuña reta tipɨatɨtɨ kuae yandeYa opa oapɨ vae reta re.

⁷ Agüɨye peë tupao guakapi pegua ikësea güi, echa pemanota ko; echa peñeñono tee ma olivo iasaite yandeYa imbae rupi, peiko tee vaerä imbaerä. Jayave jae reta oyapo Moisés jei rami.

⁸ Jare yandeYa jei Aarón pe:

⁹ “Peike tupao guakapi pegua pe nde jare nderaɨ reta ndive yave, agüɨye peu vino ani mbae oporombosavaɨpo vae, agüɨye vaerä pemano; mborookuai jekuae avei pegua toiko peñemuña reta pe,

¹⁰ peikuaa vaerä oñeñono tee Tumpa peguarä vae, oñereröɨro vae, ikɨa vae jare ikɨambae vae,

¹¹ jare pemboe vaerä Israel iñemuña reta opaete mborookuai che peYa jae Moisés rupi vae.”

¹² Jare Moisés jei Aarón pe jare taɨ reta oikoveño vae Eleazar jare Itamar pe: —Peekɨ mbɨyape jembɨregüe mbota oyeapɨ yandeYa pe vae güi, jare peu oyembovumbae reve mɨmba oyeyuka oyeapɨ jese vae iyɨpɨ pe, echa mbae oñeñono tee kavi yae vae ko.

¹³ Jare peu oñeñono teea pe, echa kuae ko ndeveguarä jare nderaɨ reta peguarä, mbota reta oyeapɨ yandeYa pe vae, jökorai yandeYa cheokuai.

¹⁴ Jaeramiño vi nderaɨ reta jare nderayɨ reta ndive peu ikɨambaea pe, ipɨtiagüe jare iugüe oñererökuavee vae, echa ndembae ko jare nderaɨ reta imbae ko, mɨmba oyeyuka yembopɨakatu peguarä vae Israel iñemuña reta regua oñemee vae.

¹⁵ Mɨmba ikɨragüe mbota oñemee oyeapɨ vaerä vae ndive togüeru reta ipɨtiagüe jare iugüe oñererökuaveeta vae, jare tomee mbota oñererökuavee oñemee yandeYa pe vae; jupi ko opɨta avei vaerä ndembaerä jare nderaɨ reta imbaerä, yandeYa oporookuai rami.

¹⁶ Jare Moisés oparandu kavara kuimbae oyeyuka Tumpa iñɨ̈ro vaerä mbaeyoa re vae re, ërei opa ma yepe oyeapɨ; jare iyarasɨ Aarón taɨ reta opɨtaño vae kotɨ, Eleazar jare Itamar kotɨ, jei:

¹⁷ —¿Maera pa mbaetɨ peu mɨmba oyeyuka Tumpa iñɨ̈ro vaerä mbaeyoa re vae oñeñono teea pe? Echa oñeñono tee kavi yae vae ko, jae omee peve peraja vaerä jeta vae reta jeko ikavimbae, oñeñono kavi ye vaerä yandeYa jóvai.

¹⁸ Peecha ko tugüɨ mbaetɨ ma oyereraja o mbaemboetea japɨpe, jare pe reta peuta tëi ko oñeñono teea pe, jókuae mɨmba oyeyukagüe, che poyókuai rami.

¹⁹ Jare Aarón jei Moisés pe: —Mase añave omee reta ma mɨmba oyeyuka Tumpa iñɨ̈ro vaerä mbaeyoa re vae, jare mɨmba oyeyukagüe opaetei oyeapɨ yandeYa jóvai vae, jare che asusere aï re katu kuae oasa che ndive. Jau yave jókuae mɨmba oyeyukagüe Tumpa iñɨ̈ro vaerä mbaeyoa re vae, ¿ambopɨakatuta ra yandeYa?

²⁰ Moisés oendu yave kuae re, ipɨakatu opɨta.