LEVÍTICO 1 - Biblia Guarani Tumpa Iñee

Mɨmba oyeyukagüe opaetei oyeapɨ vae

¹ YandeYa oenɨi Moisés, jare jei chupe tupao guakapi pegua güi:

² “Ere Israel iñemuña reta pe: Kia nunga vae omee yave cheve mbota jɨmba reta güi, tomee guaka reta güi, vecha reta güi ani kavara reta güi.

³ Güeru yave mɨmba oyeyuka opaetei oyeapɨ vaerä vae; togüeru toro jete kavi vae; ipɨa-kɨ̈reɨ ngatu reve tomee tupao guakapi pegua ikësea jöke pe cheróvai.

⁴ Jare toñono ipo jókuae mɨmba oyeyukata vae iñäka re, jare jese cheɨ̈rota chupe iyoa re.

⁵ Jayave toñaseokɨ̈ti toro taɨrusu vae cheróvai; jare sacerdote reta, Aarón taɨ reta tomee mɨmba jugüɨgüe, jare toñapiramo reta mɨmba oyeyuka oyeapɨ jese vae iyɨke yɨke re, tupao guakapi pegua jöke pe oï vae.

⁶ Jare tomboi jókuae mɨmba oyeyukagüe, jare tomboyao iyoapɨa rupi kavi,

⁷ jare sacerdote Aarón taɨ reta tomoendɨ tata mɨmba oyeyuka oyeapɨ jese vae re, jare iárambo toñono kavi reta yepea,

⁸ jare toñono kavi reta oyemboyao yaogüe, iñäkagüe jare ichuri kɨragüe yepea re, jókuae yepea oïta tata pe mɨmba oyeyuka oyeapɨ jese vae re vae.

⁹ Jare mbota omee vae toyoe ɨ pe ichuri churigüe jare iugüe reta, jare sacerdote toapɨ mɨmba oyeyuka oyeapɨ jese vae re; mɨmba oyeyukagüe opaetei oyeapɨ vae ko, mbota ipiche katu vae ko cheveguarä.

¹⁰ Kia nunga vae güeru yave mbota jɨmba reta güi, mɨmba opaeteita oyeapɨ vae, tomee jete kavi vae vecha kuimbae taɨrusu vae ani kavara kuimbae taɨrusu vae.

¹¹ Jare toñaseokɨ̈ti mɨmba oyeyuka oyeapɨ jese vae güi ɨvɨtuguasu kotɨ cheróvai; jare sacerdote reta Aarón taɨ reta toñapiramo jugüɨgüe pe mɨmba oyeyuka oyeapɨ jese vae iyɨke yɨke re.

¹² Tomboyao iyoapɨa rupi kavi, iñäkagüe, ichuri kɨra reta ndive; jare sacerdote toñono kavi yepea re, jókuae yepea oïta tata pe mɨmba oyeyuka oyeapɨ jese vae re vae.

¹³ Jare toyoe ɨ pe ichuri churigüe jare iugüe reta; jare sacerdote tomee opaete, toapɨ mɨmba oyeyuka oyeapɨ jese vae re; mɨmba oyeyukagüe opaetei oyeapɨ vae ko, mbota ipiche katu vae ko cheveguarä.

¹⁴ Ërei kia nunga güeru yave güɨra mbotarä cheve, togüeru pɨkasui ani pɨkasutï.

¹⁵ Jare sacerdote toñäka mondoo, toapɨ iñäkagüe mɨmba oyeyuka oyeapɨ jese vae re, jare toitɨami jugüɨgüe mɨmba oyeyuka oyeapɨ jese vae iyɨke re.

¹⁶ Toavoo jare toekɨ iyachuai jare tomombo mɨmba oyeyuka oyeapɨ jese vae güi kuaraɨ oëa kotɨ, tanimbu oyemomboa pe.

¹⁷ Jare toipeka ikupepɨte rupi ipepo reta ipäu rupi, ërei agüɨye tomboyao oyougüi; jare sacerdote toapɨ mɨmba oyeyuka oyeapɨ jese vae re, yepea oï tata pe vae re; mɨmba oyeyukagüe opaetei oyeapɨ vae ko, mbota ipiche katu vae ko cheveguarä.