LAMENTACIONES 5 - Biblia Guarani Tumpa Iñee

Mbɨatɨtɨ pandepoa

¹ CheYa Tumpa, nemaendúa rosusere vae re; emae oreré, kërai mbae jasɨ katu vae jei reta orekotɨ vae re.

² Opaete oreɨvɨ opɨta, ketɨgua reta ipo pe; orero reta opɨta, ïru tëtaguasu pegua reta joorä.

³ Tɨ̈reɨ rami ko ore, mbaetɨ oreru; oresɨ reta opɨta imemano vae rami.

⁴ ¡Oreɨ aeño rogua ye rou; oreyepea aeño rogua ye!

⁵ Roiko yeokuaiasɨ katu rupi; orekangɨ yae ma. Mbaetɨ oreveguarä mbutuu.

⁶ Egiptoɨgua reta pe jare Asiriaɨgua reta pe royerure tembíu re, rokaru vaerä.

⁷ Oreñemuñagüe reta iyoa, jare opa ma omano; ërei ore roiporara jae reta iyoa re.

⁸ Tembiokuairä yogüɨrekose vae, añave güɨnoi mbaepuere oreré; mbaetɨ kia orereepɨ vaerä chugüi reta.

⁹ Mano pe etei roñemoëgua, rogüeru orerembiurä yave, jeta ñuu rupi okätɨro vae reta oime reve.

¹⁰ Orepire jaku orno rami; oremboaku karuai.

¹¹ Oyuvanga reta kuña reta re Sión pe, Judá pegua tëta guasu reta rupi oyuvanga kuñatai reta re.

¹² Oipokua reta mburuvicha ombosagüɨu; mbaetɨ omboete reta ndechi reta.

¹³ Taɨrusu vae reta güɨraja ombaeso vaerä; kunumi reta opa ombogüɨapi yepea ivoɨ.

¹⁴ Tenondegua reta mbaetɨ yé ma oyekuaa tëta guasu jöke rupi; taɨrusu vae reta itairari mbaetɨ ma oyeendu.

¹⁵ Mbaetɨ ma yerovia rogüɨnoi orepɨa pe; oreapirai oyepoepɨ mbɨatɨtɨ pe.

¹⁶ Oreyemboetea opa oregüi; ¡maera pa ko!, echa oreyoa.

¹⁷ Jáeramo orepɨatɨtɨ yae; jäve ma romae, royaeo mbatee güi.

¹⁸ Ɨvɨtɨ Sión ipoä oï; aguara retaño oguata jokoropi.

¹⁹ Ërei nde cheYa, reporookuai jekuae avei pegua; ¡ndeporookuaía oiko jekuae avei pegua!

²⁰ ¿Maera pa neakañɨ etei oregüi? ¿Maera pa ɨma yae orereeya?

²¹ ¡OreYa Tumpa, orereru ye ndekotɨ, jare ore royerova yeta! ¡Toroiko ye tenonde yave roiko rami!

²² Yepe tëi nde orereröɨro, jare ndearasɨ yae orekotɨ.