LAMENTACIONES 4 - Biblia Guarani Tumpa Iñee

Mbɨatɨtɨ irundɨa

¹ ¡Kërai ikɨa oro! ¡Kërai oro oyeambae mbaetɨ ma jembipe! O mbaemboetea pegua ita reta opaetei oñemoai ñogüɨnoi kaye rupi.

² Sión pegua reta, iyemboetea yae yepi oro güi vae, añave yogüɨreko ɨvɨyapepo, oñaeu-apo vae jembiapo rami.

³ Aguarayaɨmba reta ombokambu imembɨ reta, ërei kuae cherëta guasu pegua reta yandu ñuu rupigua imembɨ oeya vae rami ko.

⁴ Michia raɨ okambu vae, ikü oya iñäpeku re iɨuve yae güi. Michia reta oeka tembíu, ërei mbaetɨ kia omongaru reta.

⁵ Tenonde rupi okaru kavise reta vae, añave jovaruru ñogüɨnoi kaye rupi. Okuakuaa kavi yae vae reta, añave rupi yogüɨreko ɨtɨ oyemomboa rupi.

⁶ Echa jeiete yae cherëta guasu pegua reta iyoa, Sodoma pegua reta iyoa güi; jókuae tëta opa oyemboai jarembae pegua, mbaetɨ etei kia oporepeña jese reve.

⁷ Yanderuvicha reta ikɨambae ko yepi, oasa ete yé tïiasɨ iroɨ güi jare neche güi; ipireyuasɨ, mbaepotɨ iyu vae güi; jete kavi, ita zafiro jee vae güi.

⁸ Ërei añave, jüu yae ete pɨtumimbi güi; mbaetɨ etei ma kia oikuaa kaye rupi vae. Ipire opa oya ikägüe re, ¡otini yae yepea rami!

⁹ Ñeraro pe omano vae reta ikaviño, yɨmbɨaɨ oyuka vae güi; echa jovaruru reta omano mbegüe pe, mbaetɨ tembíu ɨvɨ pe jeko pegua.

¹⁰ Kuña reta jupi vae, omboyɨ imembɨ tembiurä; ¡imembɨ reta aeño oyapo reta jembiurä, cherëta guasu iyemboai iara pe!

¹¹ YandeYa oitɨ iyarasɨ, oitɨ opaetei iyarasɨ; oyatapɨ Sión re, opaetei omboai iguapɨka reve.

¹² Opaete ɨvɨ pegua mburuvicha guasu reta, jare opaete ɨvɨ pe yogüɨreko vae reta, mbaetɨ etei güɨrovia tovaicho reta oiketa ko Jerusalén jöke rupi etei vae.

¹³ ¡Opaete kuae oasa, ñeemombeúa reta iyoa jeko pegua jare isacerdote reta jeko kavimbae jeko pegua, echa tëta guasu rupi etei oyuka reta jekombae reta!

¹⁴ Jesambae rami oguata reta kaye rupi; opaetei oyemongɨa reta Tumpa jóvai tugüɨ pe, kuae jeko pegua mbaetɨ etei oipota oyavɨkɨ jemimonde vae.

¹⁵ Opaete jei chupe vae: “¡Pesɨrɨ, jókuae ikɨa Tumpa jóvai vae güi! ¡Pesɨrɨ chugüi! ¡Agüɨye peyavɨkɨ!” Opa otekuarai reta jare opa oñemoai moai reta. Tëtaguasu reta jei oyoupe: “Ngaraa etei ma yogüɨreko ye kuae pe.”

¹⁶ Tumpa iyarasɨ rupi opa omoai moai, ngaraa ye ma omae jese reta. Echa mbaetɨ omboete reta sacerdote reta, mbaetɨ etei iporoparareko reta ndechi reta re ave.

¹⁷ Oreresa ikangɨi roäro tëi yemborɨ. Roäroiño ma metei tëtaguasu mbaetɨta ipuere oporoepɨ vae.

¹⁸ Orepïaro reta opaete oreguataa rupi; mbaetɨ orepuere roë kaye pe. Oväe ma oreapɨ vaerä, oväe ma ara, ¡oväe ma oreapɨ vaerä!

¹⁹ Oreraɨkuemoña vae reta, iñäkua yae ete güɨraké güi; ¡oreraɨkuemoña ɨvɨtɨ rupi! ¡Okätɨro kavi reta ñuu rupi oreré!

²⁰ Oa tembipɨɨrä yandeYa jembiparavo, ñanemoäta ngatuse vae, jókuae mburuvicha guasu re yande yaese körai: “Jae iporoangareko rupi yaikota tëtaguasu reta ipɨte rupi.”

²¹ ¡Pepuka, peyerovia Edom pegua reta, ɨvɨ Uz pe peiko vae! ¡Ërei oväeta vi ndeve kopa arasɨ pegua, ndembosavaɨpota jare regüëeta!

²² Sión pegua reta, jae ma iyapɨ reiporara vae; Tumpa ngaraa ye ma omaeño reyereraja tembipɨɨrä. Ërei, pe Edom pegua reta, Tumpa oiporaraukata peyoa re peve, omboyekuaata pembaeyoa reta.