LAMENTACIONES 1 - Biblia Guarani Tumpa Iñee

Mbɨatɨtɨ tenondegua

¹ ¡Kërai ipombae opɨta, tëta guasu jeta yepi pɨpe vae! ¡Kuae tëta guasu jërakua ïru tëtaguasu reta rupi vae, ou opɨta kuña imemano vae rami! Tenondeguarä oiko yepi vae, añave ombaemboepɨ vaerä ma oiko.

² Ipɨatɨtɨ yae reve oyaeo pɨ̈tu rupi, jesaɨ osɨrɨ jova rupi. Opaete oaɨu vae reta güi, mbaetɨ metei ave ou ombopɨakatu vae. Opaete ivɨa-ïru reta ave oyembosɨrɨ chugüi, oyemboyovaicho reta ikotɨ.

³ Judá oyereraja tembipɨɨ, oiporara yae oï jasɨ katu yae reve; oï tëtaguasu reta ipɨte rupi jare mbaetɨ oväe mbutuu. Opaete jovaicho reta oupitɨ ɨvɨtɨ päu ipɨmiia pe.

⁴ ¡Sión kotɨ tape reta ojo vae kïrii ngatu mbɨatɨtɨ jeko pegua! ¡Mbaetɨ etei kia ou arete reta mbaemboete pegua pe vae! Tëta guasu öke reta opaetei oyemboai, isacerdote reta oyaeo, ikuñatai reta ipɨatɨtɨ, jare Jerusalén ipɨatɨtɨ yae vi.

⁵ Jovaicho reta ñogüɨnoi tenondeguarä, imotareɨa reta opa oyemboikokatu. Echa yandeYa ko oiporarauka, oyembopɨa pochɨ yae jeko pegua. Pɨpegua reta opa oyererajauka jovaicho reta pe ɨvɨ ambuae kotɨ.

⁶ Okañɨ, Sión ipöra yae vae; itenondegua reta, guasukaka oeka tëi kapii rami; añeapea yae ma oguata reta, oaɨkuemoña vae reta jenonde.

⁷ Jerusalén imaendúa, pɨpegua reta opa oa tovaicho reta ipo pe jare mbaetɨ kia omborɨ vae yave, imaendúa jae ipɨatɨtɨ opɨta vae re, jare oyembopɨapochɨ vae re. Imaendúa vi jeta mbaembae ipöragüe güɨreko arakae güive vae re. Jovaicho reta oecha yave jókuae, oyóyai yóyai reta opa oyemboai vae re.

⁸ Jerusalén tuicha iyoa, jókuae jeko pegua opa oyererajauka. Tenonde yave rupi omboetese reta vae, añave rupi güɨröɨro, oecha reta ramo inandi. Kuae jeko pegua iä-yekɨi oyaeo jare oñomi jova.

⁹ Jemimonde omongɨa iyoa pe; mbaetɨ oyemongeta këraita ko iyapɨ vae. Ñanemopɨakañɨ yé oa vae, jare mbaetɨ kia ombopɨakatu vaerä. ¡CheYa Tumpa, emae chepɨatɨtɨ re, echa tovaicho oyembotuicha yae!

¹⁰ Tovaicho reta oyemombae opaete Jerusalén pegua mbaembae jepɨ vae re. Jerusalén oecha ketɨgua reta oike o mbaemboetea pe vae, ¡reporookuai tëi agüɨye vaerä ketɨgua reta oike pɨpe vae pe!

¹¹ Opaete pɨpegua reta oyaeo reve oyembieka; omee reta opaete imbaembae jepɨ vae tembíu re, agüɨye vaerä jovaruru reta. ¡CheYa Tumpa, emae kërai aiporara yae aï vae re!

¹² Tape rupi peasa vae reta, ¿mbaetɨ pa cheparareko pemae cheré? ¡Pemae jare peyemongeta!, ¿oime ra che rami oiporara yae vae? ¡Echa cheYa ko oiporarauka cheve iyarasɨ iara pe!

¹³ Ɨvate güi ombou tata, chekägüe reta oapɨ vae; cheraperä pe oñono ñuai, jare chemboyerova ye; chemboai chereeya, ara ñavo aiporara yae.

¹⁴ YandeYa etei oñapɨti chepɨapochɨ cheré, metei yuvo ipoɨgüe rami avoɨ anoi, jókuae chembopɨtu yae. YandeYa chemee mbaetɨta chepuere reta jese vae ipo pe.

¹⁵ YandeYa opa omoamɨri chegüi kuimbae reta jëia yae vae. Ombou chekotɨ jeta vae reta, opa vaerä omokañɨtei chegüi taɨrusu reta. ¡YandeYa opɨ̈ro imbae vae Judá pegua reta re, uva re oñepɨ̈ro oñetɨami rami!

¹⁶ Kuaekuae reta jeko pegua ayaeo. Jeta yae cheresaɨ oyepɨyere, echa oyembosɨrɨ chegüi chembopɨakatu vae jare chemombutuu vae. Opa cheipo reta oyemboai, echa tovaicho reta jëia yae.

¹⁷ Sión oiporu tëi yemborɨ, ërei mbaetɨ kia ombopɨakatu vaerä. YandeYa omee mborookuai tovaicho reta oñova vaerä Jacob; chupegua reta, Jerusalén ikavimbae yae ko.

¹⁸ YandeYa, jupi ko; che ayembopɨapochɨ iñee kotɨ. ¡Añave, peendu opaete ɨvɨ pegua reta, pemae kuae aiporara yae aï vae re! ¡Chekunumi reta jare chekuñatai reta opa oyereraja tembipɨɨrä!

¹⁹ Asapúkai tëi cheraɨu vae reta pe, ërei jae reta chembotavɨ. Chesacerdote reta jare chetenondegua reta opa omano tëta guasu pe, oeka reta tëi tembíu, agüɨye vaerä jovaruru.

²⁰ ¡CheYa Tumpa, chepɨatɨtɨ yae aï! ¡Ayandu etei chepɨa onduku cheɨvɨte pe! Chepɨa-kërai, ayemongeta yave chepɨapochɨ yae vae re. Ikatu rupi, jeta yae oporoyuka vae, jare japɨpe rupi jeta mano.

²¹ Jeta vae oendu cheräse, ërei mbaetɨ kia chembopɨakatu. Opaete cherovaicho reta oikuaa chesusere, oyerovia reta nde ko jökorai cheapo vae. ¡Embou, jókuae ara remoërakua vae, jae reta toiporara vi che rami!

²² Tojo nderóvai opaete jae reta ikavimbae oyapogüe; eyapo vi chupe reta, opaete chepɨapochɨ re reyapo cheve rami, echa ayaeo mbatee yae ma ko, ¡chemombaerasɨ ma!