JUECES 3 - Biblia Guarani Tumpa Iñee

Tëtaguasu reta opɨta Canaán pe vae

¹ Kuae ko jae tëtaguasu reta yandeYa omaeño opɨta ojäa vaerä Israel iñemuña reta, jókuae mbaetɨ oikuaa reta kërai ko ñeraro opɨ̈ro vaerä ɨvɨ Canaán vae reta, echa ndei vɨteri oa reta.

² Jare oikatu vaerä oñeraro Israel iñemuña reta, mbaetɨ etei oikuaa kërai ko ñeraro vae.

³ Opɨta pandepo filisteo reta juvicha, opaete cananeo reta, Sidón pegua reta jare heveo reta ɨvɨtɨ Líbano pe yogüɨreko vae reta, ɨvɨtɨ Baal-hermón güive ojoi oya tëta guasu Hamat re.

⁴ Kuae reta rupi yandeYa oipota ojäa Israel iñemuña reta, oikuaa vaerä oyapota ra mborookuai reta jae omee Moisés rupi iñemuñagüe reta pe vae.

⁵ Jökorai Israel iñemuña reta omboɨpɨ yogüɨreko cananeo reta ipɨte pe, Het iñemuña reta ipɨte pe, amorreo reta ipɨte pe, ferezeo reta ipɨte pe, heveo reta ipɨte pe jare jebuseo reta ipɨte pe.

⁶ Jare taɨ reta jare tayɨ reta omenda jókuae tëta pegua reta taɨ jare tayɨ reta ndive, jare omboete reta jae reta itumpa reta.

Otoniel oepɨ Israel iñemuña reta Cusan-risataim güi

⁷ Jare Israel iñemuña reta oyapo ikavimbae yandeYa jesa róvai, ñakañɨ reta iYa Tumpa güi, jare omboete reta baal reta, jare Asera iä reta.

⁸ Jáeramo yandeYa iyarasɨ ikotɨ reta, jare omee Cusan-risataim mburuvicha guasu Mesopotamia pegua ipo pe; jare juri año Israel iñemuña reta yogüɨreko Cusan-risataim jeia re.

⁹ Jayave Israel iñemuña reta oyerure mbɨatɨtɨ ndive yandeYa pe; jare yandeYa omopüa metei mburuvicha chupe reta, jare jae oepɨ reta; jae ko Otoniel, Cenaz taɨ. Cenaz jae ko Caleb tɨvɨ.

¹⁰ Jare yandeYa iEspíritu ou Otoniel re omboarakuaa katu vaerä, jare jae ojo Israel iñemuña reta jenonde, ñeraroa pe, jare yandeYa omee ipo pe Cusan-risataim, mburuvicha guasu Siria pegua, jare güɨnoi mbaepuere jese.

¹¹ Javoi oime mbɨakatu jókuae ɨvɨ pe cuarenta año rupi, jare omano Otoniel, Cenaz taɨ.

Aod oepɨ Israel iñemuña reta Moab güi

¹² Israel iñemuña reta jekuae oyapo ye ikavimbae yandeYa jesa róvai; jáeramo yandeYa omee mbaepuere Eglón mburuvicha guasu Moab pegua pe Israel re, oyapo reta ikavimbae yandeYa jesa róvai jeko pegua.

¹³ Kuae mburuvicha guasu oñemoïruuka Amón jare Amalec iñemuña reta pe jare yogüeru omoamɨri Israel iñemuña reta, opɨ̈ro reta tëta guasu karandaɨtɨ pegua, jae ko Jericó.

¹⁴ Jare Israel iñemuña reta yogüɨreko Eglón mburuvicha guasu Moab pegua jeia re dieciocho año.

¹⁵ Jare oyerure reta mbɨatɨtɨ ndive yandeYa pe; jare yandeYa omopüa chupe reta metei oporoepɨ vae, jae ko Aod iyasu vae, Gera taɨ, Benjamín iñemuña pegua. Metei ara Israel iñemuña reta omondo jae ndive mbaemboepɨ Eglón mburuvicha guasu Moab pegua pe.

¹⁶ Ërei Aod yepe oyapo iyeupe kɨsepuku jaimbe yoyavi vae, medio metro puku vae jare oñono jemimonde igüɨ pe iyakatu kotɨ;

¹⁷ jaɨkue rupi ojo omee vaerä mbaemboepɨ Eglón pe, jókuae mburuvicha ko ikɨra yae vae.

¹⁸ Omee güire mbaemboepɨ Eglón pe, Aod oë ojo jupíe yogüeru vae reta ndive,

¹⁹ ërei yogüɨraja ma oväe tumpa-raanga reta köiño ñogüɨnoi Gilgal güi vae pe yave, Aod oyerova ye ojo Eglón oïa pe, jare jei chupe: —Mburuvicha guasu, oime anoi ñee reta amombeu vaerä ndeve, ërei kuae amombeuta ndeve yandeño pe. Jayave mburuvicha guasu oyókuai opa vaerä oë jóvai güi vae.

²⁰ Jare Aod oya katu jae oguapɨ oï ramboeve jaeño o araku pegua pe (jae ko iröɨsa ngatu vae pe), jei chupe: —Aru ndeve Tumpa iñee mburuvicha guasu. Eglón oendu yave kuae, opüa jenda güi,

²¹ javoi Aod omondo iyasu iyakatu kotɨ güi oekɨ ikɨsepuku jare pɨpe oikutu Eglón jɨe pe.

²² Oikutuasɨ yae, mbaetɨ jaimbe vaeño opa okañɨ jese, iɨ reve opa okañɨ jese, echa Eglón ikɨra yae, jáeramo Aod mbaetɨ oekɨ ye jɨe güi ikɨse jare oyepɨyere ichuri.

²³ Jaɨkue rupi Aod oyokenda öke omotäta reve japɨpe kotɨ jare oë ojo ïkotɨa rupi.

²⁴ Ojo ma yave, yogüeru mburuvicha guasu pe oyeokuai vae reta, jare oecha öke oyeokenda oï yave, oyemongeta reta mburuvicha guasu ko oyeokenda ojo vaerä ñana pe.

²⁵ Ërei oecha reta mbaetɨ oyepea jare mbaetɨ oë mburuvicha guasu yave, oyemoambeko reta. Javoi oipea reta öke iyave pe yave, oecha juvicha guasu oyepɨso ɨvɨ re omano oï.

²⁶ Oyemoambeko reta ramboeve, Aod otekuarai, jare opa oasa tumpa-raanga reta Gilgal pe ñogüɨnoi vae rupi, jare ojo oñepɨ̈ro Seirat pe.

²⁷ Ojo oväe Israel iñemuña reta iɨvɨ pe yave, omoñee mimbɨ guakaräti ɨvɨtɨ Efraín pegua re oenɨi vaerä Israel iñemuña reta, jare opaete vae ogüeyɨ ɨvɨtɨ güi Aod jupíe jare jae ojo tenonde chupe reta.

²⁸ Jayave jae omombeu opaete yogüeru jupíe vae reta pe, yandeYa ko omee ipo pe jovaicho moabita reta vae. Jayave opaete vae yogüɨraja jupíe jare opɨ̈ro reta ɨ̈aka Jordán tɨpɨmbaea rupi tape oasa Moab kotɨ vae, jare mbaetɨ omaeño kia ave oasa.

²⁹ Jare jókuae ara rupi oyuka reta diez mil kuimbae Moab pegua, jëia yae vae reta jare ñeraro regua reta, mbaetɨ etei ojoyepe metei ave.

³⁰ Jökorai Israel iñemuña reta omoamɨri Moab pegua reta. Kuae jaɨkue rupi oiko mbɨakatu ɨvɨ pe ochenta año.

Samgar oepɨ Israel iñemuña reta filisteo reta güi

³¹ Jaɨkue rupi oiko Samgar, Anat taɨ, jae oyuka seisciento kuimbae filisteo, ɨvɨra puku iyapɨ re güɨnoi jiero vae pe, güeye omoäkua (oyemboarea) pɨpe vae. Samgar oepɨ vi Israel iñemuña reta.