JUECES 21 - Biblia Guarani Tumpa Iñee

Kuña reta Benjamín iñemuña reta peguarä

¹ Israel iñemuña reta jei yepe Tumpa jee re Mizpa pe, agüɨye vaerä tayɨ reta omaeño omenda Benjamín iñemuña pegua reta ndive.

² Ërei oyemboatɨ reta Bet-el pe jare ñogüɨnoi reta Tumpa jóvai pɨ̈tu regua, jäse reve oyaeo jare jei reta:

³ “¡OreYa, Israel iTumpa! ¿Maera pa ko kuae oasa ore ndive? ¿Maera pa oatata metei ñemuña Israel iñemuña reta ipɨte pe?”

⁴ Pɨareve pe Israel iñemuña reta opüa ndeimboveasɨ, oyapo reta mɨmba oyeyuka oyeapɨ jese vae jare omee reta mɨmba oyeyukagüe opaetei oyeapɨ vae jare mbota yembopɨakatu pegua.

⁵ Jare oparandu reta oyoupe: “¿Kia pa yandegüi reta mbaetɨ oï yandepɨte pe yayemboatɨ yave Mizpa pe?” Echa jei reta, añetete oyukata jókuae mbaetɨ oï yemboatɨa pe vae.

⁶ Ipɨatɨtɨ yae Israel iñemuña reta, jëtara Benjamín iñemuña reta ndive oasa vae re, jare jei reta: “Kuae ara okañɨ Israel iñemuña reta ipɨte güi metei ñemuña.

⁷ ¿Mbae pa yayapota yandepuere vaerä ñaväe kuña Benjamín iñemuña reta oimeño oikove vae reta peguarä? Echa yande reta yae ma Tumpa jee re agüɨye vaerä yanderayɨ reta omenda jae reta ndive.

⁸ ¿Oime pa kia nunga Israel iñemuña pegua mbaetɨ ojo yandeYa jóvai Mizpa pe yandeatɨ yave vae?” Jayave imaendúa reta Jabes-galaad pegua reta mbaetɨ metei ave yogüɨraja yemboatɨa pe vae re,

⁹ echa tee reta oenɨi yave, mbaetɨ etei oyekuaa kia jee jókuae tëta pegua.

^10-11 Jayave opaete vae omondo doce mil kuimbae jëia vae reta oyuka vaerä kɨsepuku pe Jabes-galaad pegua reta, oyuka vi michia reta jare kuña reta, oasa ma kuimbae ndive vae reta.

¹² Jare Jabes-galaad pegua reta ipɨte pe oväe reta cuatrociento kuñatai ndeiño etei oasa kuimbae ndive vae, jare güeru reta teyupa oï Silo pe, ɨvɨ Canaán pe.

¹³ Jayave opaete vae reta, omondo oikuaauka Benjamín iñemuña reta ñogüɨnoi ɨ̈vavira Rimón pe vae pe, jare oparea chupe reta yogüeru vaerä iñɨ̈ro chupe reta.

¹⁴ Benjamín iñemuña reta yogüeru, jare Israel iñemuña pegua reta omee chupe reta kuña reta Jabes-galaad güi güerugüe. Ërei mbaetɨ oupitɨ opaete peguarä.

¹⁵ Jare Israel iñemuña reta pegua reta pe paravete Benjamín iñemuña reta, echa yandeYa omboai metei ñemuña Israel iñemuña reta güi.

¹⁶ Jayave tëta pegua tenondegua vae reta jei: “¿Kërai pa yandepuereta ñaväe kuña jókuae oata vae reta peguarä? Echa opa ko omano ikuña reta.

¹⁷ Benjamín agüɨye tokañɨ Israel iñemuña ipɨte güi, jókuae oasayepe vae reta rupi, toime Benjamín iñemuña reta Israel iñemuña ipɨte pe.

¹⁸ Ërei yande mbaetɨ yandepuere yanderayɨ reta ñamee jembireko retarä; echa opaete yande Israel iñemuña, ñañererökuavee Tumpa jee re agüɨye vaerä ñamee yanderayɨ reta Benjamín iñemuña reta pe, kia omee Benjamín iñemuña reta jembirekorä vae, toiporara.

¹⁹ Ërei ngatu oime año ñavo arete tuicha vae oyeapo Silo pe yandeYa peguarä, jae ko Bet-el güi ɨvɨtuguasu kotɨ tape Bet-el güi ojo Siquem kotɨ vae güi kuaraɨ oëa kotɨ, Lebona güi arayevɨ kotɨ.”

²⁰ Jayave Israel iñemuña itenondegua reta omondo ñee Benjamín iñemuña reta pe, jei: “Pekua peñemi uvarupa rupi köiño Silo güi,

²¹ jare peïndaivi peï. Jare peecha kuñatai reta ñogüɨnoe opɨrae yave, peë jókuae peñemía güi jare peñomi peävo kuñatai, jare peraja peɨvɨ pe.

²² Jare kuñatai reta tu ani ikɨvɨ reta yogüeru iñeengeta jese oreve yave, roeta chupe: ‘Pomoñera peɨ̈ro vaerä chupe reta, echa ore roñeraro Jabes-galaad pegua reta ndive yave mbaetɨ orepuere roväe kuña opaete peguarä. Jare pe reta mbaetɨ ko pemee chupe reta, penoi vaerä teko jókuae ñererökuavee Tumpa jee re oyeapo vae kotɨ.’ ”

²³ Benjamín iñemuña reta oyapo jókuae jei reta chupe vae, metei ñavo oñomi kuñatai opɨrae ñogüɨnoi vae güi, jare opa yogüɨraja iɨvɨ pe. Jare omopüa ye tëta guasu reta, jare yogüɨreko pɨpe.

²⁴ Jayave Israel iñemuña reta opa vi yogüɨraja ye joko güi, iɨvɨ ae ae pe iñemuña reta pɨri, jëtara ae pɨri.

²⁵ Jókuae ara rupi mbaetɨ vɨteri mburuvicha guasu Israel pe, jare metei vae ñavo oyapo ipɨa jemimbota.