JUECES 19 - Biblia Guarani Tumpa Iñee

Levita jare jembireko

¹ Jókuae ara rupi, ndei vɨteri oime mburuvicha guasu Israel pe yave, oiko metei levita ketɨgua mombɨrɨ Efraín pegua ɨvɨtɨ re, jae güɨreko jembirekorä metei kuña Belén, Judá pegua.

² Ërei jókuae kuña jeko kaviä chupe, jare ojo chugüi tu jëta pe, Belén Judá pegua pe, joko pe oiko irundɨ yasɨ,

³ jókuae levita ojo oeka omomiari vaerä mboroaɨu ndive güeru ye vaerä jupíe. Güɨraja vi jupíe metei jembiokuai, jare mókoi mburika; jare jókuae kuña omoinge ime tu jo pe.

⁴ Kuña tu oyerovia reve omboresive, jare oparea chupe opɨta vaerä ípɨri; levita jare jembiokuai opɨta reta mboapɨ ara kuña tu jo pe, okaru reta jare jou reta vino jare oke reta joko pe,

⁵ jare irundɨa ara pe ndeimbove yave opüa reta oyupavo yogüeru vaerä. Ërei jaema yogüeruta yave, kuña tu jei jovaya pe: —Ekaru räri kërai yepe, nepɨ̈rata vaerä, javoi ekua kuri.

⁶ Jare mókoi reve oguapɨ okaru jare jou reta vino, jare kuña tu oiporu opɨta ye vaerä jókuae pɨ̈tu.

⁷ Yepe tëi levita opüa ojo vaerä, ërei jovaya omoñera yae ramo opɨta ye jókuae pɨ̈tu.

⁸ Pandepoa ara pe, levita opüa ndeimboveasɨ ojo vaerä, ërei jovaya jekuae omoñera ye okaru vaerä, jare kuaraɨ ñapɨa yave ojo vaerä. Jayave okaru päve reta kaaruasɨ regua.

⁹ Javoi levita opüa ma ojo vaerä jembireko jare jembiokuai ndive yave, jovaya omombeu chupe kaaruasɨ yae ma ko vae, jare oparea ye chupe jókuae pɨ̈tu opɨta vaerä oyerovia reve, jare ndeimboveasɨ oë vaerä ojo.

¹⁰ Ërei levita mbaetɨ ma oipota opɨta ye jókuae pɨ̈tu, oyupavo jare yogüeru jembireko jare jembiokuai ndive, jare mókoi imburika ndive. Jebús jóvai ma ñogüɨnoi yave, jae ko Jerusalén,

¹¹ tembiokuai jei levita pe: —¿Mbae pa rere yapɨta vaerä kuae pɨ̈tu kuae jebuseo reta jëta pe?

¹² Ërei levita jei chupe: —Ngaraa yaja tëta Israel iñemuñambae pɨri. Yaasaño chugüi Gabaa kotɨ,

¹³ yaja yapɨta Gabaa pe ani Ramá pe.

¹⁴ Oasa reta, jare kuaraɨ oike ma yave yogüɨraja oväe Gabaa pe, Benjamín iñemuña reta jëta pe.

¹⁵ Jayave opia reta tape güi oike tëta Gabaa pe oputuu vaerä jókuae pɨ̈tu, jare yogüɨraja oguapɨ jókuae tëta guasu joka pe, echa mbaetɨ kia omee jo chupe reta oputuu vaerä.

¹⁶ Jare ko metei ndechi ou oiko kaaruasɨ yave iparavɨkɨa güi, jae ko ketɨgua Efraín pegua ɨvɨtɨ kotɨ güi ou vae, jae oiko Gabaa pegua reta ipɨte pe, Gabaa pegua reta jae ko Benjamín iñemuña reta.

¹⁷ Jókuae ndechi oecha yave oguata oiko vae tëta guasu joka pe, oparandu chupe: —¿Ketɨ güi pa reyu, jare ketɨ pa reo?

¹⁸ Jare levita jei chupe: —Belén Judá pegua güi ko royu roasa koropi rojo vaerä mombɨrɨ Efraín pegua ɨvɨtɨ kotɨ che aikoa pe. Aja Belén Judá pegua pe, añave ayu aja cherëta kotɨ, ërei mbaetɨ roväe kia jo pe roputuu vaerä.

¹⁹ Oime rogüɨnoi kapii jare atiɨgüe chemburika reta peguarä, jare tembíu jare vino cheveguarä, cherembireko peguarä jare cherembiokuai peguarä, mbaetɨ etei mbae oata oreve.

²⁰ Jare jókuae ndechi jei chupe: —Chemboyerovia yae kuae reyu vae. Che tayemoambeko opaete reipota vae re. Ngaraa amaeño repɨta reke kuae oka pe.

²¹ Jare ndechi güɨraja reta jo pe, jare omongaru mburika reta, jare jae reta oyoe ipɨ, okaru jare jou reta vino.

²² Ërei ovɨakatu yae ma ñogüɨnoi yave, mbovɨ kuimbae jeko ikavimbae jókuae tëta pegua reta oimama o, jare omboɨpɨ okua reta öke re, jare jei reta jókuae ndechi o iya pe: —¡Enoe kuimbae ndembouparä renoi vae! ¡Orekɨ̈reɨ mbae royapo chupe!

²³ Ërei o iya oë jei chupe reta: —¡Agüɨye cherëtara reta! Pomoñera ¡Agüɨye peyapo ikavimbae yae vae kuae kuimbae pe, chemboupa pe!

²⁴ Mase, joko oï cherayɨ mbaetɨ etei oasa kuimbae ndive vae. Jare ko vi oï kuae kuimbae jembireko. Tanoe peve peremimbota peyapo vaerä chupe. Ërei kuae kuimbae pe agüɨye peyapo ikavimbae yae vae.

²⁵ Ërei jókuae kuimbae reta mbaetɨ oyeapɨsaka ndechi re. Jayave jókuae levita oipɨɨ jembireko jare güɨnoe chupe reta ikatu pe. Jare oyapo reta ipɨa jemimbota chupe opaete jókuae pɨ̈tu köe regua, jare oeya reta köeta yave.

²⁶ Köe ma ou yave kuña ou ndechi jo jöke pe, ime oïa pe, jare omano oa, joko pe iköe.

²⁷ Jare ndeimbove ime opüa oipea öke oë ojo vaerä yave, oecha jembireko oï öke pe, ipo reta güɨnoi reve öke pe etei.

²⁸ Jayave jei chupe: —Epüa jare yaja mo. Ërei jae mbaetɨ iñee omoë. Jayave jae oupi jare oñono jëogüegüe imburika re, jare ojo jëta kotɨ.

²⁹ Ojo oväe jëta pe yave oipɨɨ metei kɨse jare opa omboyao yao jembireko jëogüegüe iyoapɨa pɨa rupi, oyapo doce yemboyao, jare omondo opaete Israel iñemuña reta iɨvɨ rupi.

³⁰ Opaete jókuae oecha vae, jei reta: —Israel iñemuña reta oë ɨvɨ Egipto güi güive, mbaetɨi oyeapo ani oyeecha kuae nunga. Yayemongeta kuae re, jare yaiparavo mbae ra yayapota vae.