JUECES 14 - Biblia Guarani Tumpa Iñee

Sansón güɨreko kuña Timnat pegua

¹ Metei ara Sansón ogüeyɨ ojo tëta Timnat pe jare oecha metei kuña, filisteo reta tayɨ,

² jare oyerova ye jëta pe yave omombeu tu jare ichɨ pe. Jei chupe reta: —Timnat pe aecha metei kuña filisteo reta tayɨ, pomoñera pemomiari vaerä cherembirekorä.

³ Ërei tu jare ichɨ jei reta chupe: —¿Mbaetɨ pa kuña opaete nerëtara ipɨte pe, reo vaerä reeka kuña ïru tëta rupi, filisteo itumpa-raanga pota vae reta ipɨte pe? Jare Sansón jei tu pe: —Pemomiariño cheve, echa jókuae kuñatai aipota yae ko.

⁴ Tu jare ichɨ mbaetɨ ave oikuaa kuae yandeYa güi ko ou jökorai vaerä, echa Tumpa oeka filisteo reta jeko omboyekuaa vaerä, echa jókuae ara rupi filisteo reta güɨnoi mbaepuere Israel iñemuña reta re.

⁵ Sansón ojo tu ndive jare ichɨ ndive Timnat kotɨ, jókuae tëta pegua reta iuvarupa pe ma yogüɨraja oväe yave, ko metei yaguapope taɨrusu vae oñee ou ikotɨ.

⁶ Jayave yandeYa iespíritu ou Sansón re, jare jae opa omondoo ndoo ipo pe etei yaguapope kavara raɨ rami; ërei jókuae mbaetɨ omombeu tu jare ichɨ pe.

⁷ Javoi ojo omomiari kuñatai oipota yae vae.

⁸ Mbovɨ ara jaɨkue rupi, Sansón ojo omenda vaerä kuñatai ndive yave, opia tape güi omae vaerä jókuae yaguapope jëogüegüe re, jare oväe pɨpe ei tu jare metei ipe ei.

⁹ Oipɨɨ jókuae metei ipe ei vae jare jou ojo oiko. Oupitɨ tu jare ichɨ yave omee vi chupe reta jou vaerä, ërei mbaetɨ omombeu chupe reta jókuae ei yaguapope jëogüegüe güi ko oekɨ vae.

¹⁰ Sansón tu ojo kuñatai oïa pe; jare Sansón oyapo arete, jókuae tëta pegua kunumi reta jeko rami.

¹¹ Ërei filisteo reta okɨɨye chugüi ramo güɨraja treinta ivɨa-ïrurä ñogüɨnoi vaerä jae ndive.

¹² Jare jókuae treinta vae pe, Sansón jei: —Jaeta peve mbae yavai yae vae. Chiu ara kuae arete oikota vae pe pemombeu cheve mbae ra oipota jei vae yave, che ameeta metei ñavo vae pe temimonde iarambogua lino ikavi yae vae pegua, jare temimonde arete pegua.

¹³ Ërei mbaetɨ jae kavi pemombeu mbae ko oipota jei vae yave, metei ñavo pegüi reta pemeeta cheve temimonde iarambogua lino ikavi yae vae pegua jare temimonde arete pegua. Jare jae reta jei chupe: —Ere oreve, toroyeapɨsaka jese.

¹⁴ Jayave Sansón jei chupe reta: “Oporou vae güi oë tembíu; jare ipɨ̈rata yae vae güi oë jëe yae vae.” Mboapɨ ara rupi, jae reta mbaetɨño oikuaa mbae ra oipota jei vae;

¹⁵ jayave irundɨa ara pe jei reta Sansón jembireko pe: —Eeka kërai neme omombeu vaerä ndeve mbae ra oipota jei jókuae jei oreve vae, mbaetɨ yave roapɨta jare nerëtara reta opata vi roapɨ. ¡Pepɨ̈ro orembaembae oregüi vaeräño ndipo peparea oreve!

¹⁶ Jayave Sansón jembireko oyaeo reve ojo, jare jei chupe: —¡Mbaetɨ cheraɨu, chemotareɨ yepe, echa mbae yavai yae vae rere cheraɨe reta pe vae, mbaetɨ remombeu cheve mbae ra oipota jei vae! Jare Sansón jei jembireko pe: —Cheru jare chesɨ pe mbaetɨ amombeu vae, ¿amombeuta ra ndeve?

¹⁷ Ërei jae jekuaeñoi oyaeo opaete jókuae chiu ara arete oiko vae pe, jare chiúa ara pe omombeu chupe, echa oyaporai yae jese. Jayave jókuae kuña ojo omombeu jaɨe reta pe.

¹⁸ Chiúa ara pe, ndei kuaraɨ oike mbove tëta pegua reta yogüɨraja jei Sansón pe: “Mbaetɨ yé mbae jëeasɨ ei güi vae, mbaetɨ yé mbae ipɨ̈rata yaguapope güi vae.” Jare Sansón jei chupe reta: “Cheguaka pe pembaeara ramo peikuaa mbae oipota jei vae.”

¹⁹ YandeYa iEspíritu ou jese, jare ojo tëta Ascalón kotɨ joko pe oyuka treinta kuimbae opa opɨ̈ro chugüi reta imbaembae jare pɨpe omboepɨ jókuae ñee yavai vae omombeu chupe vae reta pe. Jare ojo tu jëta pe iyarasɨ yae reve,

²⁰ jare Sansón jembireko, tu omee Sansón ichëi pe chugüi.