JUECES 13 - Biblia Guarani Tumpa Iñee

Sansón oa

¹ Israel iñemuña reta jekuae oyapo ye ikavimbae yandeYa jesa róvai, jare yandeYa omee filisteo reta ipo pe cuarenta año rupi.

² Zora pe oiko metei kuimbae Manoa jee vae Dan iñemuña pegua; jembireko mbaetɨ imembɨ, echa imembɨmbae ko.

³ Ërei yandeYa iaraɨgua oyekuaa chupe, jei reve: “Mbaetɨ nemembɨ, echa nde imembɨmbae ko. Ërei añave ndepuruata jare oata nemembɨ kuimbae.

⁴ Añave güive agüɨye jeu vino ani mbae oporombosavaɨpo vae, ani tembíu peumbae vaerä pereko vae reta,

⁵ jare jókuae nemembɨ renoita vae mbaetɨta reñapi, echa ndei oa güive voi Tumpa pe oñeñono tee vae ko, nasareorä ko, jae omboɨpɨta oepɨ Israel iñemuña reta filisteo reta ipo güi.”

⁶ Jare kuña ojo imiari ime pe, jei chupe: “Metei kuimbae Tumpa jembiokuai ou chépɨri, jare chemongɨɨye yae, echa jova Tumpa iaraɨguaecha. Mbaetɨ aparandu chupe ketɨ güi ko ou vae ani kia ko vae, jae ave mbaetɨ oyemombeu cheve.

⁷ Jae jei cheve: ‘Ndepuruata jare oata nemembɨ kuimbae; jáeramo añave güive agüɨyeta reu vino ani mbae oporombosavaɨpo vae ani tembíu peumbae vaerä pereko vae reta, echa michia raɨ Tumpa pe oñeñono tee vae ko nasareorä ko ndei oa güive voi, omano regua.’ ”

⁸ Jayave Manoa oyerure yandeYa pe jei: “CheYa, romoñera rembou ye vaerä jókuae kuimbae rembou vae, oremboe vaerä kërai rogüɨreko jókuae michia raɨ oata vae.”

⁹ Jare Tumpa oendu Manoa iyerure, araɨgua oyekuaa ye kuña pe, ko pe oï yave. Ërei ime Manoa mbaetɨ oï jae ndive ramo,

¹⁰ jae osɨi ojo omombeu ime pe, jei: —¡Mase, jókuae kuimbae oyekuaa cheve vae oyekuaa ye ma cheve!

¹¹ Manoa opüa ojo jembireko ndive jókuae kuimbae oïa pe, jare jei chupe: —¿Jae pa nde ïru ara nemiari cherembireko ndive vae? Araɨgua jei chupe: —Jae ko che.

¹² Jayave Manoa jei: —Jókuae remombeu vae oyembopo yave, ¿këraita pa rombokuakuaa jókuae michia raɨ? ¿Këraita pa rogüɨreko?

¹³ YandeYa iaraɨgua jei Manoa pe: —Nderembireko toyapo opaete jae chupe vae:

¹⁴ Agüɨye tou uva güi mbae oyeapogüe, agüɨye tou vino ani mbae oporombosavaɨpo vae, ani tembíu peumbae vaerä pereko vae reta. Toyapo opaete jaegüe.

^15-16 Manoa mbaetɨ ave oikuaa jókuae kuimbae jae ko yandeYa iaraɨgua, jei chupe: —Romoñera repɨta vaerä ore ndive rekaru, romboyɨta kavara kuimbae raɨ ndeve. Ërei araɨgua jei chupe: —Yepe tëi chemombɨta, ngaraa jau pe ndive tembíu. Ërei pepuere pemee jókuae kavara kuimbae raɨ yandeYa pe mɨmba oyeyukagüe opaetei oyeapɨ vae.

¹⁷ Jayave Manoa jei araɨgua pe: —¿Mbae pa nderee? Oremaendúa vaerä nderé romboete reve, oyembopo ma yave kuae remombeu vae.

¹⁸ Ërei araɨgua jei chupe: —¿Maera pa reipota reikuaa cheree? Oporomopɨakañɨ yae vae ko.

¹⁹ Manoa oipɨɨ kavara kuimbae raɨ jare mbota temitɨ jäɨgüe, jare oñono ita guasu iárambo jare omee mɨmba oyeyukagüe opaetei oyeapɨ vae yandeYa pe. Jayave araɨgua oyapo mɨakañɨ Manoa jare jembireko jóvai;

²⁰ tata jendɨ opüa ɨvate yave, Manoa jare jembireko oecha reta jókuae Tumpa iaraɨgua ojo ara kotɨ tata jendɨ opüa vae rupi. Jayave oyetavatɨka itindɨasɨ reta ɨvɨ re.

²¹ YandeYa iaraɨgua mbaetɨ ye oyekuaa Manoa pe ani jembireko pe. Jayave Manoa oikuaa jae ko yandeYa iaraɨgua vae,

²² jare jei jembireko pe: —Ñamanota ko, echa Tumpa yaecha.

²³ Ërei kuña jei: —YandeYa oipota yandeyuka yave, ngaraa tëi omae mɨmba oyeyukagüe opaetei oyeapɨ vae re, jare temitɨ jäɨgüe re, jare ngaraa oechauka yandeve opaete kuae mbaembae, ngaraa vi opa mbae omombeu yandeve.

²⁴ Jare jókuae kuña imembɨ oa metei kuimbae raɨ, ombojee Sansón. Okuakuaa michia raɨ jare yandeYa iporerekua jese.

²⁵ Jare metei ara Sansón oï Dan iñemuña reta jeyupa pe Zora jare Estaol ipäu pe yave. YandeYa iEspíritu omboɨpɨ oparavɨkɨ jese.