JUECES 12 - Biblia Guarani Tumpa Iñee

Jefté jare Efraín iñemuña reta

¹ Jayave kuimbae reta Efraín iñemuña pegua reta oyomboatɨ jare oasa reta ɨ̈aka Jordán ɨvɨtuguasu kotɨ Zafón re katu, jare yogüɨraja jei reta Jefté pe: —¿Maera pa reasa reo reñeraro Amón iñemuña reta ndive remombeumbae reve oreve? Echa rojota tëi ko nderupíe, ¡añave, roapɨta ndero nde ndive!

² Jefté jei chupe reta: —Che, jare cherëtaɨgua reta rogüɨnoi teko yavai yae vae Amón iñemuña reta ndive, jare che poekauka, ërei pe reta mbaetɨ peyu orereepɨ.

³ Jare aecha mbaetɨ ma peyu oremborɨ vaerä yave, añemoëgua mano pe jare añoraro Amón iñemuña reta ndive, jare yandeYa omee cheve amoamɨri vaerä. ¿Maera pa añave peyu peñeraro vaerä che ndive?

⁴ Jayave Jefté omboatɨ opaete kuimbae Galaad pegua, jare oñeraro Efraín iñemuña reta ndive jare omoamɨri. Efraín iñemuña pegua reta jei: “Efraín jare Manasés iñemuña reta güi oëgüe reta ko ñogüɨnoi Galaad pegua reta ipɨte pe.”

⁵ Galaad pegua reta opɨ̈ro Efraín iñemuña reta güi ɨ̈aka Jordán tɨpɨmbaea jare amogüe Efraín pegua otekuarai vae oväe joko pe jare oiporu oasa vaerä yave, jae reta oparandu chupe Efraín iñemuña reta pegua ra ko vae. Jare jókuae otekuarai vae jei yave mbaetɨ,

⁶ oiporu jei vaerä “Shibolet”; jae jei yave “Sibolet” oipɨɨ jare oñaseokɨ̈ti ɨ̈aka Jordán tɨpɨmbaea pe, echa mbaetɨ ipuere jei vaerä jókuae ñee pe; jökorai oyuka reta Efraín iñemuña pegua reta cuarenta y dos mil kuimbae.

⁷ Jefté oiko Israel iñemuña reta juvicharä ova año. Omano yave oñotɨ reta metei tëta Galaad pegua pe.

Mboapɨ mburuvicha oporojäa vae Israel pe

⁸ Jefté jaɨkue rupi, oiko mburuvicharä Ibzán, Belén pegua,

⁹ güɨnoi treinta taɨ jare treinta tayɨ, jare opareve omomenda tëta ambuae pegua reta ndive, Ibzán oiko mburuvicharä Israel iñemuña reta pe chiu año,

¹⁰ jare omano yave oñotɨ reta Belén pe.

¹¹ Jaɨkue rupi, Elón, Zabulón iñemuña pegua oiko mburuvicharä Israel iñemuña reta pe payandepo año

¹² jare omano yave oñotɨ reta Ajalón pe, jëtara Zabulón iñemuña reta iɨvɨ pe.

¹³ Jae jaɨkue rupi, Abdón, Hilel Piratón pegua taɨ, oiko mburuvicharä Israel iñemuña reta pe

¹⁴ chau año rupi. Abdón güɨnoi cuarenta taɨ jare treinta jɨmɨmino, mburika re opo vae reta.

¹⁵ Omano yave oñotɨ reta Piratón pe, Efraín iñemuña reta iɨvɨ pe oï vae pe, Amalec pegua ɨvɨtɨ pe.