JUECES 11 - Biblia Guarani Tumpa Iñee

Jefté regua

¹ Jefté jae ko jëia yae vae ɨvɨ Galaad pegua. Jae ko metei kuña iyaguasa pota vae imembɨ, tu jee Galaad;

² ërei Galaad jembireko imembɨ ye mbovɨ chupe, jare kuae reta okuakuaa ma yave güɨnoe reta omombo ipɨte güi Jefté, jei reta reve chupe: “Mbaetɨta yanderu imbaembaegüe renoi ndembaerä.” Ichɨ tee jeko pegua.

³ Jayave Jefté otekuarai tɨvɨ reta güi jare ojo oñemoëta Tob pe, joko pe jeko kavimbae vae reta oñemoïru jae ndive jare oë jae reta ndive oyapo ikavimbae.

⁴ Oväe ara, metei ara Amón iñemuña reta oñemopüa Israel iñemuña reta re,

⁵ jare Galaad pegua tenondegua vae reta omondo güeru vaerä Jefté, ɨvɨ Tob güi,

⁶ jei reta chupe: —Eyu, roipota nde reiko oreruvicharä ñañoraro vaerä Amón iñemuña reta ndive.

⁷ Jefté jei chupe reta: —¿Chemotareɨä yera pe reta, jare chemomboä yera cheru jo güi? ¿Maera pa añave peiporara ma peï yave chereeka?

⁸ Jare Galaad pegua tenondegua vae reta jei: —Añetete roiporara yae ma roï vae jeko pegua royu roeka reo vaerä reñeraro Amón iñemuña reta ndive jare eiko oreruvicharä opaete Galaad pe roiko vae pe.

⁹ Jare Jefté jei chupe reta: —Pe reta peipota ayerova ye, aja vaerä añoraro Amón iñemuña reta ndive, ërei yandeYa omee ko cheve aporomoamɨri vaerä yave, aikota peruvicharä.

¹⁰ Jare Galaad pegua tenondegua vae reta jei chupe: —YandeYa oikuaa oï yanderegua, toroyapo opaete kuae rere vae.

¹¹ Jayave Jefté ojo jupíe reta, jare opaete vae oñono mburuvicharä jare ñeraro pe tenondeguarä. Mizpa pe, Jefté jei ye tenonde yave jei vae, yandeYa jóvai.

¹² Jare omondo ñee jerajaa reta Amón iñemuña reta juvicha guasu pe, jei reve: “¿Mbae teko pa reväe cheré reyu vaerä repüa cherëta re?”

¹³ Jare Amón iñemuña reta juvicha guasu jei ñee jerajaa reta pe: “Pe, Israel iñemuña reta Egipto güi peë yave, pepɨ̈ro oregüi oreɨvɨ, ɨ̈aka Arnón güive ɨ̈aka Jaboc pe jare Jordán. Jáeramo añave pemee ye cheve ikavi rupi.”

¹⁴ Jefté jekuae omondo ye ïru ñee jerajaa reta Amón iñemuña reta juvicha guasu pe,

¹⁵ jei vaerä chupe: “Jefté jei körai: Israel iñemuña reta mbaetɨ ko opɨ̈ro Moab-ɨgua reta iɨvɨ ani Amón iñemuña reta iɨvɨ ave.

¹⁶ Echa Israel iñemuña reta ñogüɨnoe Egipto güi yave, oasa reta ñuu rupi Ɨguasu Pɨ̈ta vae kotɨ, jökorai yogüeru oväe Cades pe.

¹⁷ Jayave Israel iñemuña reta omondo ñee jerajaa reta Edom pegua mburuvicha guasu pe oiporu vaerä Israel iñemuña reta oasa iɨvɨ rupi, ërei jae mbaetɨ oipota, jökoraiño vi mburuvicha guasu Moab pegua pe oiporu tëi, ërei mbaetɨ vi oipota. Jáeramo opɨta reta Cades pe.

¹⁸ Jaɨkue rupi yogüɨraja reta ñuu rupi, opa oyere Edom iɨvɨ re jare Moab re, yogüɨraja regua oväe Moab güi kuaraɨ oëa kotɨ, jare joko pe oyembojeyupa reta ɨ̈aka Arnón jovaicho pe. Ërei mbaetɨ oasa reta, echa joko güi oyemboɨpɨ Moab iɨvɨ.

¹⁹ Jayave Israel iñemuña reta omondo ñee jerajaa reta Sehón amorreo reta juvicha guasu Hesbón pegua pe, jei reve: ‘Romoñera remaeño vaerä roasa ndeɨvɨ rupi rojo regua roväe oreɨvɨ pe.’

²⁰ Sehón mbaetɨ güɨrovia jare mbaetɨ omaeño oasa reta iɨvɨ rupi, ërei omboatɨ opaete isundaro jare oyembojeyupa Jahaza pe, jare oñeraro Israel iñemuña reta ndive.

²¹ Ërei oreYa Israel iTumpa omee Sehón jare opaete vae, Israel iñemuña reta ipo pe, jare oporomoamɨri Israel iñemuña reta, jökorai oyemombae opaete jókuae ɨvɨ re amorreo reta yogüɨreko pɨpe vae re;

²² oyemombae opaete amorreo reta iɨvɨ re, Arnón güive Jaboc pe, jare ñuu güive ɨ̈aka Jordán pe.

²³ Jayave, ¿nde reipota pa opa renoe remombo oreYa opɨ̈ro amorreo reta güi jare omee Israel iñemuña reta imbaerä vae?

²⁴ Netumpa Quemos omee mbae ndeve yave, ¿ndembaeä pa? Jökorai ko oreYa Israel iTumpa opa omoë omombo vae reta imbaegüe opɨta orembaerä.

²⁵ ¿Reyererovia katu yae pa mburuvicha guasu Balac Moab pegua Zipor taɨ güi? Jae mbaetɨ ko ou oñeraro Israel iñemuña reta ndive.

²⁶ Tresciento año ma roiko Hesbón pe, Aroer jare tëta raɨ iyɨvɨrigua jare opaete tëta reta ɨ̈aka Arnón iyɨvɨrigua reta pe, ¿maera pa mbaetɨ peñeengeta kuae ɨvɨ re opaete jókuae ara reta oasagüe rupi?

²⁷ Che mbaetɨ etei ikavimbae ayapo ndeve. Nde reyapo reï ikavimbae, echa reyu reporepeña oreré. Ërei oreYa ko jae oporojäa vae, jae tojäa Israel iñemuña reta jare Amón iñemuña reta.”

²⁸ Ërei Amón iñemuña reta juvicha guasu mbaetɨ oyandu Jefté iñee jerajaa reta omombeu vae.

Jefté oñererökuavee

²⁹ Jare yandeYa iEspíritu ou Jefté re, jare jae oasa Galaad jare Manasés rupi, jare oasa vi Mizpa Galaad pegua rupi oike vaerä ojo Amón iñemuña reta iɨvɨ pe.

³⁰ Jare Jefté oyapo ñererökuavee yandeYa pe, jei reve: “Amón iñemuña reta remee yave chepo pe,

³¹ che tamee ndeve mbota oyeyukagüe opaetei oyeapɨ vae jókuae tenonde oë cherövaiti cherëta güi vae, ayerova ye yave ñeraroa güi.”

³² Jare Jefté ojo oñeraro Amón iñemuña reta ndive, jare yandeYa omee ipo pe.

³³ Jefté oyuka jeta Amón iñemuña reta jare opɨ̈ro veinte tëta guasu, Aroer güive ojoi oväe Minit pe jare ɨvɨ ñäkɨ ngatúa uva renda pe. Jökorai Israel iñemuña reta omoamɨri Amón iñemuña reta.

³⁴ Jare Jefté oyerova ye jëta Mizpa kotɨ yave, tayɨ jaevaeño oë oövaiti güɨropo reve jare ombopu angúa raɨ, Jefté mbaetɨ ye ïru tayɨ ani taɨ güɨnoi chugüi.

³⁵ Jayave, jae oecha yave tayɨ, omondoro jemimonde jei reve: —¡Cherayɨ, tuicha chembopɨatɨtɨ! ¡Nde etei reyu chepɨatɨtɨrä, echa añererökuavee ko yandeYa pe, jókuae ambopota ko chupe!

³⁶ Jare tayɨ jei chupe: —Cheru, eyapo che ndive jókuae reñererökuavee yandeYa pe vae, echa jae ombopo ma ndeve remoamɨri vaerä nderovaicho Amón iñemuña reta.

³⁷ Ërei romoñera mókoi yasɨ remee vaerä cheve aguata ɨvɨtɨ rupi, cheïru reta ndive ayaeo reve, amendambae amanota vae jeko pegua.

³⁸ Jare Jefté omee chupe mókoi yasɨ, jókuae ara rupi oguata iñeïru reta ndive ɨvɨtɨ rupi, oyaeo, echa omendambae omanota.

³⁹ Kuae jaɨkue rupi ou ye tu jëta pe, jare tu oyapo jae ndive oñererökuavee rami. Jökorai Jefté tayɨ omano oasambae reve kuimbae ndive.

⁴⁰ Jáeramo Israel iñemuña reta jeko, jae ko año ñavo kuñatai reta yogüɨraja oyaeo irundɨ ara Jefté Galaad pegua tayɨ re.