San Juan 9 - Biblia Guarani Tumpa Iñee

Jesús ombogüera kuimbae jesambae oa vae

¹ Jare Jesús oasa ojo yave, oecha metei kuimbae jesambae voi oa vae.

² Jayave Jesús jemimboe reta oparandu chupe: —Oporomboe vae, ¿kia pa iyoa, ichɨ güi oa yave jesambae vaerä? ¿Jae pa ani tu reta pa?

³ Jesús jei: —Jae ani tu reta iyoa jeko peguaä ko körai oa. Tumpa imbaepuere oyekuaa jese vaerä ko.

⁴ Ikavi ko ayapo vaerä chembou vae iparavɨkɨ ndei pɨ̈tu mbove. Echa outa pɨ̈tu; echa pɨ̈tu yave mbaetɨ kia ipuere oparavɨkɨ.

⁵ Kuae ɨvɨ pe aï ramboeve, che ko tembipe ɨvɨ peguarä.

⁶ Kuae jei ma yave, ondɨvɨ ɨvɨ re jare oyapo tuyuapo jendɨ pe javoi oñono jókuae kuimbae jesambae vae jesa re,

⁷ jare jei chupe: —Ekua eyoe nderesa ɨesaɨ Siloé pegua pe (kuae Siloé oipota jei: “Temimondo”). Jayave jae ojo oyoe jesa jare ou ye yave, omae ma.

⁸ Jáeramo jëta-ɨpɨ rupigua reta jare tenonde rupi oecha jesambae oiko vae, jei reta: —¿Jaeä yera kuae oguapɨse oyerure vae?

⁹ Amogüe vae jei: —Jae ko. Ïru vae reta jei: —Oguakatu vae ko. Ërei jókuae jesambaese vae jei: —Che ko.

¹⁰ Jayave oparandu reta chupe: —¿Kërai pa rekuera?

¹¹ Jare jae jei chupe reta: —Jókuae kuimbae Jesús jee vae oyapo tuyuapo oñono cheresa re jare jei cheve: “Ekua Siloé pe eyoe nderesa.” Aja, jare ayoe cheresa, jare amae.

¹² Jayave jei reta chupe: —¿Kia pe pa oime oï? Jókuae kuimbae jei: —Mbaetɨ aikuaa.

Fariseo reta oparandu jókuae kuimbae okuera vae pe

¹³ Jayave jae reta güɨraja fariseo reta ñogüɨnoia pe jókuae kuimbae tenonde yave jesambae vae.

¹⁴ Jare jókuae ara, ara mbutuu ko Jesús oyapo tuyuapo omomae vaerä kuimbae yave.

¹⁵ Jayave fariseo reta vi oparandu kuimbae pe kërai ra okuera vae. Jare jae jei chupe reta: —Oñono tuyuapo cheresa re. Jayave ayoe cheresa, jare amae.

¹⁶ Jayave amogüe fariseo reta jei: —Tumpa güiä ko ou kuae kuimbae. Echa omboeteä ara mbutuu. Ërei ïru fariseo reta jei: —¿Kuimbae iyoa vae oyapota ra kuae nunga mɨakañɨ reta? Jare oyoavɨ reta iyemongeta oyougüi.

¹⁷ Jayave jei reta ye kuimbae tenonde yave jesambae oiko vae pe: —¿Mbae pa rere nde jókuae nemomae vae re? Kuimbae jei: —Jae ko ñeemombeúa.

¹⁸ Ërei judío reta mbaetɨ güɨrovia kuae kuimbae tenonde yave jesambae ko vae. Mbaetɨ vi güɨrovia okuera ko vae. Jáeramo oenɨiuka reta jókuae kuimbae tu jare ichɨ.

¹⁹ Jayave oparandu reta tu jare ichɨ pe: —¿Jae pa ko kuae nderaɨ, jesambae ko oa pere chupe vae? ¿Kërai pa okuera?

²⁰ Jayave tu jei: —Cheraɨ ko. Jae ko jesambae oa ichɨ güi vae.

²¹ Ërei mbaetɨ roikuaa kërai ra okuera vae. Mbaetɨ vi roikuaa kia ra ombogüera. Peparandu chupe, okuakuaa ma ko jae. Jae etei timiari iyé peve.

²² Körai jei tu reta, okɨɨye reta ramo judío reta güi. Echa judío reta jei ma oyoupe: “Jókuae ‘Jesús ko jae Mesías’, jei vae toyemombo yandetupao güi.”

²³ Jáeramo tu reta jei: “Okuakuaa ma ko jae. Peparandu chupe.”

²⁴ Jayave judío reta oenɨi ye kuimbae tenonde yave jesambae oiko vae, jare jei reta chupe: —Ere Tumpa jee re oreve añete vae. Echa roikuaa kuae kuimbae iyoa vae ko.

²⁵ Jayave kuimbae jei: —Mbaetɨ aikuaa iyoa vae ra jae. Ërei aikuaa vae jae ko: Tenonde yave cheresambae aiko vae, añave amae.

²⁶ Jayave oparandu reta ye chupe: —¿Mbae pa oyapo ndeve? ¿Kërai pa ndembogüera?

²⁷ Kuimbae jei: —Amombeu ma ko peve, ërei peipotaä peyeapɨsaka cheré. ¿Maera pa peipota peendu ye? ¿Peipota vi pa pe reta peyeapo jemimboe retarä?

²⁸ Jayave judío reta oñeengata jókuae kuimbae pe, jei reve: —Nde ko jae jemimboe. Ore ko Moisés jemimboe reta.

²⁹ Ore roikuaa Tumpa omomiari ko Moisés. Ërei jókuae kuimbae mbaetɨ roikuaa ketɨgua ra.

³⁰ Kuimbae jei chupe reta: —Mɨakañɨ aipo kuae. Pe reta mbaetɨ peikuaa kia pegua ko vae. Ërei jae chembogüera.

³¹ Yaikuaa kavi ko, Tumpa mbaetɨ oyeapɨsaka iyoa vae reta re. Ërei kia oipoɨu jare oyapo yave Tumpa jemimbota, jae oyeapɨsaka jese.

³² Iyɨpɨ güive mbaetɨi oyeendu kia ipuere ombogüera jesambae oa ichɨ güi vae.

³³ Tumpa güiä kuae kuimbae ou yave, ngaraa etei ko mbae oyapo.

³⁴ Jayave judío reta jei chupe: —Nde rea mbaeyoa pe voi vae, ¿oremboeta ra? Jayave omombo reta joko güi.

Tumpa pegua jesambae vae reta

³⁵ Jare Jesús oikuaa judío reta omombo ko jókuae kuimbae vae; jare oväe yave, jei chupe: —¿Rerovia pa Tumpa Taɨ re?

³⁶ Kuimbae jei: —CheYa, ¿kia pa ko jae? Emombeu cheve, arovia vaerä jese.

³⁷ Jesús jei chupe: —Reecha ma ko. Che chemiari aï nde ndive vae ko jae.

³⁸ Kuimbae jei: —Arovia, cheYa. Jare omboete.

³⁹ Jayave Jesús jei: —Ayu ko ɨvɨ pe amboyao vaerä oyougüi ɨvɨ pegua reta. Ipuerembae omae vae reta omae vaerä, jare ipuere omae vae reta agüɨye vaerä oecha.

⁴⁰ Amogüe fariseo reta joko pe ñogüɨnoi jae ndive vae oendu kuae yave, oparandu reta chupe: —¿Ore vi pa ko jae jesambae vae reta?

⁴¹ Jesús jei chupe reta: —Peresaä yave, ngaraa tëi peyoa. Ërei pere: “Romae.” Jáeramo peyoa oimeño penoi.