San Juan 8 - Biblia Guarani Tumpa Iñee

¹ Ërei Jesús ojo ɨvɨtɨ Olivo jee vae pe.

² Pɨareve pe ndeimboveasɨ Jesús ojo ye tupao pe. Jayave jeta vae yogüeru jae oïa pe, jare jae oguapɨ omboe reta oï.

³ Jayave mborookuai re oporomboe vae reta jare fariseo reta güeru metei kuña menda re oyuvanga oïa pe oyepokou vae. Jare oñono reta mbɨtea pe,

⁴ jei reta Jesús pe: —Oporomboe vae, kuae kuña oyepokou menda re oyuvanga oïa pe etei.

⁵ Mborookuai pe, Moisés yandeokuai yayuka vaerä ita pe kuae nunga kuña reta. ¿Nde mbae pa rere kuae re?

⁶ Kuae jei reta oikuaa vaerä mbae ra jeita Jesús, omboeko reta vaerä. Jayave Jesús oikuatía ɨvɨ ipoäka pe.

⁷ Ërei jeiete oparandu reta chupe kuae re ramo, Jesús oyemboɨ jare jei chupe reta: —Pegüi reta mbaetɨ iyoa vae räri toyapi ita pe.

⁸ Jayave jekuae oikuatía ye ɨvɨ ipoäka pe.

⁹ Ërei kuae oendu reta yave, ñogüɨnoe joko güi metei metei rupi, ipɨa pe oyemboeko reta ramo. Omboɨpɨ ñogüɨnoe ndechi reta tenonde ete. Jaeño Jesús opɨta kuña oyemboɨ mbɨte vae ndive.

¹⁰ Jare Jesús oyemboɨ jare mbaetɨ kia oecha ramo jei chupe: —Kuña, ¿jama pa jókuae ndemboeko vae reta? ¿Mbaetɨ pa metei ave ndeyuka vae?

¹¹ Jare kuña jei: —Mbaetɨ kia ave, cheYa. Jayave Jesús jei chupe: —Che mbaetɨ vi aipota remano. Ekua, agüɨye ye ndeyoa.

Jesús ko tembipe ɨvɨ peguarä

¹² Kuae jaɨkue rupi Jesús jei jeta vae reta pe: —Che ko tembipe ɨvɨ peguarä. Oiko che ndive vae ngaraa oguata pɨtumimbi pe. Echa güɨnoita tembipe tekove pegua.

¹³ Jayave fariseo reta jei Jesús pe: —Nde nemiari ndeyé aeño. Neñee añeteä ko.

¹⁴ Jayave Jesús jei chupe reta: —Yepe tëi chemiari cheyé aeño, ërei chemiari vae añetete ko. Echa che aikuaa ko ketɨ güi ayu jare ketɨ aja vae. Ërei pe reta mbaetɨ peikuaa ketɨ güi ayu jare ketɨ aja vae.

¹⁵ Pe reta peporojäa ɨvɨ pegua reta oporojäa rami. Che mbaetɨ kia ajäa.

¹⁶ Ërei aporojäa yave, aporojäa ko añete vae rupi. Echa cheiñoä ko aporojäa, cheRu chembou vae ndive ko.

¹⁷ Peporookuai pe jei, mókoi vae jeigüe oyovake yave, añetete ko.

¹⁸ Che chemiari cheyé aeño jare cheRu chembou vae imiari vi cheré.

¹⁹ Jayave judío reta jei: —¿Kia pe pa oime oï ndeRu? Jesús jei chupe reta: —Pe reta mbaetɨ chekuaa jare mbaetɨ vi peikuaa cheRu. Chekuaa yave mona, cheRu peikuaata tëi vi ko.

²⁰ Kuae jei Jesús tupao pe korepoti rɨru iyɨpɨ pe. Echa joko pe oporomboe. Ërei mbaetɨ kia ave oipɨɨ. Echa ndei ave iora oyepɨɨ vaerä.

Pe reta ngaraa pepuere peo che ajataa pe

²¹ Jare Jesús jei ye chupe reta: —Ajata ma kuae güi. Pe reta chereeka tëita ko, ërei pemanota peyoa pe. Pe reta ngaraa pepuere peo che ajataa pe.

²² Jayave judío reta jei: —¿Oyeyukata ra? Echa jei: “Pe reta ngaraa pepuere peo che ajataa pe.”

²³ Jayave Jesús jei chupe reta: —Pe reta ara peguaä ko, che ko ara pegua. Pe reta ko kuae ɨvɨ pegua, ërei che kuae ɨvɨ peguaä ko.

²⁴ Jáeramo jae peve pemanota peyoa pe. Echa mbaetɨ perovia chere CHE KO vae yave, pemanota ko peyoa pe.

²⁵ Jayave jei reta chupe: —¿Kia pa nde? Jesús jei chupe reta: —Jókuae tenonde güive amombeu ma peve vae.

²⁶ Jeta mbaembae re chepuere chemiari peré jare jeta mbae re chepuere pojäa. Ërei chembou vae añetete ko; jare amombeu ɨvɨ pegua reta pe chembou vae omombeu cheve vae.

²⁷ Ërei jae reta mbaetɨ oikuaa Jesús imiari ko chupe reta Tu re.

²⁸ Jesús jei chupe reta: —Che Kuimbaerä ayeapo vae pe reta chereupi ma kurusu re yave, chekuaata CHE KO vae. Jare mbaetɨ mbae ayapo cheyeugüi aeño vae, jaeño cheRu chemboe vae rupiño chemiari.

²⁹ Echa chembou vae oï che ndive. CheRu mbaetɨ chereeya che aeño. Echa ayapo avei jae oipota vae.

³⁰ Kuaekuae Jesús imiari yave, jeta vae güɨrovia jese.

Añetete vae peyorata ko

³¹ Jayave Jesús jei jókuae judío güɨrovia jese vae reta pe: —Pe reta peiko avei yave che jae peve peyapo vaerä vae rupi, peikota ko cheremimboe retarä añetete pegua.

³² Jare peikuaata añete vae, jare añete vae peyorata ko.

³³ Judío reta jei chupe: —Abraham iñemuña reta ko ore. Mbaetɨi ko tembiokuai ore, ¿maera pa rere royeyorata ko?

³⁴ Jesús jei chupe reta: —Añetete che jae peve, opaete mbaeyoa oyapo vae, mbaeyoa jembiokuai ko.

³⁵ Tembiokuai mbaetɨ ko oiko avei iya jo pe. Ërei taɨ oiko avei joko pe.

³⁶ Jayave, che Tumpa Taɨ poyora yave, añetete peyeyorata ko.

³⁷ Che aikuaa Abraham iñemuña reta ko pe reta. Ërei peipota cheyuka, peipotaä peyapo che jae peve peyapo vaerä vae ramo.

³⁸ Che chemiari peve cheRu oechauka cheve vae, ërei pe reta peyapo peru omombeu peve peyapo vaerä vae rupi.

Aña guasu ko jae peru

³⁹ Jei reta chupe: —Abraham ko jae oreru. Jesús jei chupe reta: —Pe reta Abraham iñemuña ete yave mona, peyapota tëi ko Abraham oyapo rami.

⁴⁰ Ërei añave peipota cheyuka, yepe tëi amombeu ma peve añete vae, Tumpa omombeu cheve vae. ¡Abraham mbaetɨ ko jökorai!

⁴¹ Pe reta peyapo ko peru jembiapo reta. Jayave jae reta jei: —¡Aguasa rupi oyeapo vaeä ko ore reta. Tumpaño ko jae oreRu!

⁴² Jayave Jesús jei chupe reta: —Tumpa ko jae peRu yave mona, pe reta cheraɨuta tëi ko. Echa che Tumpa güi ko ayu. Mbaetɨ ko ayu cheyeugüi aeño, jae ko chembou.

⁴³ ¿Maera pa mbaetɨ peikuaa amombeu peve vae? Echa mbaetɨ peipota peyeapɨsaka cheñee re. Jáeramo mbaetɨ peikuaa.

⁴⁴ Aña guasu ko jae peru; jare pe reta peipota peyapo peru oipota vae rupi. Jae oporoyuka iyɨpɨ güive vae ko, mbaetɨi oiko añete vae rupi, echa añetete vae peguaä ko. Iyapu yave, jeko aeño ko omboyekuaa, echa jae ko iyapu yae vae, apu iyɨpɨ ko.

⁴⁵ Ërei che añete vae re chemiari vae mbaetɨ chererovia.

⁴⁶ ¿Kia pa pegüi reta ipuere jei cheve: “Ndeyoa ko”? Echa che chemiari peve añete vae re. ¿Maera pa mbaetɨ chererovia?

⁴⁷ Tumpa taɨ reta oyeapɨsaka jae iñee re. Pe reta Tumpa taɨä ko. Jáeramo peipotaä peyeapɨsaka jese.

Cristo oikoño mai

⁴⁸ Jayave judío reta jei: —Roe ma, nde ko jae metei Samariaɨgua, jare aña oya nderé vae ko. Añetete yepe roe.

⁴⁹ Jesús jei: —Mbaetɨ ko aña oya cheré. Che amboete ko cheRu, ërei pe reta chemboeteä.

⁵⁰ Ërei che mbaetɨ ko aeka ɨvɨ pegua reta chembotuicha vaerä. Ërei oime kia oipota chembotuichauka vaerä. Jae oporojäata ko.

⁵¹ Añetete che jae peve, che jae vae oyapo vae, ngaraa omano.

⁵² Jayave judío reta jei Jesús pe: —Añave roikuaa kavi ma aña ko oya nderé vae. Abraham jare ñeemombeúa reta opa omano. Ërei nde rere: “Che jae vae oyapo vae ngaraa omano.”

⁵³ ¿Tuicha yae ra ndembaepuere oreñemuñagüe Abraham imbaepuere güi? Jae omano jare ñeemombeúa reta omano vi. ¿Kia etei pa nde?

⁵⁴ Jesús jei: —Che aeño ayembotuicha yave, jókuae mbaeä etei ko. Ërei cheRu ko chembotuichauka, pe reta oreTumpa pere chupe vae.

⁵⁵ Ërei pe reta mbaetɨ peikuaa Tumpa, ërei che aikuaa. Che jae yave mbaetɨ aikuaa, cheaputa tëi ko pe reta rami. Ërei aikuaa ko, jare ayapo jei cheve ayapo vaerä vae.

⁵⁶ Peñemuñagüe Abraham oyerovia chereechata vae re. Chereecha jare oyerovia.

⁵⁷ Jayave judío reta jei chupe: —Ndei ave renoi cincuenta año. ¿Këraita pa reecha Abraham?

⁵⁸ Jesús jei chupe reta: —Añetete che jae peve, ndei Abraham oiko mbove, che oimeño mai aiko.

⁵⁹ Jayave judío reta oipɨɨ ita oyapi vaerä tëi Jesús. Ërei jae oñemi jare oë tupao güi; oasa jae reta ipäu rupi ojo.