San Juan 7 - Biblia Guarani Tumpa Iñee

Jesús tɨvɨ reta mbaetɨ güɨrovia jese

¹ Kuae jaɨkue rupi Jesús ojo ɨvɨ Galilea pe. Mbaetɨ ojo Judea pe. Echa judío reta oipota oyuka.

² Jare oyearo ma judío reta iarete, o ñairaka pegua arete.

³ Jayave Jesús tɨvɨ reta jei chupe: —Ekua kuae güi Judea pe, nderupiegua reta oecha vaerä mbaravɨkɨ reyapo vae.

⁴ Echa kia oipota oyekuaauka ïru vae reta pe vae yave, mbaetɨ oyapo vɨari iparavɨkɨ. Kuae reyapo vae, eyapo opaete vae reta jovake.

⁵ Echa tɨvɨ reta ave vi mbaetɨ güɨrovia jese.

⁶ Jayave Jesús jei chupe reta: —Ndei vɨteri ko jókuae ara oväe cheve, ërei peve reta ko ara jaekavi avei.

⁷ Ɨvɨ pegua reta mbaetɨ mbae re pemotareɨ vaerä, ërei che chemotareɨ reta. Echa che amombeu chupe reta ikavimbae vae ko jae reta oyapo vae.

⁸ Pekua pe reta aretea pe. Che ndei räri aja vaerä jókuae arete pe. Echa ndei vɨteri ko oväe cheara aja vaerä joko pe.

⁹ Jökorai jei Jesús chupe reta, jare opɨta Galilea pe.

Jesús ojo arete o ñairaka pegua pe

¹⁰ Ërei tɨvɨ reta opa yogüɨraja güire aretea pe, Jesús ojo vi jókuae aretea pe. Ojo vɨariño, oechambae reve ïru vae reta.

¹¹ Jare judío reta itenondegua reta oeka tëi Jesús aretea pe, jei reve: —¿Jama pa jókuae kuimbae?

¹² Jare joko pe ñogüɨnoi vae reta oyoaka oyoupii Jesús re. Amogüe vae reta jei: “Kuimbae jeko kavi vae ko jae.” Ërei ïru vae reta jei: “Mbaetɨ ko. Oporombotavɨ vae ko.”

¹³ Ërei itenondegua reta güi oipoɨu jeko pegua mbaetɨ metei ave imiari jese oipoɨumbae reve opaete vae reta jóvai.

¹⁴ Jare arete mbɨte ma oyeapo yave, Jesús ojo tupao pe jare omboɨpɨ oporomboe.

¹⁵ Jare judío reta ipɨakañɨ, jare jei reta: —¿Kërai pa kuae kuimbae oikuaa jeta mbaembae oyemboembae reve?

¹⁶ Jayave Jesús jei chupe reta: —Cheporomboe chembaeä ko. Chembou vae iporomboe ko.

¹⁷ Oipotagüe ikɨ̈reɨ oyapo Tumpa jemimbota vae, oikuaata cheporomboe Tumpa iporomboe ra ko, ani cheyeugüi aeño ra chemiari vae.

¹⁸ Iyeugüi aeño imiari vae oeka oyemboeteuka vaeräño, ërei oeka omboeteuka vaerä imboúa vae, jae oporomboe añete vae re. Mbaetɨ oñeväe jese jupimbae.

¹⁹ ¿Moisés omeeä pa ko peve mborookuai? Ërei metei ave pe reta peyapoä mborookuai jei vae. ¿Maera pa peipota cheyuka?

²⁰ Jayave jeta vae reta jei: —¡Aña oya ma nderé! ¿Kia pa oipota ndeyuka?

²¹ Jare Jesús jei chupe reta: —Ayapo metei mbae ara mbutuu pe, jare opaete pe reta pepɨakañɨ jese.

²² Moisés peokuai peyembocircuncida vaerä. Ërei mbaetɨ ko Moisés omboɨpɨ, peñemuñagüe reta güi ko ou. Jare pe reta peporombocircuncida ara mbutuu pe ave.

²³ Peporombocircuncida ara mbutuu pe mborookuai Moisés omombeu peve vae mbatɨ peipota peyavɨ ramo. ¿Maera pa pearasɨ chekotɨ ambogüera metei kuimbae jete ara mbutuu pe vae re?

²⁴ Agüɨye peporojäa peecha vae rupiño. Peporojäa kavi jupi rupi.

¿Jae ra kuae Cristo?

²⁵ Jayave amogüe Jerusalén pegua reta jei: —¿Jaeä ra kuae oeka reta oyuka vaerä vae?

²⁶ Ërei mase, ko oï kuae pe, imiari oï opaete vae jóvai. Ërei mbaetɨ kia mbae jei chupe. ¿Oikuaa ma ra yanderuvicha reta jae ko Cristo vae?

²⁷ Yande yaikuaa ketɨ güi ou kuae kuimbae vae. Ërei Cristo ou yave, ngaraa kia oikuaa ketɨ güi ko ou vae.

²⁸ Jáeramo Jesús oporomboe tupao pe oï yave, iñeeäta reve jei: —Pe reta chekuaa ko, jare peikuaa ko ketɨ güi ayu vae. Ërei mbaetɨ ko ayu cheyeugüi aeño. Echa chembou vae añetete vae ko, pe reta mbaetɨ peikuaa vae.

²⁹ Ërei che aikuaa. Echa chugüi ko ayu. Jae ko chembou.

³⁰ Jayave judío reta oipota tëi oipɨɨ. Ërei mbaetɨ kia ave oipɨɨ. Echa ndei iora oyepɨɨ vaerä.

³¹ Jare joko pe ñogüɨnoi vae güi jeta güɨrovia jese vae, echa jei reta: —Cristo ou yave, ¿oyapota ra jeta yae ete mɨakañɨ kuae kuimbae oyapo vae güi?

Fariseo reta ombou jembiokuai reta oipɨɨ vaerä Jesús

³² Jare fariseo reta oendu jeta vae reta imiari ñogüɨnoi Jesús re. Jayave sacerdote reta itenondegua reta jare fariseo reta ombou jembiokuai reta oipɨɨ vaerä Jesús.

³³ Jayave Jesús jei: —Aïta pe reta ndive michi peguaño ma. Jare ajata chembou vae pɨri.

³⁴ Chereekata ko, ërei ngaraa cheväe. Ngaraa pepuere peo che aïtaa pe.

³⁵ Jayave judío reta jei oyoupe: —¿Ketɨ ra ojota kuae kuimbae mbaetɨ vaerä ñaväe chupe? ¿Ojota ra judío reta tëta ambuae rupi ñogüɨnoia pe? ¿Ojota ra omboe judiombae vae reta?

³⁶ ¿Mbae ra oipota jei, jei yave: “Chereekata ko, ërei ngaraa cheväe. Ngaraa pepuere peo che aïtaa pe”?

Ɨ tekove pegua

³⁷ Jókuae ara ma arete opata yave, arete tuichagüe jare ikavi yae vae pe, Jesús oyemboɨ jare iñeeäta reve jei: —Oime yave kia iɨuve vae, tou chekotɨ jare toɨu.

³⁸ Cheré güɨrovia vae güi osɨrɨta jeta ɨ tekove pegua. Jökorai Tumpa Iñee pe oyekuatía oï.

³⁹ Jökorai imiari Jesús Espíritu omeeta güɨrovia jese vae reta pe vae re. Echa ndei ou Espíritu Santo, ndei Jesús oyemboeteuka ramo.

Jeta vae reta oyoaka oyoupii

⁴⁰ Kuae oendu amogüe joko pe ñogüɨnoi vae yave jei: —Añetete, kuae kuimbae jae ko jókuae ñeemombeúa.

⁴¹ Ïru vae reta jei: —Kuae kuimbae jae ko Cristo. Ërei amogüe vae jei: —¿Galilea güi ra oëta Cristo?

⁴² Echa Tumpa Iñee pe jei David iñemuña güi jare tëta Belén David jëta güi ko oëta Cristo.

⁴³ Jókuae jeko pegua, joko pe ñogüɨnoi vae reta oyoaka oyoupii.

⁴⁴ Jare amogüe reta oipota tëi oipɨɨ Jesús, ërei mbaetɨ kia ave oipɨɨ.

Mbaetɨi kia imiari jökorai

⁴⁵ Jayave sacerdote reta itenondegua reta jare fariseo reta jembiokuai reta yogüeru ye jökoraiño chupe reta. Jayave oparandu reta: —¿Maera pa perúä?

⁴⁶ Jembiokuai reta jei: —¡Echa mbaetɨi kia imiari jókuae kuimbae imiari rami!

⁴⁷ Jayave fariseo reta jei: —¿Peyembotavɨuka ma pa pe reta vi?

⁴⁸ ¿Güɨrovia ma ra jese kia nunga vae mburuvicha reta ani amogüe fariseo reta?

⁴⁹ Kuae jeta vae reta oikuaaä mborookuai pe oyekuatía oï vae. Tumpa iyepopeyu toa jese reta.

⁵⁰ Jayave iñeïru Nicodemo jei chupe reta, jae ko metei pɨ̈tu ojo Jesús pɨri vae:

⁵¹ —Mborookuai ñanoi vae, ¿ipuere yera kia ojäa ndei yayeapɨsaka jese mbove?, jare ¿ndei yaikuaa kavi mbove mbae ra oyapo vae?

⁵² Ïru reta jei chupe: —¿Nde jae vi pa Galileaɨgua? Emongeta kavi Tembikuatía, jare eecha mbaetɨi ko metei ave ñeemombeúa oë Galilea güi vae.

Kuña menda re oyuvanga vae

⁵³ Jayave metei ñavo opa yogüɨraja jëta jëta rupi.