San Juan 6 - Biblia Guarani Tumpa Iñee

Jesús omongaru cinco mil vae reta

¹ Kuae jaɨkue rupi Jesús ojo Ɨguasu Galilea jovaicho pe. Jókuae ɨguasu jee vi Tiberias.

² Jare jeta vae yogüɨraja jaɨkue, echa oecha reta mɨakañɨ oyapo ombogüera imbaerasɨ vae reta yave.

³ Jayave Jesús oyeupi ɨvɨtɨ re, jare oguapɨ joko pe jemimboe reta ndive.

⁴ Jare köiño ma ou Pascua, judío reta iarete.

⁵ Jesús iñäka omopüa omae yave, oecha jeta vae yogüeru ikotɨ. Jayave oparandu Felipe pe: —¿Kia pe pa yaguata mbɨyape kuae reta jou vaerä?

⁶ Jesús jei kuae oikuaa vaerä mbae ra jeita Felipe. Echa Jesús oikuaa ma mbae oyapota vae.

⁷ Felipe jei chupe: —Dosciento denario pegua mbɨyape vae ave ngaraa oupitɨ kuae reta jou vaerä kërai yepe.

⁸ Jare metei Jesús jemimboe Andrés jee vae, Simón Pedro tɨvɨ jei Jesús pe:

⁹ —Oime kuae pe metei kunumi pandepo mbɨyape cebada pegua güɨnoi vae jare mókoi jevae raɨ. Ërei jókuae mbaeä ko kuae jeta vae reta jou vaerä.

¹⁰ Jayave Jesús jei: —Peyókuai oguapɨ reta vaerä kapiiata re. Jayave jókuae oguapɨ vae reta, oupitɨ cinco mil rupi kuimbae reta.

¹¹ Jayave Jesús oipɨɨ jókuae mbɨyape jare omee yasoropai Tumpa pe, jare omee jemimboe reta pe. Jare jemimboe reta omee oguapɨ vae reta pe. Jaeramiño vi omee jevae chupe reta, jae reta oyúe rupi.

¹² Jare yangapɨɨ reta ma yave, Jesús jei jemimboe reta pe: —Pemboatɨ jembɨre vae, agüɨye vaerä oyemombo kërai ave.

¹³ Jare jókuae pandepo mbɨyape vae güi jembɨregüe, omboatɨ reta doce kanata, opa ma okaru reta yave.

¹⁴ Jare joko pe ñogüɨnoi vae reta oecha ma yave kuae mɨakañɨ Jesús oyapo vae, jei reta: —Añetete, jae kuae jókuae ñeemombeúa outa kuae ɨvɨ pe vae.

¹⁵ Jare Jesús oikuaa yogüeruta oipɨɨ reta oñono vaerä juvicha guasurä yave, ojo chugüi reta ɨvɨtɨ guasu kotɨ jaeño.

Jesús oguata ɨguasu iárambo

¹⁶ Jare pɨ̈tu ma yave, Jesús jemimboe reta ogüeyɨ yogüɨraja ɨguasu pe.

¹⁷ Oyeupi reta barco raɨ pe oasa reta vaerä ɨguasu rupi Capernaum kotɨ. Echa pɨtumimbi ma oï, jare Jesús ndeiño ou ye jae reta ñogüɨnoia pe.

¹⁸ Jayave omboɨpɨ täta oyepeyu ɨvɨtu jare ɨ oyemboɨaparúa rúa.

¹⁹ Jare güɨroguata reta ma yave barco raɨ pandepo kilómetro rupi, oecha Jesús oguata ou ɨ iárambo jare ou barco raɨ kotɨ. Jayave okɨɨye reta.

²⁰ Ërei Jesús jei chupe reta: —Che ko. Agüɨye pekɨɨye.

²¹ Jayave jae reta oyerovia reve omboyeupi Jesús barco raɨ pe, jare jupiveiño barco raɨ ojo oväe ɨvɨ jókuae yogüɨrajaa pe.

Jeta vae reta oeka Jesús

²² Pɨareve pe jeta vae reta ɨguasu jovaicho peño ñogüɨnoi vae, imaendúa meteiño ko barco raɨ oï joko pe vae, jare oecha reta Jesús mbaetɨ ojo pɨpe jemimboe reta ndive. Jemimboe retaño opa yogüɨraja.

²³ Ërei ïru barco raɨ reta yogüeru oväe tëta guasu Tiberias güi, jókuae mbɨyape jou reta yandeYa omee yasoropai jese Tumpa pe güirea iyɨpɨ pe.

²⁴ Jare oecha reta Jesús jare jemimboe reta mbaetɨ joko pe ñogüɨnoi yave, oyeupi reta jókuae barco raɨ reta pe jare yogüɨraja Capernaum kotɨ, Jesús oeka vaerä.

Jesús, mbɨyape tekove pegua

²⁵ Jare opa oasa reta ɨguasu yave, oväe Jesús jare jei reta chupe: —Oporomboe vae, ¿yerae ma pa reyu kuae kotɨ?

²⁶ Jayave Jesús jei chupe reta: —Añetete che jae peve, pe reta chereeka mbɨyape peu jare peyemoangapɨɨ pɨpe ramoño, mbaetɨ chereeka mɨakañɨ peecha ramo.

²⁷ Agüɨye peparavɨkɨ tembíu mbaetɨta ɨma oiko peve vae reño. Ërei peparavɨkɨ tembíu opambae vae pegua re, jae ko tekove opambae che Kuimbaerä ayeapo vae ameeta peve vae. Echa cheRu Tumpa jaerä ko chembou.

²⁸ Jayave oparandu reta Jesús pe: —¿Mbae pa royapota? ¿Kërai pa orepuere royapo mbaravɨkɨ reta Tumpa oipota royapo vae?

²⁹ Jayave Jesús jei: —Tumpa oipota peyapo vae jae ko, perovia vaerä cheré. Echa jae ko chembou.

³⁰ Jayave jei reta chupe: —¿Mbae nunga mɨakañɨ pa reyapo, roecha vaerä jare rogüɨrovia vaerä nderé? ¿Mbaembae pa reyapo?

³¹ Oreñemuñagüe reta jou maná ñuu pe. Echa Tumpa Iñee pe oyekuatía oï: “Omee jou reta mbɨyape ara pegua.”

³² Jesús jei chupe reta: —Añetete che jae peve, Moisés eteiä ko omee peve mbɨyape ara pegua. CheRu ko añave omee peve mbɨyape añetete pegua ara güi ou vae.

³³ Echa mbɨyape Tumpa omee vae, jae ko jókuae ara güi ou vae. Jae omee tekove ɨvɨ pegua reta pe.

³⁴ Jare jei reta: —OreYa, emee oreve jókuae nunga mbɨyape.

³⁵ Jesús jei chupe reta: —Che ko jae mbɨyape tekove pegua. Oipotagüe ou chekotɨ vae ngaraa ye ma iyɨmbɨaɨ; jare oipotagüe cheré güɨrovia vae ngaraa ye ma iɨuve.

³⁶ Ërei che jae ma peve körai: Mbaetɨ perovia, yepe tëi chereecha ma.

³⁷ Opaete cheRu omee cheve vae reta yogüeruta chekotɨ; jare oipotagüe ou chekotɨ vae ngaraa amombo.

³⁸ Echa agüeyɨ ara güi ayapo vaerä chembou vae jemimbota. Mbaetɨ ayu ayapo vaerä cheremimbota.

³⁹ Jare cheRu chembou vae jemimbota ko jae, mbaetɨ vaerä amokañɨ metei ave jae omee cheve vae reta, jare amoingove ye vaerä omanogüe vae ara taɨkuegua pe.

⁴⁰ Jare kuae ko jae chembou vae jemimbota: Opaete omae cheré jare güɨrovia cheré vae, güɨnoi vaerä tekove opambae vae; jare che amoingove yeta ara taɨkuegua pe.

⁴¹ Jayave judío reta iñeenguru Jesús re. Echa jei: “Che ko jae mbɨyape ara güi ou vae.”

⁴² Jei reta: —¿Jaeä pa kuae Jesús, José taɨ? Yaikuaa katu ko tu jare ichɨ. ¿Kërai pa ipuere jei: “Ara güi ko ayu”?

⁴³ Jayave Jesús jei chupe reta: —Agüɨye peñeenguru chekotɨ.

⁴⁴ Ngaraa kia ou chekotɨ, cheRu chembou vae mbaetɨ güeru chekotɨ yave. Jare che amoingove yeta ara taɨkuegua pe.

⁴⁵ Ñeemombeúa reta jembikuatía jei körai: “Tumpa omboeta opaete vae.” Jayave, opaete oyeapɨsaka cheRu re vae, jare jae omboe vae, ou chekotɨ.

⁴⁶ Mbaetɨ kia oecha cheRu, jaeño che ayu Tumpa güi vae. Che aecha cheRu.

⁴⁷ Añetete che jae peve, cheré güɨrovia vae güɨnoi tekove opambae vae.

⁴⁸ Che ko jae mbɨyape tekove pegua.

⁴⁹ Peñemuñagüe reta jou maná ñuu pe, ërei opa omano reta.

⁵⁰ Che ko jae mbɨyape ara güi ou vae. Kuae mbɨyape jou vae ngaraa omano.

⁵¹ Che ko jae mbɨyape oikove vae ara güi ogüeyɨ vae. Kia nunga jou kuae mbɨyape vae oikoveta jekuae avei pegua. Jare jókuae mbɨyape ameeta vae cherete ko, jae ameeta ɨvɨ pegua reta jekove re vae.

⁵² Jayave judío reta oyoaka oyoupii: —¿Këraita ra kuae kuimbae jouka jete yandeve?

⁵³ Jayave Jesús jei chupe reta: —Añetete che jae peve, mbaetɨ peu che Kuimbaerä ayeapo vae jete jare jugüɨ yave, ngaraa penoi tekove opambae vae.

⁵⁴ Cherete jare cherugüɨ jou vae, güɨnoi tekove opambae vae, jare amoingove yeta ara taɨkuegua vae pe.

⁵⁵ Echa cherete jare cherugüɨ tembíu añetete vae ko.

⁵⁶ Cherete jare cherugüɨ jou vae oiko che ndive jare che aiko jae ndive.

⁵⁷ CheRu oikove vae ko chembou, jare che aikove jese. Jökoraiño vi jókuae cherete jou vae oikoveta cherupi.

⁵⁸ Che ko jae mbɨyape ara güi ou vae. Kuae mbɨyape mbaetɨ ko maná peñemuñagüe reta jou ñuu pe vae rami, echa jeseve jae reta opa omano. Ërei oipotagüe kuae mbɨyape jou vae, oikoveta jekuae avei pegua.

⁵⁹ Kuaekuae jei Jesús judío reta itupao pe, Capernaum pe oporomboe yave.

Ñee reta tekove opambae vae pegua

⁶⁰ Kuae oendu reta yave, jeta Jesús jemimboe reta jei oyoupe: —Yavai yae ko kuae ñee. ¿Kia pa ikɨ̈reɨta oendu?

⁶¹ Jesús oikuaa jupiegua reta iñeenguru ko jókuae ñee re yave, jei chupe reta: —¿Jaekaviä pa peve kuae jae vae?

⁶² ¿Mbae pa peyapota che Kuimbaerä ayeapo vae chereecha yave ayeupi tenonde aikoa pe?

⁶³ Jaeño ko Espíritu omee tekove. Yanderete ipuereä omee yandeve kuae nunga tekove. Kuae amombeu peve vae Tumpa iEspíritu pegua ko jare tekove omee vae ko.

⁶⁴ Ërei amogüe pegüi reta mbaetɨ perovia cheré. Echa Jesús oikuaa iyɨpɨ güive kia reta mbaetɨ güɨrovia jese jare kia ko omeeta jovaicho reta pe vae.

⁶⁵ Jayave jei chupe reta: —Jáeramo amombeu ma peve ngaraa kia ou chekotɨ cheRu güi oñemeeä yave chupe.

⁶⁶ Jayave güive jeta jupiegua reta oyerova ye Jesús güi, mbaetɨ ma oguata reta jupíe.

⁶⁷ Jayave Jesús oparandu jókuae doce jemimboe reta pe: —¿Pe reta pekɨ̈reɨ vi pa opa peo?

⁶⁸ Jare Simón Pedro jei chupe: —OreYa, ¿kia re pa rojota royemboya? Ndeño ko renoi ñee tekove opambae vae pegua.

⁶⁹ Rogüɨrovia ma nderé jare roikuaa nde ko jae Cristo, Tumpa oikove vae Taɨ.

⁷⁰ Jayave Jesús jei chupe reta: —Che ko poparavo pe doce vae reta. Ërei oime metei pepɨte pe aña pe oyeokuai vae.

⁷¹ Körai jei Judas re. Judas ko jae Simón Iscariote taɨ. Echa jae ko omboeterenga jovaicho reta pe vae; Judas ko, doce vae reta güi metei.