San Juan 3 - Biblia Guarani Tumpa Iñee

Jesús jare Nicodemo

¹ Oiko metei fariseo Nicodemo jee vae. Jae ko judío reta ipɨte pe tuichagüe yae vae.

² Kuae kuimbae ou Jesús oïa pe pɨ̈tu yave jare jei chupe: —Oporomboe vae, roikuaa ko Tumpa ndembou reporomboe vaerä. Echa mbaetɨ kia ipuere oyapo kuae mɨakañɨ reta reyapo vae Tumpa mbaetɨ oï yave jae ndive.

³ Jesús jei Nicodemo pe: —Añetete che jae ndeve, mbaetɨ kia oa pɨau ye vae, ngaraa ipuere oecha Tumpa iporookuaía.

⁴ Nicodemo jei: —¿Këraita pa ipuere metei kuimbae indechi vae oa pɨau ye? ¿Ipuere yera oike ye ichɨ jɨe pe oa ye vaerä?

⁵ Jesús jei chupe: —Añetete che jae ndeve, mbaetɨ kia oa pɨau ye ɨ rupi jare Espíritu rupi vae ngaraa oike Tumpa iporookuaía pe.

⁶ Yandesɨ güi yaa yave, ñanoi tekove ɨvɨ peguaño. Ërei Espíritu Santo rupi yaa yave omee yandeve tekove Espíritu pegua.

⁷ Agüɨye nepɨakañɨ kuae jae ndeve vae re: “Opaete vae oa pɨau ye tai ko.”

⁸ Ɨvɨtu oyepeyu oipota rupi güi jare reendu jɨapu. Ërei mbaetɨ reikuaa ketɨ güi ra ou jare ketɨ ra ojo vae. Jökorai ko oa Espíritu Santo rupi vae.

⁹ Nicodemo jekuae oparandu ye: —¿Këraita pa ko oyeapo kuae?

¹⁰ Jesús oparandu Nicodemo pe: —¿Mbaetɨ pa reikuaa kuae nde Israel pegua reta omboe vae?

¹¹ Añetete che jae ndeve, oremiari ko roikuaa vae re jare romombeu ko roecha vae. Ërei mbaetɨ perovia romombeu peve vae.

¹² Chemiari ma peve mbaembae ɨvɨ pegua re, ërei mbaetɨ chererovia, jayave ¿këraita pa pepuere chererovia mbaembae ara pegua re chemiari peve yave?

¹³ Mbaetɨ kia ave ojo ara pe, jaeño ara güi ogüeyɨ vae, jae ko che Kuimbaerä ayeapo vae.

¹⁴ Moisés arakae oupi mboi iä ɨvɨra re ñuu pe rami, jökoraitai ko ïru vae reta chereupi,

¹⁵ oipotagüe güɨrovia cheré vae güɨnoi vaerä tekove opambae vae, ngaraa ojo kañɨtei pe.

Tumpa oaɨu yae ɨvɨ pegua reta

¹⁶ Echa Tumpa oaɨu yae ɨvɨ pegua reta. Jáeramo omee Taɨ jaevaeño vae, oipotagüe güɨrovia jese vae güɨnoi vaerä tekove opambae vae, ngaraa ojo kañɨtei pe.

¹⁷ Tumpa mbaetɨ ko ombou Taɨ ojäa vaerä ɨvɨ pegua reta, ombou ko ɨvɨ pegua reta oyemboasauka vaerä.

¹⁸ Güɨrovia jese vae, ngaraa oñejäauka. Ërei mbaetɨ güɨrovia jese vae oñejäauka ma ko. Echa mbaetɨ güɨrovia Tumpa Taɨ jaevaeño vae re.

¹⁹ Tembipe ou ma ɨvɨ pe, ërei ɨvɨ pegua reta oaɨu yae iyeupe pɨtumimbiño, tembipe güi, echa jembiapo reta ikavimbae vaeño. Jáeramo oñejäauka reta ma ko.

²⁰ Oipotagüe ikavimbae vae oyapo vae omotareɨ tembipe. Mbaetɨ ou tembipe pe, agüɨye vaerä ïru vae reta oikuaa chugüi jembiapo reta ikavimbae.

²¹ Ërei añete pegua rupi oiko vae ou tembipe pe, ïru vae reta oikuaa vaerä jembiapo reta oyapo ko Tumpa jemimbota rupi kavi.

Omendata vae ivɨa-ïru

²² Kuae jaɨkue rupi Jesús jare jemimboe reta yogüɨraja ɨvɨ Judea pe. Joko pe opɨta reta jare jae oporombobautisauka oï.

²³ Juan vi oporombobautisa oï Enón pe. Enón köiño oï Salim güi. Echa joko pe jeta ɨ. Jare amogüe vae yogüeru jare Juan ombobautisa reta.

²⁴ Echa ndeiño oñoña reta Juan tembipɨɨrɨru pe.

²⁵ Jayave Juan jemimboe reta oyoaka ñogüɨnoi judío reta ndive, kërai ipuere oyetɨo reta Tumpa peguarä vae re.

²⁶ Jayave yogüeru Juan oïa pe jare jei reta chupe: —Oporomboe vae, ɨ̈aka Jordán jovaicho pe oiko nde ndive vae, jókuae nemiari jese vae, oporombobautisa oï, jare opaete vae yogüɨraja ñogüɨnoi jae oïa pe.

²⁷ Jayave Juan jei chupe reta: —Tumpa omee yandeve vaeño yandepuere ñanoi.

²⁸ Che jae ma peve: “Che jaeä ko Cristo. Jaeño Tumpa chembou jae jenonde.” Pe reta etei peikuaa körai ko che jae peve vae.

²⁹ Jae ko metei kuimbae omendata vae rami. Che ko omendata vae ivɨa-ïru rami. Echa omendata vae ivɨa-ïru opɨta omendata vae ndive jare oyeapɨsaka jese jare oyerovia iñee oendu yave. Jökoraiño vi ko che añave ayerovia yae.

³⁰ Jupi ko jeta vae yogüɨraja vaerä ikotɨ, jare mbovɨño yogüeruta chekotɨ.

Ara güi ou vae

³¹ Ara güi ou vae güɨnoi mbaepuere opaete re; ɨvɨ pegua reta ɨvɨ peguaño ko jare oyemongeta mbaembae ɨvɨ pe oï vae reño. Ara güi ou vae güɨnoi mbaepuere opaete re.

³² Jae omoërakua oecha jare oendu vae, ërei mbaetɨ kia güɨrovia jae omoërakua vae re.

³³ Jae omombeu vae güɨrovia vae, oikuaauka ïru vae reta pe güɨrovia ko Tumpa iñee añete ko.

³⁴ Jókuae Tumpa ombou vae imiari Tumpa iñee, echa Tumpa omee chupe iEspíritu.

³⁵ Tu oaɨu Taɨ, jare oñono opaete mbaembae ipo pe.

³⁶ Tumpa Taɨ re güɨrovia vae güɨnoi ma tekove opambae vae, ërei Tumpa Taɨ re mbaetɨ güɨrovia vae ngaraa güɨnoi tekove. Tumpa iyarasɨ oata jese.