San Juan 2 - Biblia Guarani Tumpa Iñee

Metei menda Caná pegua

¹ Mboapɨa ara pe oyeapo menda Caná, Galilea pegua pe. Jesús ichɨ oï joko pe.

² Jare oparea reta vi Jesús pe jare jemimboe reta pe.

³ Vino opa ma yave, Jesús ichɨ jei chupe pe: —Opa ma vino chugüi reta.

⁴ Jesús jei: —Kuña, ¿maera pa rere cheve kuae? Ndei vɨteri ko oväe cheara.

⁵ Jayave Jesús ichɨ jei tembiokuai reta pe: —Peyapo opaete mbae jae jei peve vae.

⁶ Joko pe oï ova tinaa tuicha vae ita pegua. Judío reta jeko oyepoe pɨpe vae. Metei ñavo jókuae tinaa tuicha vae tɨnɨe pandepo ɨru pe.

⁷ Jesús jei tembiokuai reta pe: —Pemotɨnɨe tinaa tuicha vae reta ɨ pe. Jayave jae reta omotɨnɨeasɨ.

⁸ Jesús jei chupe reta: —Añave peyara peraja tembiokuai ruvicha pe. Jare jökorai oyapo reta.

⁹ Oyeokuai vae reta juvicha jou jókuae ɨ vinorä oyeapo vae, oikuaambae reve kia güi ra güeru jou vae, ërei tembiokuai reta oikuaa kia güi ko oyara ɨ vae. Jayave tembiokuai ruvicha oenɨi omenda vae.

¹⁰ Jei chupe: —Opaete vae arete pe oporoëɨ vino ikavi vae pe räri. Javoi jeta ma vino jou reta yave ramo güɨnoe chupe reta vino ikavi nungambae. Ërei nde añave ramo renoe vino ikavi yae vae.

¹¹ Jesús kuae oyapo Caná, Galilea pegua pe. Körai jae omboɨpɨ oechauka iyemboetea. Jare jemimboe reta güɨrovia jese.

¹² Kuae jaɨkue rupi Jesús ojo Capernaum pe. Yogüɨraja vi jupíe ichɨ, tɨvɨ reta jare jemimboe reta. Jare opɨta reta joko pe mbovɨ ara.

Jesús oitɨo tupao

¹³ Jare köiño ma ou judío reta iarete Pascua yave, Jesús ojo Jerusalén pe.

¹⁴ Jare tupao pe oväe güeye imeea reta, vecha jare pɨkasu imeea reta, jare korepoti ipoepɨa reta oguapɨ ñogüɨnoi joko pe.

¹⁵ Jayave Jesús oyapo chikote jare omoë omombo tupao güi opaete omaemee vae reta, vecha reta jare güeye reta. Jare opa opɨyere korepoti ipoepɨa reta güi ireare jare omboyapara imesa reta.

¹⁶ Jare jei pɨkasu imeea reta pe: —Penoe kuae reta kuae güi. CheRu jo agüɨye peyapo maemee renda.

¹⁷ Jayave jemimboe reta imaendúa oyekuatía oï vae re: “Ndero re cherägüɨro yae vae re aiporara.”

¹⁸ Jayave judío reta oparandu Jesús pe: —¿Mbae nunga mɨakañɨ pa reechaukata oreve roikuaa vaerä oime ra renoi mbaepuere kuae reyapo vaerä?

¹⁹ Jesús jei chupe reta: —Pembosururu kuae tupao, che amopüa yeta ko mboapɨ ara pe.

²⁰ Jayave judío reta jei: —Cuarenta y seis año pe opa oyeapo kuae tupao. ¿Remopüa yeta ra nde mboapɨ ara pe?

²¹ Ërei Jesús imiari chupe reta jete re, tupao re rami.

²² Jáeramo Jesús oikove ye omanogüe reta ipɨte güi yave, jemimboe reta imaendúa kuae jei vae re. Javoi güɨrovia reta Tumpa Iñee re jare Jesús jei chupe reta vae re.

Jesús oikuaa opaete vae

²³ Jesús oï ramboeve Jerusalén pe arete Pascua pe, jeta vae güɨrovia jese oecha yave jókuae mɨakañɨ reta oyapo vae.

²⁴ Ërei Jesús mbaetɨ güɨrovia añetete ko kuae reta iporogüɨrovia. Echa jae oikuaa kavi ko opaete vae.

²⁵ Jae mbaetɨ oeka kia omombeu vaerä chupe ɨvɨ pegua reta regua. Echa jae oikuaa kavi ɨvɨ pegua reta ipɨa pe oï vae.