San Juan 16 - Biblia Guarani Tumpa Iñee

¹ Opaete kuaekuae che jae ma peve agüɨye vaerä pegüɨapi.

² Judío reta pemombota itupao reta güi. Jare oväeta ara, jókuae peyuka vae reta güɨroviata Tumpa pe ko oyeokuai.

³ Kuae oyapo retata mbaetɨ oikuaa cheRu ramo jare mbaetɨ che chekuaa ramo.

⁴ Ërei kuae che jae ma peve, ara oväe yave pemaendúa vaerä amombeu ma peve vae re. Kuae mbaetɨ amombeu peve tenonde rupi, echa che aiko pe ndive.

Espíritu Santo jembiapo

⁵ Ërei ajata chembou vae pɨri. Jare metei ave mbaetɨ peparandu cheve ketɨ ra ajata vae.

⁶ Jaeño pepɨatɨtɨ kuae che jae peve vae jeko pegua.

⁷ Ërei amombeu peve añete vae. Ikavita ko peve che aja vaerä. Echa che mbaetɨ aja yave, ngaraa ou peve Oporombopɨakatuta vae. Ërei aja yave, ambouta peve.

⁸ Jare jae ou yave, oikuaaukata ɨvɨ pegua reta pe mbaeyoa regua, mbaejupi vae regua jare morojäa regua.

⁹ Mbaeyoa regua, echa mbaetɨ güɨrovia reta cheré.

¹⁰ Mbaejupi vae regua, echa ajata cheRu oïa pe jare pe reta ngaraa ye ma chereecha.

¹¹ Jare morojäa regua oikuaaukata, echa aña kuae ɨvɨ juvicha oñejäauka ma.

¹² Oime vɨteri jeta mbae jae vaerä peve, ërei mbaetɨño pepuereta peikuaa kavi.

¹³ Ërei Espíritu añetete pegua ou ma yave, oikuaauka kavita peve añete vae. Echa ngaraa imiari iyeugüi aeño, imiarita opaete oendugüe re jare oikuaaukata peve opaete mbaembae outa vae re.

¹⁴ Jae chemboeteukata ko. Echa omboresive chegüi vae re jae pemboeta cheregua.

¹⁵ Opaete cheRu imbae chembae vi ko. Jáeramo jae peve: “Jae pemboeta cheregua.”

Mbɨatɨtɨ oyepoepɨta yerovia pe

¹⁶ Michi peguaño ma pe reta chereechata. Ërei ɨmambae chereecha yeta. Echa ajata cheRu oïa pe.

¹⁷ Jayave amogüe jemimboe reta jei oyoupe: —¿Mbae pa oipota jei kuae? Echa jei: “Michi peguaño ma pe reta chereechata. Ërei ɨmambae chereecha yeta. Echa ajata cheRu oïa pe.”

¹⁸ ¿Mbae ra oipota jei: “Michi peguaño ma”? Mbaetɨ yaikuaa mbae ra oipota jei vae.

¹⁹ Jesús oikuaa jae reta oipota tëi oparandu chupe kuae re. Jáeramo jei chupe reta: —Che jae peve körai: “Michi peguaño ma pe reta chereechata. Ërei ɨmambae chereecha yeta.” Jare peparandu peï oyoupe mbae ra oipota jei kuae che jae peve vae.

²⁰ Añetete che jae peve, peyaeota jare pepɨatɨtɨta, ërei ɨvɨ pegua reta oyeroviata. Yepe tëi pepɨatɨtɨta, ërei pepɨatɨtɨ reta oyepoepɨta yerovia katu pe.

²¹ Metei kuña imembɨ oata oï yave, oiporara yae jasɨ chupe ramo, echa oväe iora. Ërei imembɨ oa ma yave, mbaetɨ ma imaendúa oiporara yae vae re. Echa oyerovia imembɨ oa vae re.

²² Jaeramiño vi pe reta añave pepɨatɨtɨ, ërei poecha yeta, jare peyeroviata, jare ngaraa kia oekɨ pegüi peyerovia.

²³ Jókuae ara ngaraa ma peparandu cheve mbae re. Añetete che jae peve, oipotagüe mbae peiporu cheRu pe vae, jae omeeta peve.

²⁴ Ndeiño peiporu mbae cheree re. Peiporu jare oñemeeta peve, jökorai peyerovia yae vaerä.

Che amoamɨri tovaicho ɨvɨ pegua

²⁵ Kuaekuae chemiari ma peve ambojaanga reve. Ërei oväeta ma ara reta mbaetɨ vaerä ma chemiari peve yembojaanga rupi, jayave amombeu kavita cheRu regua.

²⁶ Jókuae ara reta pe peiporuta mbae cheree re. Che etei mbaetɨta ayerure cheRu pe peré,

²⁷ echa cheRu etei peraɨu, pe reta cheraɨu jare perovia che ayu Tumpa güi ramo.

²⁸ Ayu ko cheRu güi kuae ɨvɨ pe. Aja yeta ko kuae ɨvɨ güi cheRu oïa pe.

²⁹ Jare jemimboe reta jei chupe: —Añave remombeu kavi ma oreve rembojaangambae reve.

³⁰ Añave roikuaa nde reikuaa ko opaete mbaembae vae, jare mbaetɨ reeka kia oparandu vaerä ndeve mbae re. Kuae jeko pegua rogüɨrovia nde reyu ko Tumpa güi vae.

³¹ Jesús jei chupe reta: —Jayave, ¿perovia ma pa añave?

³² Ërei ou ma ara oväe, ko ma oï, opa vaerä peñemoai moai, chereeyata cheño etei. Ërei mbaetɨ ko cheño aï, echa cheRu ko oï che ndive.

³³ Kuaekuae jae ma peve penoi vaerä mbɨakatu cheré. Kuae ɨvɨ pe peiko ramboeve, peiporarata ko. Ërei peyeko cheré, echa che amoamɨri tovaicho ɨvɨ pegua.