San Juan 15 - Biblia Guarani Tumpa Iñee

Jesús, uva iɨ añetete vae

¹ Che ko jae uva iɨ añetete vae, jare cheRu ko jae uva iyangarekoa.

² Opaete jäka iambae oï cheré vae cheRu oyasɨata. Jare opaete jäka ia vae reta oitɨota, jeta ia vaerä.

³ Pe reta peyetɨo ma ñee amombeu peve vae rupi.

⁴ Peï avei cheré, che aï peré rami. Metei jäka oyeasɨa yave uva iɨ güi, ngaraa ipuere ia. Echa jäka jae aeño ipuereä ia. Jökoraita vi pe reta mbaetɨ yave peï cheré.

⁵ Che ko jae uva iɨ, jare pe reta ko jae jäka reta. Jókuae oiko cheré vae jare che jese vae jetata ia. Echa mbaetɨ peï cheré yave, ngaraa etei mbae peyapo.

⁶ Jókuae mbaetɨ oï cheré vae oyemombota metei jäka oyeasɨa oyemombo yɨpi vaerä vae rami. Jare yɨpigüe oyemboatɨ jare oyemombo oyeapɨ vaerä.

⁷ Peï yave cheré, jare peyapo che jae peve vae yave, peiporu peipota vae jare oyeapota ko peve.

⁸ CheRu oyemboeteuka ko jeta peia yave. Jare körai peikuaaukata pe reta ko cheremimboe reta.

⁹ CheRu cheraɨu rami che poaɨu. Peï avei cheporoaɨu pe.

¹⁰ Peyapo cheporookuai reta yave, peï aveita cheporoaɨu pe. Che ayapo cheRu iporookuai reta jare aï avei ipororaɨu pe rami.

¹¹ Körai chemiari ma peve peyerovia vaerä che rami, jökorai peyerovia yae vaerä.

¹² Kuae jae mborookuai amee peve vae: Peyoaɨu, che poaɨu rami.

¹³ Mboroaɨu tuichagüe güɨnoi vae ko omee jekove ivɨa-ïru reta re.

¹⁴ Pe reta ko jae chevɨa-ïru, che jae peve vae peyapo yave.

¹⁵ Ngaraa ma tembiokuai reta jae peve, echa tembiokuai mbaetɨ oikuaa mbae ko iya oyapo vae. Ërei che jae ma peve pe reta ko jae chevɨa-ïru. Echa opaete cheRu omombeu cheve vae aikuaauka ma peve.

¹⁶ Pe reta mbaetɨ ko cheparavo. Che ko poparavo. Jare poñono peo vaerä jeta peia jare jókuae peiagüe toiko avei. Oipotagüe mbae peiporu cheRu pe cheree re yave, jae omee vaerä peve.

¹⁷ Kuae jae poyókuai vae: ¡Peyoaɨu!

Ɨvɨ pegua reta pemotareɨta

¹⁸ Ɨvɨ pegua reta pemotareɨ yave, pemaendúa che räri ko chemotareɨ reta pegüi.

¹⁹ Pe reta mona ɨvɨ pegua yave, ɨvɨ pegua reta peraɨuta tëi ko. Ërei che poparavo ma ɨvɨ pegua reta ipɨte güi ramo, jae reta pemotareɨ. Echa pe reta ɨvɨ peguaä ma ko.

²⁰ Pemaendúa che jae peve vae re: “Metei tembiokuai mbaetɨ ko ma yae iya güi.” Echa che chemotareɨ reta yave, pe reta pemotareɨta vi. Ërei oyapo reta che jae chupe vae yave, oyapota vi pe reta pere chupe reta vae.

²¹ Ërei opaete kuae mbaembae oyapo retata peve cheré perovia ramo. Echa jae reta mbaetɨ oikuaa chembou vae.

²² Mbaetɨ yave mona ayu chemiari vaerä chupe reta, ngaraa tëi teko güɨnoi reta. Jáeramo jei rapeä mbaetɨ ko oikuaa reta iyoa re vae.

²³ Chemotareɨ vae, omotareɨ ko cheRu.

²⁴ Mbaetɨ yave mona mbae ayapo ipɨte reta pe mbaetɨi kia oyapo vae, ngaraa tëi teko güɨnoi reta. Ërei jae reta oecha tëi reve chemotareɨ reta jare cheRu oremotareɨ vi.

²⁵ Kuae oyapo reta oyembopo vaerä mborookuai pe oyekuatía oï vae. Echa oyekuatía oï körai: “Chemotareɨ reta cherekombae reve.”

²⁶ Ërei ambou ma peve cheRu güi Oporombopɨakatuta vae jae ko Espíritu añete pegua, cheRu güi ou vae yave, jae imiarita peve cheregua.

²⁷ Jare pe reta vi pemiarita. Echa iyɨpɨ güive peiko che ndive.